Book Title: Chandappahasami Chariyam
Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad
View full book text ________________
७८
सिरिचंदप्पहजिणचरियं
पाएसु निवडिऊणं, ताहे मोयाविऊण अत्ताणं । भरहनरिंदाउ इमा, पव्वइया जिणसयासम्मि ।। २०१३ ।। भरहो वि रज्जलच्छि, अणुहवमाणो अहन्न दियहम्मि । चिंतइ न मज्झ भाउयवग्गो आणं पडिच्छेइ ॥ २०१४ ।। तो तेसिं आणागाहणत्थमहमुज्जमं लहु करेमि । इय चिंतिऊण मंतीण कहइ निययं अभिप्पायं ।। २०१५ ॥ तो तेहिं दिट्ठमेवं मंतणयं दूयवयणओ देव ! । सव्वे वि निययबंधू, मग्गावसु ताव रज्जाई ।। २०१६ ।। तो जइ रज्जाइं समप्पिहंति तो लट्ठयं अह न एवं । तो आणं गाहिज्जह, इय भणिए पेसई दूए ।। २०१७ ।। तेहिं वि ते गंतूणं, भणिया जह अप्पिणेह रज्जाई । भरहस्स संतिया अहव हविय पालेह रज्जाई ।। २०१८ ॥ तो ते भणंति गंतुं भणाहि भरहस्स एरिसं वयणं । तुम्ह वि अम्ह वि ताएण ताव दिन्नाई रज्जाई ॥ २०१९ ॥ तो एउ ताव ताओ, तं पुच्छित्ता भणिस्सई जं सो । तं काहामो अम्हे, होसु थिरो ताव कइवि दिणे ।। २०२० ।। इय भणिऊणं दूए, विसज्जिऊणं च भरहपासम्मि । सयमवि चलिया ते तायपायमूलम्मि अविसन्ना ॥ २०२१ ।। तइया य विहरमाणो, भयवं अट्ठावयम्मि सेलम्मि । सिरि उसभनाहसामी, समागओ तियसकयपूओ ।। २०२२ ।। ते तत्थ समोसरियं नाऊण जिणं समागया सव्वे । अभिवंदिऊण भत्तीए जिणवरं भणिउमाढत्ता ॥ २०२३ ॥ तुब्भेहिं पसायणं, जाई विइन्नाई ताय ! रज्जाई । अम्हाण ताई भरहो संपइ उद्दालइ हढेण ॥ २०२४ ।। ता ताय ! किं करेमो जुज्झेमो अहव तस्स अप्पेमो । रज्जाई ताई आइससु इन्हि जं अम्ह करणिज्जं ।। २०२५ ।। तयणु नियत्तियकामो, भोगेहिंतो जिणो भणइ एए । भो भो ! किंपागफलोवमेहिं किं तुम्ह कामेहिं ।। २०२६ ।। जओसल्लं कामा विसं कामा, कामा आसी विसोवमा । कामे य पत्थेमाणा अकामा जंति दोग्गई ।। २०२७ ।। केयारिसं च सोक्खं, कामेहिंतो हविज्ज जीवाण । चवलत्तणेण जे विज्जुविलसियाई विसेसंति ।। २०२८ ।। अन्नं च सद्दरसरूवगंधफासाण संगमे सोक्खं । जं जायइ जीवाणं, परव्वसं तं समग्गं पि ॥ २०२९ ॥ जह य च्चिय संबंधो, तेसिं सव्वाण होज्ज अणुकलो । तइया वि देहविहुरत्तणाइणा होज्ज दुहहेऊ ।। २०३० ।। तो ते भणामि पुत्ता, जइ सव्वं चिय सुहत्थिणो होउं । इच्छह रज्जं तो मुयह एय उवरिम्मि पडिबंधं ॥ २०३१ ।। जओदुक्खं चिय रज्जाओ, जं पत्ता पाणिणो न कस्सावि । निययस्स वि वीसासं, उवेंति जं भोयणाईसुं । २०३२ ।। तहा हि - न सुहं सुयंति न सुहं भमंति न सुहं रमंति कइया वि । न सुहं पिबंति न सुहं जेमंति परेसु कयसंका ।। २०३३ ।। जं चिय अपरायत्तं, जं चिय साहावियं सयाभावि । ता तम्मि चेव सोक्खे, जइयव्वं इह बुहेहिं सया ।। २०३४ ॥ मोत्तूण मुत्तिसुहं, जं पुण अन्नं न अत्थि एरिसयं । ता एय साहण च्चिय अपमाओ होइ कायव्वो ।। २०३५ ॥ संसारियाई सोक्खाई जाई ताई खु तत्तचिंताए । दुक्खसरूवाई दुहफलाई दुक्खाणुबंधीणि ॥ २०३६ ॥ एयारिसेसु वि इमेसु तह वि तित्ती न अस्थि जीवाणं ! । एत्थ वि निसुणह इंगालदाहगस्सेव दिद्रुतं ।। २०३७ ॥
Jain Education International
For Private & Personal Use Only
www.jainelibrary.org
Loading... Page Navigation 1 ... 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 