Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 220

चंदप्पहजिणवण्णणं
कोय इमो पवरगिरि दूरं जो रम्मयाइ अणुहरइ । चूलामंडियमेरुस्स सिहररायंतजिणभवणो || ५८६० ॥ तो भइ जिणवरिंदो गणहर ! जं पुच्छियं तए सुणसु । तं एक्कमणा होउं आसि पुरा एत्थ भरहम्मि || ५८६१ || तित्थयराणं पढमो उसभसिरी तस्स भरहनामो य । आसी जेट्ठो पुत्तो पढमिल्लो चक्कवट्टीण ॥ ५८६२ ॥ तस्स य पहाणतणओ उम्पन्नो उसभसेणनामो त्ति । बीयं च तस्स नामं विक्खायं पुंडरीओ त्ति ॥ ५८६३ || केवलनाणुप्पत्ती सोय निययस्स जणयजणयस्स । पढमम्मि समोसरणे पढमो च्चिय गणहरो जाओ || ५८६४ || केवलनाणेण जिणो अहन्नया जाणिऊण सिवगमणं । सेत्तुंज्जे निय सीसस्स पुंडरीयस्स महरिसिणो ॥ ५८६५ ।। लोयाणं वारं तस्स सयासाओ तह पभूयाणं । तत्तत्थहेउभूयं तं पेसइ एत्थ पवरनगे || ५८६६ || चोदसपुव्वी चउनाणसंजुओ वज्जरिसभसंघयणो । समचउरंससरीरो कुणमाणो भवियपडिबोहं ॥ ५८६७ || संसयघणतिमिरभरं नासंतो दिणयरो व्व लोयाण । भावसयसहस्सलक्खे भूयभविस्से वि भणमाणो ॥ ५८६८ ।। बहुपरिवारसमेओ सो इह पत्तो जिणिंद आणाए । उग्गतवचरणरुई उज्जुत्तो चरणकरणेसु ॥ ५८६९ ।। चउघाइकम्मवणगहणदहणपज्जलियवणदवसमाणो । एत्थेव सुरिंदनओ संपत्तो केवलं नाणं ।। ५८७० ।। पंचहि मुणिवरकोडीहिं संजुओ तयणु एत्थ चेव नगे । पडिवन्नो सेलेसिं खविऊणं सेसकम्माई ।। ५८७१ ।। सिवमय लमरुयमणुवममक्खयसोक्खेण संगयं निच्चं । सिद्धिगइनामधेयं पयं पवित्तं समणुपत्तो ॥ ५८७२ ।। एयं च वइयरं से नाऊण भरहरायवरचक्की । निव्वाणगमणमहिमं आगंतूणं करावेइ || ५८७३ || तयणंतरं च वरकणयरयणसोवाणपन्तिरमणीयं । ऊसियथंभसहस्सं कणयसिलाबद्धभूमियलं ॥ ५८७४ ॥ कारवियमइमणोहरमाइमदेवस्स एयमाययणं । समयं तेवीसाए जिणिदइंदाण भवणेहिं ॥ ५८७५ ।। एसा य पुंडरीयस्स निययतणयस्स सिवगइगयस्स । तेणेव रायपडिमा कारविया जिणसमीवम्मि || ५८७६ || वरपव्वओ वि एसो विमलगिरी नाम आसि विक्खाओ । सिद्धगए पुंडरिए पुंडरियनगो त्ति तो जाओ ।। ५८७७ ।। एवं च जं तए किर पुट्ठं तं सव्वमेव परिकहियं । अन्नं पि पसंगगयं कहिज्जमाणं निसामेसु ॥ ५८७८ ॥ जया पुंडरियरिसी सिद्धिपुरिं पाविओ तया चेव । भयवं पि उसभसामी अन्नदिणे इह समोसरिओ ।। ५८७९ ।। सधम्मदेसणाए तत्तो तेणवि पभूयलोयाण । मिच्छत्ततमं हरिऊण दंसिओ सिवपुरीमग्गो ।। ५८८० ॥ तेण य संचरिऊणं एत्थेव नगम्मि खवियकम्मचया । ते वि गया तं ठाणं जत्थ गओ पुंडरीयरिसी ।। ५८८१ ॥ नमिविणमी विज्जाहरचक्कवई आसि जे य वेयड्ढे । ते वि जिणस्स समीवे दिक्खं गहिऊण इह सिद्धा ॥ ५८८२ ॥ एवं जहेव एत्थं सिरि रिसहजिणो समोसढो पुव्विं । अजियजिणिदाई वि हु चेव सुपासपज्जंता ।। ५८८३ || एवं च कोडिलक्खा बहवे मोक्खं गया इह नगम्मि । एवइया कालेणं एस नगो तो महातित्थं ॥ ५८८४ ॥ अहयं पि समोसरिओ जहेह तह वीरनाहपेरंता । सव्वे समोसरिस्संति मोत्तुमेक्कं जिणं नेमिं ॥ ५८८५ ।। तापि हु तित्थेसुं जिणंतरेसुं च तित्थवोच्छेए । जे इह जाहिंति सिवं तेसिं पि पभूयकोडिंगणा ।। ५८८६ ।। अन्ने विजयपसिद्धा होहिंती रामपंडवाई जे । ते वि हु एत्थेव नगे सिद्धिगई पाउणिस्संति ॥ ५८८७ ॥
१८९