Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 221

१९०
सिरिचंदप्पहजिणचरियं
एवं च एत्थ पत्ता तह पाविस्संति जे य सिववसहिं । पत्तेयं ताण अहं पि चरियमक्खाउमसमत्थो ।। ५८८८ ।। परिमियआउत्तणओ कमभावित्तेण तह य वाणीए । अच्चंतबहुत्ताओ एएसिं महरिसीणं च ॥ ५८८९ ।। एत्तो च्चिय एस नगो सुपसिद्धो मन्नए महातित्थं । सत्तुंजओ य नामं इमस्स जायं अओ चेव ।। ५८९० ।। जम्हा जहित्थ जाओ होही य जणस्स भावसत्तुंजओ । न तहा अन्नत्थ अओ सच्चं सत्तुंजओ एस ।। ५८९१ ।। तित्थं च तं भणिज्जइ सुसमत्थं जं खु पंकहरणम्मि । कुणइ य दाहोवसमं तिसं च नासेइ नीसेसं । ५८९२ ॥ पंको य एत्थ पावं कलुसिज्जइ जेण एस जीवगणो । दाहो य कसाया कलयलेइ जरियं च जेहिं जगं ॥ ५८९३ ॥ विसयपिवासा उ तिसा जीए आवाहिया न याणंति । जीवा किच्चमकिच्चं पेयमपेयं च संसारे ॥ ५८९४ ।। एएसिं तिण्हं पि ह पवित्तखेत्तत्तणेण एस नगो । अवहरणम्मि समत्थो पसत्थतित्थं अओ एस ॥ ५८९५ ॥ नइमाईणं जो पुण समो विभागो दसव्वओ तित्थं । पंकाईणं वज्झाण चेव जं कुणइ खयमेसो ।। ५८९६ ॥ सिद्धो य एस अत्थो दव्वाईणं पि कारणं ताओ । कम्मोदयाइभावे पडुच्च जं भन्नए एवं ।। ५८९७ ।।
ओवसमोवसमा जं एत्थ कम्मुणो भणिया । दव्वं खेत्तं कालं भयं च भावं च संपप्प ।। ५८९८ ॥ इय कहियम्मि जिणिदेण तयणु जाया सहा समग्गा वि । हरिसभरनिब्भरंगी इमं च भणिउं समाढत्ता ।। ५८९९ ।। हिययाउ व अम्हाणं आयड्ढेऊण गणहरिंदेण । जं पुढें तस्सुत्तरमिह कहियं नाह तुब्भेहिं ।। ५९०० ।।
ण य तिजगुत्तमविहिओ गरुओ अणुग्गहो अम्ह । तित्थे जं पडिवत्ती जाया अइ निच्चला इम्हि ।। ५९०१ ।। धम्मं पडुच्च गरुओ विरिउल्लासो य अम्ह संजाओ। ता धम्मप्पडिवत्तिं उचियं कारवसु जिणनाह ! ।। ५९०२ ।। तीए तो परिसाए मज्झे चउजामधम्मपडिवत्तिं । कारवइ केसि पि जिणो सावगधम्मं च केसि पि ।। ५९०३ ।। केवलनाणुप्पत्तीए केइ तत्थेव मोक्खमणुपत्ता । सव्वट्ठसिद्धिमाइसु अन्ने पत्ता य तयभावे ।। ५९०४ ॥ भयवं पि भवियजणविमलपुन्नआगरिसिओ व्व अन्नत्थ । विहरइ तट्ठाणाओ नीसेसगुणेहिं लंकरिओ ॥ ५९०५ ।। चंदो व्व सोमलेसो तेएणं दिणयरो व्व दिप्पंतो । भुवणुब्भासिसरीरो जं जं भूमिं अलंकरइ ॥ ५९०६ ॥ जायइ तहिं तहिं चिय सुभिक्खमसमं जणस्स सोक्खं च । सयलोवद्दवविगमेण जणियजणनिवहचोज्जेण ।। ५९०७ ॥ अन्नं च दिणयरस्स व सव्वत्तो विप्फुरंतदित्तीहिं । जायं जिणस्स देहं छायारहियं पि सच्छायं ।। ५९०८ ।। सव्वोउयफलपुप्फेहिं रेहिरा विमलदप्पणतलं व । जाया मही वि रयरेणुवज्जिया जिणपभावेण ।। ५९०९ ।। सोहइ य पायजुयलं जणस्स नवविद्दुमारुणच्छायं । सरणपवन्नेण जिएण रागमल्लेण वा लीढं ।। ५९१० ॥ अट्ठासीइगणाणं अहिवइणो गणहरा वि से जाया । तत्तियमेत्ता तस्सेव नाइपडिबिंबरूवा ते ।। ५९११ ।। चोद्दसपुव्विसहस्सा दो च्चिय निम्मलगुणोह परिकलिया । अड्ढाइयलक्खा से सामन्नजईण परिमाणं ।। ५९१२ ।।
ओहिन्नाणीणं पुण अट्ठसहस्सा विसिट्ठलद्धीणं । मणपज्जवनाणीण वि एत्तियमेत्त च्चिय सहस्सा ।। ५९१३ ।। तीयाणागयपरिवड्ढमाणअप्पडिहयप्पयासाण । केवलनाणीण पुणो वियाणियव्वा दससहस्सा ।। ५९१४ ॥ चोद्दस चेव सहस्सा वेउव्वियलद्धिमंतसाहूण । सत्तसहस्सा वाईण समहिया छहिं सएहिं च ।। ५९१५ ।।