Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 203

१७२
सिरिचंदप्पहजिणचरियं जे वि हु विरोहिसत्ता ते वि पविट्ठा तहिं समोसरणे । न धरति वइरभावं पयइपसन्ना उ जायंति ।। ५३९७ ।। जिणमुहकमलनिवेसियदिट्ठी जिणभासियम्मि उवउत्ता। चिट्ठति पंजलिउडा विणओणयमत्थया सव्वे ।। ५३९८ बियम्मि य पायारे तिरिया तइए हवंति जाणाई । पायारबहिं व पुणो सुरनरतिरिइंत जंताई ॥ ५३९९ ।। नियनियठाणत्थेसु य एवं सुरमणुयतिरियलोएसु । जिणनाहसमोसरणे सुहपयरिसमणुहवंतेसु ॥ ५४०० ।। नीसेसमंगलनिही भयवं तेलोक्कबंधवो देवो । मोहंधयारसूरो सरणागयवच्छलो धणियं ।। ५४०१ ॥ कम्मवणगहणदहणो उल्लसियाणंतनाणसब्भावो । सिरिचंदप्पहसामी तित्थस्स नमो त्ति भणिऊण ॥ ५४०२ ।। अणुवकयपरहियरओ सव्वेसिं अमरनरतिरिक्खाण । साहारणवाणीए जोयणनिहारिणीए य ।। ५४०३ ॥ धम्मावबोहयाए जुगवं पि असेससंसयहराए । अच्चंतहिययपल्हायणीए सयलाण जंतूण ।। ५४०४ ॥ कयकिच्चो वि हु तित्थयरनामकम्मोदएण सो धम्मं । आइक्खिउमाढत्तो घणगज्जिरजलहिगहिरसरो ॥ ५४०५ ॥ तहा हि - भो भो सुरासुरनरा ! संसारे संसरंत जंतूण । कत्थ वि न अत्थि सोक्खं निच्चं दुक्खोहतवियाणं ।। ५४०६ ॥ ता जइ दुहनिव्विन्ना सुहमिच्छह तो सुहं समायरह । न हु सालिमभिलसंता वविति किर कोद्दवे केइ ।। ५४०७ ।। संसारे जह य सुहं तुच्छं दुक्खं अणोरपारं च । तह निसुणह भो भव्वा कहाछलेणं कहिज्जतं ।। ५४०८ । (अखलियपयावपसरनिवकहा -) अत्थि अलोयक्खेत्तस्स मज्झदेसम्मि पुरवरं रम्मं । भवचक्कं नामेणं सुपसिद्धं सासयावासं ।। ५४०९ ।। अखलियपयावपसरो राया नामेण कम्मपरिणामो । तं पालइ सयलजयत्तयं पि काऊण वसवत्तिं ।। ५४१० ।। तस्स य पहाणभज्जा अणाइभवसंतइ त्ति नामेण । तीसे य अट्ठ पुत्ता नाणावरणाइया पयडा ।। ५४११ ॥ बीया अकामनिज्जरनामा सा वि हु पसायठाणं से । अन्नदिणे नियपुत्ते एसो हक्कारिउं भणइ ।। ५४१२ ।। सुसमत्था सव्वपयोयणेसु तुब्भे महल्लयं च इमं । मह रज्जं ता पुत्ता कुणह जहा थिरं होइ ।। ५४१३ ।। एयस्स थिरत्तं पुण लोयथिरत्तेण होइ ता एसो। रज्जंतरेसु जंतो निज्जतो रक्खियव्वो त्ति ॥ ५४१४ ॥ ते बिंति ताय ! एवं काहामो किं तु नायगो अम्ह । किज्जउ कोवि तयाणाइ जेण सव्वत्थ वियरामो ।। ५४१५ ॥ तो भणइ पिया तेसिं तुब्भे च्चिय भणह जं करेमि पहुं । नियइच्छाए कए पुण विचित्तया तुम्ह संभविही ।। ५४१६ ।। तो नाणदंसणावरणअंतराया भणंति अम्हाण । पडिहाइ मोहराओ सव्वेसि इमो जओ बलिओ ॥ ५४१७ ।। तहा हि - ठिइबलमेयस्स च्चिय सहायबलमुत्तमं इमस्सेव । एयं चिय अम्हे वि हु अणुयत्तेमो सया चेव ।। ५४१८ ।। एत्थंतरम्मि वेयणियनामगोया भणंति जह तुब्भे । अणुयत्तह मोहं तह आउं अणुवत्तिमो अम्हे ।। ५४१९ ॥ मोहेव गए वि जओ अम्हे आउम्मि विज्जमाणम्मि । न हु फिट्टेमो क्खीणाउयम्मि होमो निराधारा ।। ५४२० ।। ताणमभिप्पायं तो लहिऊणं भणइ कम्मपरिणामो । मा विवयह भो तुब्भे सुणेह मह वयणमुवउत्ता ।। ५४२१ ।।