Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 223

१९२
सिरिचंदप्पहजिणचरियं जइ वि न तित्थुच्छेओ केवलनाणीण जइ वि नाभावो । जइ वि हु चउनाणीण वि बाहुल्लं संसयहराणं ।। ५९४४ ।। तित्थप्पभावगाणं ठाणट्ठाणम्मि संभवो जइ वि । अपरिक्खलिओ जइ वि हु जायइ लोयस्स उवयारो ॥ ५९४५ ॥ तह वि हु अच्चब्भुय तग्गुणेहिं तह भावियं जयं सयलं । जह तम्मि अईए तक्खणे वि सुन्नं व संजायं ॥ ५९४६ ॥ बत्तीसं पि हु इंदा सोयभरा पूरिया वि तव्वेलं । जिणनाहतणुं होविंति सुरहिखीरोयनीरेण ॥ ५९४७ ॥ कप्पूरचुन्नसंमिस्सपवरगोसीसचंदणविलित्तं । पच्छा परिहाविंती पवरयरे देवदूसे य ।। ५९४८ ॥ सिवियारयणं च तओ रयणोहविणिम्मियं विउव्वित्ता । तत्थारोवंति तयं निन्नासिय दुरियसंघायं ।। ५९४९ ।। वरपारियायसंताणयाइ सुरतरुविसिट्ठकुसुमेहिं । दिव्वंसुयाइएहिं तत्तो विरयंति उल्लोयं ॥ ५९५० ।। ओमालिंति समंता पुणो विविहाहिं कुसुममालेहिं । उप्पाडिंति ससोया सुरपहुणो तयणु तं सिबियं ॥ ५९५१ ।। कालागुरुहरियंदणमाईहि य सारदारुनियरेहिं । रम्मं ति भूमिभाए कारिति चियंसु संठाणं ॥ ५९५२ ॥ संचलिया तयभिमुहं उच्छलिए दिव्वतूरनिग्घोसे । आहवणं च करितम्मि दूरवत्तीण लोयाण ॥ ५९५३ ।। रंभा तिलोत्तिमाई सुरवहुसंघम्मि विविहभंगीहिं । करणंगहाररुइरं च दिव्वनदृ कुणंतम्मि ।। ५९५४ ।। हाहाहूहू तुंबरुसुरेसु सरगाममुच्छणाणुगयं । जिणगुणथुइपडिबद्धं च गायमाणेसु करुणसरं ॥ ५९५५ ॥ मन्नुवसविवसविगलंतनयणजलसित्तवच्छवत्थम्मि । नरनारीलोयम्मि य उव्वहमाणम्मि गुरुदुक्खं ।। ५९५६ ।। ठाणे ठाणे निवडंतयम्मि गंधुक्कडे कुसुमवरिसे । पयरिज्जंते देवेहिं सारमणिमोत्तियगणम्मि ।। ५९५७ ।। संपत्ता तं ठाणं काऊण महूसवं तहिं रम्मं । आरोवंति चियाए देहं चंदप्पहपहुस्स ॥ ५९५८ ॥ अग्गिकुमारेहिं तओ खित्तो जलणो तहिं नियमुहेहिं । वाउकुमारेहिं विउव्विऊण वायंकओ पबलो ।। ५९५९ ॥ कुंभग्गसोयखेत्तं घयं महुं तत्थ तियसनिवहेहिं । दड्ढे सोणियमंसट्ठिएसु अट्ठीसु सेसेसु ।। ५९६० ।। गंधोदयवासेणं मेहकुमारेहिं तयणु झ त्ति चिया । विज्झविया देवगणा ताहे गिण्हंति अट्ठीणि ।। ५९६१ ।। दाहिणहणुयमुवरिमं लेइ हरी हेट्ठिमं च चमरिंदो । ईसाणो वामहणुं उवरिल्लमहोगयं तु बली ॥ ५९६२ ।। दंतहीणि उ सेसा सुरा सुरिंदासुरा य सव्वे वि । गिण्हंति चियारक्खं सिवसंतिकरिं च मणुयगणा ॥ ५९६३ ॥ सिवगमणमहामहिमं एवं काऊण जिणवरिंदस्स । सव्वे वि सुरिंदाई नंदीसरदीवमणुपत्ता ॥ ५९६४ ॥ पुव्वुत्तकमेण तहिं काऊणट्ठाहिया पवरमहिमं । सासयजिणभवणेसुं नियनियठाणाई तयणुगया ॥ ५९६५ ।। इय सत्त भवाणुगयं चरियं चंदप्पहस्स परिकहियं । जह विजयसिंहसूरीहिं भासियं नियमई एवं ।। ५९६६ ।। इत्थं च नियमईए वि किं पि जं वित्थरत्थमुवरईयं । परिकप्पिऊण तं मह खमियव्वं विउसवग्गेण ।। ५९६७ ॥ चंदणकंथादोसे जइ वि हु एवं पसज्जई को वि । सुयणपरिगाहणाए तहा वि सो पम्हुसेयव्वो ।। ५९६८ ॥ एत्तो च्चिय सुयणे विन्नवेमि कयउत्तमंगकरबंधो । उस्सुत्तं जमिह कयं तं सव्वं सोहियव्वं ति ॥ ५९६९ ॥ धम्मो जाव जिणिंदचंदभणिओ खेत्ते विदेहे सया । जा नंदीसरदीवसुंदरमही चेईहराहिट्ठिया । मेरूपंच वि दिव्वचूलकलिया माणुस्स खेत्तम्मि जा । ता चंदप्पहसामिचारुचरियं होज्जा महीए इमं ॥ ५९७० ॥