Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 171

१४०
सिरिचंदप्पहजिणचरियं
काऊण गब्भरक्खं सिरिहिरिमाईण देवयाणं च । दाउं तत्थ निओगं, सट्ठाणं सुरवरा पत्ता ।। ३६३५ ।। सिरि-हिरि-धिइमाईओ, देवीओ तयणु तीए गेहम्मि । विरयंति कंतिलायन्नमाइअच्चब्भुयगुणोहं ।। ३६३६ ।। देवीए गब्भस्स य कुणंति रक्खं तहा पयत्तेण । आराहिति य सययं अपमत्ता भत्तिविणएहिं ।। ३६३७ ॥ अन्ने वि देविदेवा जिणवरपुन्नाणुभावओ इंति । जे तत्थ केइ ते वि हु कुणंति रयणाइवुट्ठीओ ।। ३६३८ ।। दठूण इमं महसेणनरवरिंदो वि कारवइ सव्वं । मंगलकिच्चं देवीए गब्भसुहहेउभूयं ति ।। ३६३९ ।। सा पोमिणि व्व वररायहंसगब्भा विरायए अहियं । सुररायदंतिमज्झा, अहवा आयासगंग व्व ।। ३६४० ।। गिरिवरगुह व्व जइ वा पंचाणणपोयभूसियसुमज्झा । पुव्वदिसा वा जह उदयसेलअंतरियरविबिंबा ॥ ३६४१ ॥ तिजगुत्तमम्मि वरवेजयंतणुत्तरविमाणवासाओ। अच्चब्भुयपुन्ननिहिं गब्भावासं समोइण्णे ॥ ३६४२ ।। (विशेषकम्) तीसे सुहंसुहेणं गएसु मासेसु दोसु अन्नदिणे । तइए मासे जाओ दोहलओ चंदपियणम्मि || ३६४३ ।। तम्मि य अपुज्जमाणा झिज्जतं पासिऊण तं राया। आउच्छइ अन्नदिणे देवि किं दीससे विमणा ? ।। ३६४४ ।। एवं च पुच्छिया वि हु लज्जासंभारमंथरमुही सा । जाव न साहइ किंचि वि तेण निवो आउलीहूओ ।। ३६४५ ।। भणइ य पासगयाओ, से सिरिहिरिमाइयाओ देवीओ। साहेइ भयवईओ एवं किं दीसए देवी ।। ३६४६ ।। रक्खाकज्जम्मि समुज्जुयाओ देवीओ जेण इह तुब्भे । ता तुम्हं पच्चक्खं, विच्छायमुही किमेवमिमा ।। ३६४७ ॥ इय निववयणं सोउं, ताओ अह दिन्नओहिउवओगा । नाऊण देविदोहलसरूवमह बिंति रायाणं ॥ ३६४८ ।। चंदपियणम्मि जाओ, दोहलओ राय ! तेण देवीए । अस्सत्थया मणायं, दीसइ सोमालदेहाए । ३६४९ ।। एयम्मि य अत्थम्मी, उव्वेयं मा करेह मणयं पि । अम्हे च्चिय देवीए , एयं अत्थं घडिस्सामो ॥ ३६५० ।। इय भणिउं तीए च्चिय रयणीए दिव्वदेवसत्तीए । अवयारिऊण पेयाइ गयणओ सीयकरबिंबं ॥ ३६५१ ॥ तो पाइया सुहेणं देवी जाया पहलहियया य । गयणम्मि अंधयारं च दंसियं पच्चयनिमित्तं ।। ३६५२ ।। देवीए गब्भस्स य जं जं अन्नं पि किं पि सुहजणयं । तं तं कुणंति देवीओ सव्वमभिओगजुत्ताओ ।। ३६५३ ।। महसेणनरिंदस्स वि जिणावयाराणुभावओ रज्जं । सयलं पि वद्धमाणं जायं जणजणियगुरुहरिसं ।। ३६५४ ॥ तो मंगलेक्कनिलयं, तिजयस्स वि जिणवरं धरतीए । गब्भम्मि लक्खणाए देवीए जंति नव मासा ॥ ३६५५ ।। अट्ठमदिवसेहिं समग्गलासयलसुहविणोएहिं । ऊसवमय व्व सम्मयमय व्व सुहपयरिसमय व्व ॥ ३६५६ ॥ (जुयलं) पत्ते य पोसमासस्स पढमपक्खम्मि बारसतिहीए । पुव्वावररत्तंतरकालम्मि सुहे मुहुत्तम्मि ॥ ३६५७ ।। अणुराहानक्खत्तेण संजुए ससहरम्मि सुरपुज्जे । मुत्तिगए उच्चट्ठाणवत्तिएसुं सुहगहेसु ।। ३६५८ ॥ लागे सुपसत्थगुणुज्जलम्मि सयलस्स तिहुयणस्सावि। परमाणंदनिमित्तं अह देवी जणइ वरपुत्तं ॥ ३६५९ ॥(विशेषकम्) तित्थयरमाउयाओ उ हुंति सव्वाओ छन्नगब्भाओ। न य तासि पसवकाले, थेवा वि हु वेयणा होइ ।। ३६६० ।। जररुहिरकलमलाणि य पडंति जम्मम्मि नो जिणिंदाणं । जायइ य सयललोए, उज्जोओ जणियजणचोज्जो ॥ ३६६१ ।। जाए सुहंसुहेणं अओ जिणिंदम्मि तक्खणा चेव । आसणकंपो जाओ, अट्ठण्ह दिसाकुमारीण ।। ३६६२ ।।