Book Title: Chandappahasami Chariyam
Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad
View full book text ________________
गंथपसत्थि
१९३
जे पाढंति पढंति भत्तिवसओ तित्थेसचंदप्पहे । वक्खाणंति सुणंति सुद्धमइणो वायंति एवं तहा ॥ ते लभ्रूण विसालसुद्धजसदेवच्चंतसोक्खट्ठिई । संपत्ता जिणधम्ममुत्तमनरा होउं वयंती सिवं ।। ५९७१ ।। इइ चंदप्पहचरिए (..........) जसदेवसारबिंबम्मि । सपसंगुद्दिद्रुत्थं दसमं पव्वं परिसमत्तं ।। ५९७२ ।। (गंथपसत्थि) इय चउवीसमतित्थंकरस्स तित्थम्मि अत्थि सुपसिद्धो । चंदकुले वरगच्छो ऊएसपुराओ नीहरिओ ।। ५९७३ ।। जो साहुरयणनिलओ गुरुसत्ताहिट्ठिओ समज्जाओ । जलहि व्व नदीण वई गंभीरो विबुहजणमहिओ ।। ५९७४ ।। उव्वहियखमो नरयंतकारओ तत्थ आसि विण्हु व्व । सिरिदेवगुत्तसूरी अवहत्थियदाणवारी वि ॥ ५९७५ ॥ सिद्धंतमहोयहिपारगेण पुरिसोत्तमत्तणं पहुणा । अखलियपयरणकरणेण अत्तणो जेण सच्चवियं ।। ५९७६ ।। सिद्धंतकम्मगंथाण जेण नाणाविहाणुओगपडा । सीसजणस्स हियट्ठा उद्धरिया जिणमयाहिंतो ॥ ५९७७ ।। जस्स य नवपयनवतत्तपयरणत्थस्स किं पि अवगम्म | अइधिट्ठिमाए अहमवि पत्तो तव्वित्तिगारपयं ।। ५९७८ ॥ सिद्धंततक्कलक्खणसाहिच्चविसारओ महाबुद्धी । तस्सासि पवरसीसो विक्खाओ कक्कसूरि त्ति ॥ ५९७९ ॥ चिइवंदणमीमंसा पंचपमाणी य दो विवत्तिजुए । भवियावबोहणत्थं विणिम्मिए जेण जिणमयओ ॥ ५९८० ।। तस्स वि अंतेवासी सुपसिद्धो सिद्धसूरिनामो त्ति । जाओ असावओ वि हु जो जुत्तो सावयसएहिं ।। ५९८१ ।। गग्गयचंदप्पहमाइसावए किंच जेण भणिऊण । रिद्धिसमिद्धा चउवीसजिणवराययणपरिगरियं ।। ५९८२ ।। अणहिल्लवाडवरपट्टणम्मि सिरिवीरनाहजिणभवणं । कारवियं विबुहमणो रमंत जिय सुरवइविमाणं ॥ ५९८३ ।। सिरिदेवगुत्तसूरी तस्स वि सीओ अहेसि सच्चरणो । तस्स विणेएण इमं आइमधणदेवनामेणं ॥ ५९८४ ।। उज्झायपए पत्तम्मि जायजसएव नामधेज्जेण । सिरिचंदप्पहजिणचरियमह कयं मंदमइणा वि ॥ ५९८५ ।। सिरिधवलभंडसालियकारविए पाससामिजिणभवणे । आसावल्लिपुरीए ठिएण एयं च आढत्तं ।। ५९८६ ॥ अणहिल्लवाडपत्तेण तयणुजिणवीरमंदिरे रम्मे । सिरिसिद्धरायजयसिंहदेवरज्जे विजयमाणे ।। ५९८७ ।। एक्कारसवाससएसु अइगएसुं च विक्कमनिवाओ । अडसत्तरीए अहिएसु किन्हतेरसिए पोसस्स ॥ ५९८८ ।। निप्फत्तिं उवणीयं च एयमिह देवगुत्तसूरिस्स । अंतेवासिम्मि गणं पालिते सिद्धसूरिम्मि ॥ ५९८९ ।। सुकवित्तपत्तनिम्मलकित्तीहिं असेससत्थकुसलेहिं । सोहियमिमं च गुणिगणजुएहिं सिरिवीरसूरीहिं ।। ५९९० ।। जीए पसाएण अविग्घमस्स पारंगओम्हि चरियस्स । सयलजणसलहणिज्जा सा जयउ सयावि सुयदेवी ।। ५९९१ ।। काऊण चरियमेयं च जं मए सुकयमज्जियं किं पि । तत्तो जिणचरियरओ होउ जणो सुणणकरणेहिं ।। ५९९२ ।। गंथग्गमिमस्स पुणो छ सहस्सा समहिया चउसएहिं । नायव्वा विउसेहिं गाहाइ सवायमाणेण ।।
मंगलं महाश्री मंगलमस्तु । संवत् १२१७ चैत्र वदि ९ बुधौ ।।छ।।
Jain Education International
For Private & Personal Use Only
www.jainelibrary.org
Loading... Page Navigation 1 ... 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 