Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 218

चंदप्पहजिणवण्णणं
१८७
पप्फुल्लकमलकुवलयसयवत्तसहस्सपत्तकलियाओ। पुक्खरिणीओ तेसिं पि हुंति पुरओ सुरम्माओ ।। ५८०४ ॥ इय केत्तियं व कीरउ सिद्धाययणाण वन्नणं ताण । सुरखेयरे पमोत्तूण जेसु अन्नस्स नत्थि गमो ।। ५८०५ ।। संपत्ता नंदीसरवरम्मि दीवम्मि तेसु ते सव्वे । सुरवसभा पयमिते खेत्ते व्व निमेसमेत्तेण ।। ५८०६ ।। रयणावलिकणगावलिमुत्तावलिदेव्वदेववत्थेहिं । सयलेसु वि जिणभवणेसु कारिन्ति उल्लोए ।। ५८०७ ।। विहिएसु तेसु तेसिं जा सोहा तं च जइ परं सक्का । देव च्चिय वन्नेउं सा नियसत्तीए जेहिं कया ॥ ५८०८ ॥ कारिति तयणु सुरतरुविकासकुसुमेहिं फुल्लहरयाई । नाणाविहविच्छत्तीहिं दिव्वसत्तीए सयराहं ।। ५८०९ ।। खीरोयाइसमुद्दाण सिंधुगंगाइगुरुनईणं च । मागहतित्थाईण य जलाइं घेत्तूण तो झ त्ति ॥ ५८१० ।। सुसुयंधगंधजुत्तेहिं तत्तो करेंति न्हवणाई । सव्वजिणपडिमाणं जम्मे मेरुम्मि व जिणाण ॥ ५८११ ।। जलथलयदिव्वकुसुमेहिं तयणु विरयंति पवरपूयं च । नाणाविहभंगीहिं चारणसुरखयरकयतोसा ।। ५८१२ ।। विविहाउज्जे वायंतएसु देवेसु देवरमणीसु । करणंगहाररुइरं च दिव्वनट्ट कुणंतीसु ॥ ५८१३ ।। सरगाममुच्छणा ताण काललयमणहरं च वरगेयं । गायंतीसुं विज्जाहरीसु गंधव्वकुसलासु ।। ५८१४ ।। अट्ठाहिया महूसवमेवं अइमणहरं विहेऊण । नियनियठाणाई गया देविंदा पमुइया तत्तो ।। ५८१५ ॥ सिरिचंदप्पहजिणनायगो विहरइ कयाइ गामेसु । कइया वि मंडवेसु य कइय वि वररायहाणीसु ॥ ५८१६ ।। कइया वि विविहरयणागरेसु वरपट्टणेसु कइया वि । कइया वि कप्पडेसुं दोणमुहेसुं च कइया वि ॥ ५८१७ ॥ कइया वि हु नगरेसुं कइय वि खेडेसु कइय वि नगेसु । संवाहेसु य कइय वि कयावि वरगोउलाईसु ॥ ५८१८ ॥ कत्थ वि सुरनिम्मियसमवसरणसीहासणे समुवविट्ठो । कत्थ वि विज्जाहरभत्तिरइयसोवन्नकमलठिओ ॥ ५८१९ ॥ कत्थ वि वक्खाणेणं कत्थ वि पन्हत्तरप्पयाणेण | कत्थ वि हिययगयस्स वि संदेहस्सावणयणेण ।। ५८२० ।। कत्थ वि सामंताणं कत्थ वि गरुयाण नरवरिंदाण । कत्थ वि तयणुचराणं कत्थ वि वररायपुत्ताणं ॥ ५८२१ ॥ कत्थ वि महल्लयाणं कत्थ वि मंतीण गरुयबुद्धीण । कत्थ वि सत्थाहाणं कत्थ वि गुरुसेट्ठिमाईण ॥ ५८२२ ॥ कत्थ वि जरकलियाणं कत्थ वि तरुणाण कत्थ वि सिसूण । पडिबोहमुवजणंतो नासंतो गरुयमिच्छत्तं ।। ५८२३ ।। कस्स वि असेससावज्जविरइदाणेण पावदलणेण । कस्स वि सावगधम्मप्पयाणविहिणा विसिडेण ।। ५८२४ ।। कस्स वि सम्मत्तासेवणेण कस्स वि य भद्दगत्तेण । विरयंतो गरुयमणुग्गहं च सयलस्स वि जयस्स ।। ५८२५ ।। पत्तो सुरट्ठविसयं ठाणट्ठाणेसु जत्थ दीसंति । वणराइमणहराओ नईओ सुहरावलीओ य ।। ५८२६ ।। रत्तुप्पलपायाओ कुवलयनयणाओ कमलवयणाओ। वररायहंसगमणाओ चक्कवायत्थणीओ य ॥ ५८२७ ।। निम्मलकंतिजलाओ तिवलितरंगुल्लसंतसोहाओ। तरुणीओ व्व विरायंति जत्थ सरपंतियाओ य ॥ ५८२८ ।। ठाणे ठाणे दीसंति जत्थ नयराइं सरवराइं च । सवणाई सकमलाई कुवलयआणंदजणगाई ।। ५८२९ ॥ हिययं च पवरनगरोवमा हु गामा विसालरिद्धीए । नगराई देवलोओवमाइं इंद व्व रायाणो । ५८३० ।। वेसमणसमा तह सेट्ठिणो य सुरगुरुसमो य मंतियणो । कामोवमा य तरुणा सुरच्छराओ व्व रामाओ॥ ५८३१ ।।