Book Title: Atmsiddhi Mahabhashya Part 03
Author(s): Shrimad Rajchandra, Jayantilalji Maharaj
Publisher: Shantaben Chimanlal Bakhda
View full book text
________________
શ્રી સદ્ગુરુવે નમો નમ: મહાભાષ્યના આ તૃતીય વિભાગના પ્રારંભમાં અધ્યાત્મમાર્ગના રાજયોગેશ્વર અધ્યાત્મયોગી શ્રીમદ્ રાજચંદ્રજીની કૃપા વરસે, તે રીતે આ વીર સ્તુતિ કરતાં અપાર હર્ષનો અનુભવ થાય છે.
અત્યાર સુધી આત્મસિદ્ધિ મહાગ્રંથમાં જે ક્રમિક વ્યાખ્યાન ચાલ્યું આવે છે અને એક પછી એક ગુજરાતી ભાષાના કાવ્યભાવથી ભરપૂર જે પદ અને ગાથાઓ ઉપસ્થિત થઈ છે, તે હકીકતમાં આધ્યાત્મિક ભૂમિકાના ઊર્ધ્વગામી સોપાનનું દર્શન કરાવે છે. સળંગ કાવ્ય એક અખંડ સૂત્રથી ગૂંથવામાં આવ્યું છે. આ માળાના અલગ અલગ મણકાઓ પોતાનું એક સ્વતંત્ર સ્થાન ધરાવે છે, છતાં તે અખંડ માળાની શોભામાં અભિવૃદ્ધિ પણ કરે છે.
આપણે વીર પરમાત્માના ચરણોમાં પ્રાર્થના કરીએ કે આ ભાવ ભરેલી ગાથાઓની માળાનું આંતરિક રહસ્ય પણ પ્રગટ થતું જાય અને વીર પરમાત્માએ ઉપદિષ્ટ કરેલો જે મોક્ષમાર્ગ છે, તે માર્ગનું આ ગાથાઓમાં વિશેષ રૂપે આકલન થતું રહે. કવિશ્રીના અન્ય પદોમાં પણ એક રાસગીત સાંભળવા મળે છે કે “મૂળ મારગ સાંભળો જિનનો રે”. સ્વયં કવિવર્ય શ્રીમદ્જીએ જીનેશ્વરના મૂળમાર્ગનું અવલંબન કરી આત્મસિદ્ધિ રૂપી મોતીઓને સરાણે ચઢાવી તે માર્ગના મોતીઓને શોભાયમાન કર્યા છે, એટલું જ નહીં પરંતુ પ્રત્યક્ષ અને પરોક્ષ રૂપે તે માળાના ઝીણા મોતીઓ પણ માળા સાથે પરોવીને આત્મસિદ્ધિનો હાર ગૂંચ્યો છે.
કૃપા કરો પ્રભુ વીર જીનેશ્વર ! સદ્ગુરુના વચનને વાગોળીએ, તત્ત્વભાવોનું અમૃત પાન કરીને, જનમ જનમની સુધા નિવારીએ, નયનોમાં નીર વરસે તેવો, અપૂર્વ આનંદ ઊભરાવીએ, રોમે રોમે શીતળતા વ્યાપે, એવો મોક્ષમાર્ગ પિછાનીએ ” કૃપા કરો -
