Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 222

१९१
चंदप्पहजिणवण्णणं अहिया असिइ सहस्सेहिं तिन्नि लक्खा हवंति अज्जाणं । वरुणाईणं सुविसुद्धचरणसंपत्तिजुत्ताण ।। ५९१६ ।। पन्नास सहस्सेहिं अहिया लक्खा य दोन्नि सड्ढाण । निम्मलसम्मत्तअणुव्वयाइवयनिरइयाराण ॥ ५९१७ ।। एक्काणवइ सहस्सा लक्खा चउरो य सावियाणं तु । तवनियमवयविसिट्ठाण विमलसम्मत्तजुत्ताण ।। ५९१८ ॥ परिवारसंपयाए एसा संखा य जा इहं भणिया । दट्ठव्वा सा परबोहियाइ जिणनायगेण सयं ॥ ५९१९ ।। जे पुण गणहरमाईहिं दिक्खिया साहुणो य अज्जा य । सावयमाई वि कया तेसिं संखा जिणो मुणइ ॥ ५९२० ।। एवं पुव्वंगाणं चउवीसाए तिमास अहियाए । अप्पडिपुण्णं लक्खं पुव्वाणं विहरिओ सामी ।। ५९२१ ।। केवलिपरियाएणं गामागरनगरमंडिय महीए । जुत्तो गणहरमाईण मुणिवराणं सहस्सेण ॥ ५९२२ ॥ अविरहियं जालामालिणीए तह वि जयदेवजक्खेण । सेविज्जंतो सेवय व्व पासेसु भत्तीए ॥ ५९२३ ॥ धम्मोवएसअमयप्पवाहसेएण भव्वसस्साई । वुड्ढि निंतो सम्मेयसेलसिहरम्मि संपत्तो ।। ५९२४ ।। जत्थ अईयजिणाणं परिवारसमन्नियाण सिद्धिगमे । देवेहिं थूलनिवहा विहिया रयणोहसोहिल्ला ।। ५९२५ ।। चेइयघराई जहियं च तुंगसिहराई ताई सिहराई । समसीसीए वुड्ढि गयाइं तस्सेव सेलस्स ॥ ५९२६ ।। ससहरकरसंगमसंगलंतचंदमणिनिज्झरजलाई । नच्चावंति मऊरे विणा वि जलयागमं जत्थ ।। ५९२७ ।। सूरमणिसूरकरजोगउग्गयग्गीविलग्गवणदावो। उल्लाविज्जइ निज्झरजलेहिं जहियं च पबलो वि ॥ ५९२८ ॥ देवा वि एक्करूवेण जस्स नाऊण वन्नण असत्तिं । निम्मलपडिबिंबच्छलेण जत्थ विरयंति बहुरूवे ।। ५९२९ ।। दळूण य जम्मि मणोरमत्तमिव मुणिवरा वि मोक्खकए । ठाणंतराइं चइउं कुणंति कालं समाहीए ।। ५९३० ।। सेलस्स तस्स को वन्नणम्मि सुरगुरुसमो वि होज्ज खमो। न मुयंति सिलाओ सुरा वि जस्स पियपणइणीओ व्व ॥ ५९३१ मासियतवेण तम्मि य भद्दवए किण्हसत्तमी दियहे । पडिमाइ ठिओ भयवं समन्निओ मुणिसहस्सेण ॥ ५९३२ ।। दसपुव्वलक्खपरिमाणजुत्तसव्वाउयक्खए धीरो । जोगनिरोहं पत्तो सेलेसी दिव्वकरणेण ।। ५९३३ ।। उवरयकिरियज्झाणग्गिदड्ढनीसेसकम्मवणगहणो । देहत्तयपरिचत्तो एक्केणं चेव समएणं ॥ ५९३४ ।। गंतुं अविग्गहेणं लोगंतं उड्ढमेव अक्खलिओ। सव्वजगुत्तमनिरुवमसासयसुहभायणं जाओ ॥ ५९३५ ॥ सड्ढसयधणुहमाणस्स पुव्वदेहस्स जो खलु तिभागो । तेत्तियमेत्तेणूणावगाहणो मुत्तिपरिहीणो ॥ ५९३६ ॥ सोऽणतनाणदंसणसुहवीरियसंजुओ विसुद्धप्पा । जम्मजरमरणरोगाइएहिं दुक्खेहिं परिहरिओ ॥ ५९३७ ।। साइअणतं कालं अप्पुणरावत्तिभावसंजुत्तो । सागारुवओगेणं निव्वाणमणुत्तरं पत्तो ।। ५९३८ ।। निव्वाणमुवगयम्मि य जिणम्मि चउरूवदेवसंघाया। चउविहसंघसमेया सोयभरावूरिया जाया ।। ५९३९ ।। देविंदाण विमाणमंदिरेसु तह कह वि सोयतमनियरो। पसरं पत्तो जह ते वि मोहिया तेण तक्कालं ॥ ५९४० ॥ अन्नं च राहुघत्थे रविम्मि दिवसं व रयणिनाहम्मि । अत्थमिए गयणयलं च रयणिकाले तमंतरियं ।। ५९४१ ॥ विज्झायपईवं मंदिरं व बहले तमंधयारम्मि । निद्दड्ढकमलसंडं व सरवरं सिसिरकालम्मि ॥ ५९४२ ॥ उम्मूलिय कप्पतरूं वइयरतरुकाणणं सुमूभीए । उव्वियणिज्जं जायं जयं पि जयनाहविहरम्मि ।। ५९४३ ।।