________________
પ્રા. ઉપદેશમાલાનો ગૂર્જરાનુવાદ
૨૦૫
આ પ્રમાણે દોષ અને ગુણની પ્રધાનતાવાળા પુરુષોનો સમાગમ કરનાર પ્રાણીઓને નુકસાન અને ફાયદા નક્કી થાય છે, તેથી હે મૃગ સમાન નેત્રવાળી પ્રિયાઓ ! તમારી સ્નેહદૃષ્ટિથી લગાર પણ ચલાયમાન થયા સિવાય હું દોષોના એક સ્થાનરૂપ તમારો ત્યાગ કરીને શિવરમણીના સ્નેહાર્પણના સાક્ષીભૂત એવા સદ્ગુરુનો આશ્રય કરી દીક્ષા લેવાની અભિલાષાવાળો થયો છું.
હે માતાજી અને પિતાજી ! કાન્તાઓ ! અને હે પ્રભવ ! સવારે હું દીક્ષા ગ્રહણ કરીશ, ત્યારે તમે શું કરશો ? તે કહો. અંગારદાહક, મધુબિન્દુ વગેરે સુન્દર દૃષ્ટાન્તોથી તમને સત્ય સ્વહિત સમજાવ્યું. આવા પ્રકારના વિષય-સુખથી હવે આપણને સર્યું. જેમ ખારા જળથી લવણસમુદ્ર ભરપૂર છે, તેમ અસંખ્યાતાં શારીરિક અને માનસિક દુ:ખોથી ભરેલો આ ભવ છે. મધ ચોપડેલ તરવારની ધાર ચાટવા સરખું આ વિષયસુખ છે. તેમાં જે કોઇને સુખનો ભ્રમ થાય છે, તે સુંદર નથી, કહ્યું છે કે :- ‘તેવા પ્રકારની બુદ્ધિ હોય તો નાશ થશો, તેવા પ્રકારનું શાસ્ત્રહોય તો તેના ઉપર વજ્ર પડજો, તેવા પ્રકારના ઉછળતા ગુણો હોય તો ભયંકર જ્વાલાવાળા અગ્નિમાં પ્રવેશ પામો કે, જેનાથી ફરી સ્ત્રીના ગર્ભાવાસ અને નરકાવાસની વ્યથા થાય.'
આ પ્રમાણે અવધિ વગરના દુ:સહ દુઃખવાળા સંસારમાં વાસ્તવિક સુખનો છાંટો પણ નથી. જો તમે સુખની અભિલાષાવાળા હો, તો મારી સાથે આજે વિરતિ ગ્રહણ કરવાની ઇચ્છા રાખો. ત્યારપછી અશ્રુ-પ્રવાહથી છલકાતી આંખોવાળા માતા-પિતા અને પ્રિયાઓએ કહ્યું કે-’વાત બરાબર છે, અમે પણ સાથે જ દીક્ષા અગીંકાર કરીશું.'
ઉપશાન્ત બનેલી કાન્તાઓ કહેવા લાગી કે, ‘’અમે જે કંઈ પણ તમને વધારે પડતું કહ્યું, તે વિરહના દુઃખ અને પ્રેમથી કહ્યું છે, તેમાં જે કંઈ અનુચિત કહેવાયું હોય, તેની ક્ષમા માગીએ છીએ.”
પ્રભવ પણ આજ્ઞા લઇને એમ કહીને પલ્લીમાં ગયો કે, ‘હું પણ મારું કેટલુંક કાર્ય પતાવીને એકદમ પાછો આવું છું, અને તમારી સાથે દીક્ષા અંગીકાર કરીશું.'
શુભ મુહૂર્તના યોગ્ય-સમયે સર્વાંગ ઉત્તમ જાતિનાં આભૂષણો ધારણ કરીને શિબિકામાં બેસીને માતા-પિતા સાથે પ્રયાણ કર્યું. તે આઠે કાન્તાઓ પણ પોતાના માતા-પિતાના ઘરેથી મહાઆડંબર અને ઋદ્ધિ સાથે શિબિકારૂઢ થઇને આવી પહોંચી. તે સર્વની સાથે જંબૂકુમાર અનુસરાતા તેમ જ અનાદ્વૈત દેવતાએ જાતે આવી સર્વ ઋદ્ધિ વિકુર્તી, ઉપર ધરેલ છત્રવાળા, શ્વેત ચામરોથી વીંજાતા, નમન અને નૃત્ય કરતી નારીઓથી યશોગાન કરાતા, બન્દીજનોથી પ્રશંસા કરાતા, ખેચરો વડે પુષ્પવૃષ્ટિ કરાતા, વાજિંત્રોના શબ્દોથી આકાશ ભરી દેતા
