Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 214

१८३
चंदप्पहजिणवण्णणं मिच्छत्ततिमिरमेवं पणासयं तेण भव्वकुमुयाण । पडिबोहो जिणचंदेण तेण उप्पाइओ झ त्ति ॥ ५६९३ ।। जइ वि न रुद्दसहावो तह वि सिवालिंगियस्स से तइया । विणयधणा संजाया वरगणवइणो गणे बहवे ॥ ५६९४ ।। एवं चउगइदारप्पवेसपरिहेण भव्वजीवाण । चउभेयमहव्वयरयणदायगेणं मुणिगणाण ।। ५६९५ ॥ चउविहकसायवणसंडदावजलणेण सयललोयस्स । चउविहधम्मकहा सुहमयंकेण परिसाए ।। ५६९६ ।। चउविहसुरगणलोयणभसलोलिनिवासचरणकमलेण । चउदिसविसालपंजरनिवासिजसरायहंसेण ॥ ५६९७ ।। चउमुहसीहासणसंठिएण चउदेहधारिणो तेण । चउरूवसमणसंघो संघडिओ पढमओसरणे ॥ ५६९८ ॥ एत्थंतरम्मि चंदाणणाइ नयरीए राउलाहिंतो । वज्जिरबहलाउज्जो गिज्जतो मंगलसएहिं ।। ५६९९ ।। एइ बली दुप्पलिखंडियाण बलवंततरुणिछडियाण । आढयपमाणकालोवमाण छक्खंडफुरियाण ॥ ५७०० ।। वरकमलतंडुलाणं निक्खित्ताणं सुवन्नथालम्मि । नच्चंतवरविलासिणिसत्थेणऽणुगम्ममाणाण ।। ५७०१ ।। पविसइ स पुव्वदारेण जाव एसो बली समोसरणे । भयवं पि धम्मदेसणकरणाओ ताव उवरमइ ॥ ५७०२ ।। देवा वि तत्थ गंधे खिवंति अच्चंतमणहरे तत्तो । सह पंचवण्णकुसुमेहिं गंधलुब्भंतभसलेहिं ।। ५७०३ ।। दावेऊण पयाहिणतिगं च तं जिणवरस्स तो पुरओ। विक्खिरइ तिन्नि वाराओ चंदराया सहत्थेण ।। ५७०४ ।। समुचियठाणनिवासं इच्छइ सव्वो वि एत्थ तेणेव । अक्खयठाणजिगीसाइ अक्खया गयणमुप्पइया ।। ५७०५ ।। जिणसेवागयसुरगणविसेससंकिण्णमच्चलोयाओ। जिणजसरासी अक्खयरासिमिसा जाइ सुरलोयं ।। ५७०६ ।। भूमीए अपत्तं चिय देवा गिण्हंति तस्स अद्धं च । भूमिगयद्धद्धं पुण रोया सेसं जणो लेइ ।। ५७०७ ।। एक्केक्कमवयवं जो पावइ सेस त्ति तं कलेऊण । सीसम्मि खिवइ से जेण सो हु सव्वामए हरइ ।। ५७०८ ॥ छम्मासब्भंतरओ अन्नो वाही य तप्पभावेण । कुप्पइ न कोवि नागो व्व नागदमणीप्पहयदप्पो ।। ५७०९ ।। सुरवइबाहुनिवेसियकरो य तो उठ्ठिऊण जिणनाहो । चलणो विनिवेसंतो सुरकयनवकणयकमलेसु ॥ ५७१० ।। रमणीयबीयपायारंतररइयम्मि देवछंदम्मि । संपत्तो वीसमिओ य तत्थ खेयावणयणत्थं ॥ ५७११ ।। एत्थंतरम्मि जेट्ठो गणहारी बीयपोरिसीए तहिं । सिरिचंदरायदावियमहरिहसीहासणनिविट्ठो ॥ ५७१२ ।। जह चेव जिणवरिंदो तहेव लोयाण देसणं कुणइ । संसयतिमिरविणासं वियरंतो दिवसनाहो व्व ॥ ५७१३ ।। केवलनाणुप्पत्तिं विणा वि साहइ असंखभवगहणे । न य अणइसओ जाणइ छउमत्थो एस भयवं ति ॥ ५७१४ ।। सव्वुक्कुसा सुयसंपयाओ जं गणहराण एत्तो उ । चोद्दसपुव्वी वि परे हवंति छट्ठाणवट्ठियाओ ।। ५७१५ ॥ अन्नं च अन्नलोएहितो एयाणणुत्तरा सव्वे । संघयणधिइबलाईगुणा पमोत्तूण तित्थयरं ।। ५७१६ ।। खीरासव महुआसवलद्धिजुया कोट्ठबुद्धिणो य इमे । संभिन्नसोयलद्धी पयाणुसारी य भयवंतो ।। ५७१७ ।। अन्नाहिं वि लद्धीहिं समन्निया किं च वन्निमो ताण । विहिणा जे सव्वगुणाण निम्मिया वासभवणं व ।। ५७१८ ।। जे जस्स जत्तिया खलु गणहारी हुंति तित्थनाहस्स । सव्वेसि ताणमेयं रूवं साहारणं नेयं ।। ५७१९ ।। आसन्नभव्वलोयाण एवमेसो वि देइ जिणदिक्खं । पडिबोहिऊण केसि पि सावगत्तं परेसिं च ।। ५७२० ।।