Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 219

सिरिचंदप्पहजिणचरियं
जो य उवरुवरि निवसंतगामपट्टणमडंबसंकिन्नो । किन्नरनरविज्जाहरपरियरियपरसरमणीओ ॥ ५८३२ || रमणीयणमुहउवमिज्जमाणतामरसरुइरसरनियरो । सरनियरतीररेहिरकारंडवहंसचक्कोहो || ५८३३ || कोहाइदोसवज्जिय विहरंताणेयमुणिगणपवित्तो । वित्तोवहसियवेसमणनयररिद्धीगुणो दोसो || ५८३४ ॥ विहरतो तत्थ जिणो पच्छिमजलहिस्स तीरभूमिए । देवेहिं समवसरणे विहिए सीहासणनिविट्ठो ॥ ५८३५ ॥ धम्मका भयवं पभूयलोयस्स कुणइ पडिबोहं । लोया य तत्थ आसी पायं महुमज्जमंसरया ।। ५८३६ ।। जलहितडवासिणो जेण मीणमंसासिणो हवंति सया । निक्कारिमतक्करुणाइ तेण भयवं तहिं चेव || ५८३७ || तप्पडिबोहनिमित्तं अच्छइ बहुए दिणे तओ निच्चं । तप्पासे सुरविसरं इन्तं जंतं च दट्ठूण || ५८३८ ।। चंदप्पहजिणदेहप्पहा पयासं च तत्थ लोएहिं । चंदप्पहासतित्थं पकप्पियं भत्तिजुत्तेहिं ॥ ५८३९ ।। अन्नत्थ विहरियम्मिय जिणम्मि तो जलहिदेवयाए तहिं । रयणमई वरपडिमा रइया चंदप्पहजिणस्स || ५८४० ॥ विहियं च जिणाययणं अइरम्मं तत्थ तयणुलोओ वि । तप्पूयाइ निमित्तं तिक्कालमुवेइ निच्चं पि ॥ ५८४१ ।। चंदप्पासतित्थं एवं जायं जणम्मि विक्खायं । भयवं पि तओ वच्चइ सेत्तुंजनगे विसालम्मि ॥ ५८४२ ।। उल्लसिरसिहरनहराघणपायपइट्ठिया तरुवराली । जत्थ विरायइ सक्खंधकेसरासिंहपंतीया । ५८४३ ।। जो य वरकडयमंडियपायपयासंतकमलचक्कंको । जणजणियमणोहरगरुयचोज्जसिरिवच्छसच्छाओ || ५८४४ ।। विलसंतविविहसिरिफलसमूहपयडियपभूयउद्देसो | गरुयसिलायलवच्छो उत्तमपुरिसो व्व सहइ सया ।। ५८४५ ।। गयणयलमुल्लिहंताई जस्स सिहराई अमरखयराण । वारिंति संचरंताण उवरिगमणं व ईसाए || ५८४६ ।। वित्थिन्नयाइ पुहवि व्व जो य तुंगत्तणेण मेरु व्व । सग्गो व्व रम्मयाए पवित्तयाए मुणिवरो व्व ॥ ५८४७ ।। जस्स य कीलंतयाण सुरसिद्धखयरमिहुणाण । मणियरवो च्चिय पडिसद्दबिउणिओ कहइ ताण रसं ॥ ५८४८ ॥ जत्थ य गिरिकुहरपडंतविविहनिज्झरजलाण निग्घोसो । दुक्खं सुव्वइ आसन्नजलयगज्जि व्व पहिएहिं ।। ५८४९ ।। छाइयनियंबदेसा घणनिवहा जणियगिरियडा संका । वा सामं पि व कुव्वंति जत्थ जंता जलनिहिम्मि ॥ ५८५० ।। जम्मि य पयंडपवणुल्लसंत उड्ढमुहधयवडछलेण । सिवपयपहं व दावइ जिणसासणभत्तिमंताण || ५८५१ ।। उत्तुंगसिहरमच्चतमणहरं गरुयमंडवसुसोहं । सिरि रिसहजिणाययणं अणेयजिणपडिमआवासं ॥ ५८५२ || जणजणियमच्छेरयरूवा पडिमा य पुंडरीयस्स । दीसइ अपाडिहेरा वि जत्थ सुरपाडिहेरजुया ।। ५८५३ ।। जत् य कवडिजक्खस्स पेक्खए मंदिरं पिहं चेव । नीसेससंघदुरियावहारिणो संपयं पि जणो ।। ५८५४ ।। सिरिचंदप्पहसामी समोसढो तत्थ सुरनरसहाए । सधम्मदेसणं कुणइ जाव ता तत्थ गणहारी || ५८५५ ॥ पत्थावं लहिऊणं उवयारट्ठा सहाइ सयलाए । विणओणउउत्तमंगो पुच्छइ जिणपुंगवं एवं ॥ ५८५६ ।। परमेसर ! केण इमं मणोरमुत्तुंगसिहरराहिल्लं । कारवियं जिणभवणं विसालचामीयरसिलाहिं ॥ ५८५७ ।। पासट्ठियपउरजिणालएहिं नाणाविहेहिं परियरियं । पणवन्न रयणमइयाहिं विवहपडिमाहिं पडिपुन्नं ॥ ५८५८ ॥ कोवेस पुडंरीओ जस्सेसापरमरूवसंपुन्ना । सिरिरिसनाहबिबस्स सन्निहाणम्मि वरपडिमा ।। ५८५९ ।।
१८८