Book Title: Chandappahasami Chariyam
Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad
View full book text ________________
१६
सिरिचंदप्पहजिणचरियं
एत्थ खणे पत्थावं, लहिउं राया जओ भणइ साहुं । विणओ णओ निवेसिय सीसम्मि वरंजलीबंधं ॥ ३८४ ।। भयवं ! तइया पुत्तो मह देवीए कराओ केण हढो । कत्थ व अच्छइ संपइ, सुहं व दुक्खं व किं पत्तो ? ॥ ३८५ ।। का वा एसा इत्थी, माणुसिरूवा वि निययरूवेण । अमरासुररमणीण वि, मणम्मि वेलक्खयं जणइ ।। ३८६ ।। इत्थीभावसुलब्भं, किह वा भयमुज्झिऊण अइभीमे । सीहम्मि समारूढा, समागया वंदणत्थं वो ॥ ३८७ ।। को वा एस कुमारो, दिट्ठो वि जणेइ अम्ह आणंदं । एवं पुट्ठो साहु, भणइ निवं सुणसु नरनाह ! || ३८८ ॥ जो सो जयसिरिदेवीहत्थाओ सुओ हियो तया तुज्झ । वणरायदेवनामो, स एस कुमरो महाराय ! ॥ ३८९ ॥ केरलनरिंद-सिरिदेविपुत्तओ जणवएसु सुपसिद्धो । गयबंधणागएणं, केरलरन्न च्चिय गहीओ ।। ३९० ।। जाउ इमा परितुट्ठा, इत्थी एसा वि तुज्झ धूय त्ति । जयसिरिउयरुप्पन्ना, सीहरहा सुरकयभिहाणा ॥ ३९१ ।। सिंहीभयाओ जइया, तुह देवी पुत्तयं पसुया य । तइय च्चिय तग्गब्भाओ निवडिया पढमयं एसा ॥ ३९२ ॥ हरिदइयागुरुभयसंभमेणउब्भंतमाणसाए य । न य लक्खिया य देवीए निययगब्भाओ वि पडंती || ३९३ ॥ तत्थेव ठिया पडिया, देवी य पहाविया सुयं गहिउं । भवियव्वयानिओएण तत्थ पत्ता य सा सीही ॥ ३९४ ।। नियजायगबुद्धीए, तीए गहिऊण ससिसु मज्झम्मि । धरिया नियथणदुद्धं च पाइया निययपोए व्व ॥ ३९५ ॥ एवं च दंसणप्फंसणेण सिंहेसु चेव कयपीई । वुड्ढिं पत्ता तद्दुद्धपाणसंजायदेहबला ।। ३९६ ॥ आऊरियलायण्णा, चडिया तारुन्नए उदग्गम्मि । बाला बालमयारीविदेण जुया हरिम्मि गया ।। ३९७ ।। नियलीलाए गच्छंतएण रमणीयगयणमग्गेण । दिटठा य अन्नया चंडवेगनामेण खयरेण ।। तं बालं अवलोइय, तत्थेव ठिओ इमो तयासाए । परिचत्तदारघररिद्धिपरियणो रन्नदेसम्मि ।। ३९९ ॥ तीए अक्खित्तमणो, सीहगुहाए पसुत्तयं दर्छ । ता मज्झरत्तसमए, तं अवहरिऊण सो चलिओ ॥ ४०० ॥ गुहबहिदेसठिएण य, केण वि मोत्तूण घोरहुंकारं । रे रे जासि कहिं घेत्तुमेयमिय भणिय सो खलिओ ॥ ४०१ ॥ रुद्धा सव्वत्तो वि हु, दिसाओ सव्वाओ जेण देवेहिं । सोहम्मवासिदेवस्स अमरचूलस्स आणाए । ४०२ ॥ एसा तस्स उ भज्जा, जा ताओ नियाओ अक्खए चविउं । उप्पण्णा जयरायस्स पुत्तिया जयसिरिपियाए ॥ ४०३ सीहरह त्ति सुरेहिं, कयाभिहाणाइ कूरसत्ताण । मज्झे संवसमाणा, रक्खिज्जइ चरिमदेह त्ति ॥ ४०४ ।। ता एईए पायप्पणामकरणम्मि चेव अहिगारो । तुम्हारिसाण भो चंडवेग ! न उ अन्नकम्मम्मि ॥ ४०५ ।। नियभाउएण सद्धिं, उग्गतवं चरिय पाविही सिद्धिं । तत्थेव मुंच ता नियसेज्जाइ पवित्तमुत्तिमिमं ॥ ४०६ ॥ निद्दाखयं न वच्चइ, जाव इमीए तओ य सो खयरो । तव्वयणं काऊणं, निययट्ठाणम्मि संपत्तो ।। ४०७ ॥ देवेहिं इमा य पवित्तभक्खभोज्जेहिं पवरवत्थेहिं । साराभरणेहिं तहा, लालिज्जंती सुहेणेव ॥ ४०८ ।। कुसला सव्वकलासु वि, संजणिया जणणि-जणयरहिया वि । सहवासित्तेणेवं, तिरियाण वि वल्लहा जाया ॥ ४०९ इय सुणिऊण कुमारो, सीसम्मि कयंजली भणइ साहू । भयवं ! सिरिजयराया, जणओ जणणी जयसिरी य ॥ ४१० सीहरहा वि य भइणी, जेट्ठा मह आह मुणिवरो एवं । ता उठ्ठिऊण जणयं, जणणिं भइणिं च वंदेइ ॥ ४११
Jain Education International
For Private & Personal Use Only
www.jainelibrary.org
Loading... Page Navigation 1 ... 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 