Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 209

सिरिचंदप्पहजिणचरियं
उक्कोसेणं सत्तर हुंति सागरसमाणनामाई । छट्ठीए तमपहाए सत्तरस जहन्नओ चेव ।। ५५५७ ।। बावीसं उक्कोसेण जाओ तमतमपहाओ सत्तमिया । बावीसई जहन्नेण तत्थ तेत्तीस उक्कोसा ।। ५५५८ ।। तत्तो वि उवरि न तरइ समयं पि समग्गलं विहेउं तो । एत्तियमेवाउ ठिझं काऊण ठिओ इमो तत्थ ।। ५५५९ ।। एयासु य नयरीसुं सत्तमनयरीए नामराएण। दो चेव पओलीओ कयाउ निग्गमपवेसत्थं ।। ५५६० ।। नरयतिरियाणुपुव्वी उ ताण नामाई तत्थ प्रढमाए । होइ पवेसो च्चिय निग्गमो य बीयाइ सयकालं ॥ ५५६१ ॥ एक्केक्क पओलीए दुगं पि नो लब्भए तहिं काउं । सिरिनामरायसुहडेहिं तो अच्चतरुद्देहिं ॥ ५५६२ ।। आयरिऊणं जम्हा तिरिमणुयगई महापुरीहिंतो । नरयाणुपुव्वियाए लोया खिप्पंति ते इहइं || ५५६३ ॥ तिरियाणुपुव्वियाए बीयपओलीए जे य एहिंति । निक्कालिज्जंति इओ ते तिरियगईए खिप्पंति ।। ५५६४ ॥ रयणप्पहाइयाओ च्छन्नयरीओ उ जाओ तासु पुणो । नरयतिरिमणुयअणुपुव्विनामियाओ पओलीओ ।। ५५६५ ।। पत्तेयं तिन्नि च्चिय तासु वि नरयाणुपुव्विनामाए । पुव्विं व पवेसो च्चिय दोहि य इयराहिं निक्कासो || ५५६६ || तत्थ वि जो जन्नयरीं निज्जिहीइ तस्स तयणुपुव्वीए । निक्कासो नयरीए कीरइ नामस्स सुहडेहिं ।। ५५६७ ।। रयणपहानयरीए, अन्नाइं वि संति अंतरपुराई । भवणवइवंतराणं देवगइपुरी अणुगाई || ५५६८ || तीए जओ बाहल्लं जोयणलक्खं असीइ अहिययरं । तत्थ य हेट्ठोवरि सहस्समेक्कमेक्कं च मोत्तूण ।। ५५६९ ।। भवणवईणं भवणाई संति वंतरसुराण पुण पढमे । उवरिल्ल च्चिय सहसे जोयणसयमुवरि हेट्ठा य ।। ५५७० ।। एक्केक्कं मोत्तूणं अट्ठसु मज्झिल्ल जोयणसएसु । भोमाई नगराई चिट्ठती महंति रम्माई || ५५७१ | एएसु य सव्वेसु वि हुंति पओलीओ तिन्नि तिन्नेव । नवरं तइया देवाणुपुव्विनाम त्ति नायव्वा ॥ ५५७२ ।। ती य पवेसो च्चिय मणुस्सतिरियाणुपुव्वियाहिं पुणो । नियनियगईसु वच्चंतयाण निक्कासणं चेव || ५५७३ || भवणवइवंतराणं आउयचिंता सुराउ पालाण | दोन्ह वि जहन्नओ दसवाससहस्साई विहियाई ।। ५५७४ ।। उक्कोसेणं भवणाहिवाण उत्तरदिसाइ मेरुस्स । जो बलिनामो सामी सागरमहियं ठिई तस्स || ५५७५ ।। दाहिणदिसा चमरो जो तस्स उ सागरोवमं एक्कं । सामन्नेणं दाहिणदिसाइ पलिओवमं सड्ढं ॥ ५५७६ ॥ उत्तरदिसिट्ठियाण उ दो देसूणाई हुति पलियाई । भवणवईणं एवं वंतरदेवाण पुण पलियं ॥ ५५७७ ॥ रयणपहाए जइ वि हु इमाई अंतरपुराई निवसंती । तह वि हु सुराउरायस्स आउ दाणा इह पहुत्तं ॥ ५५७८ ।। जेवि असायप्पमुहा साहेज्ज कए समागया तत्थ । नरयाउपालदेवस्स निययजणयाइ वयणेहिं ॥ ५५७९ ।। ते वि नियसत्तिसरिसं नरयगईलोयभेसणट्ठाए । पवियंभिउमाढत्ता निक्करुणं जह तहा सुणह ।। ५५८० ॥ परमाहम्मिय असुरा मिच्छादंसण अमच्च परिगहिया । चारित्तमोहपुत्तयकसाय तस्स हयराणुगया ।। ५५८१ ।। देवगइवरपुरीए पडिबद्धेसुं पुरेसु जे संति । भवणवइ भवणनामेसु रयणनयरीए मज्झे वि || ५५८२ ॥ वावारिऊण ते खलु असायउदओ महाभडो ताव । रयणाई नयरीसुं आइल्लासुं तिसु जणस्स || ५५८३ || च्छेयणभेयणकरवत्तफालणाई तहा करावेइ । जह तद्दुक्खेण अइदुत्थियस्स न सुहं खणद्धं पि ॥ ५५८४ |
१७८