Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 181

१५०
सिरिचंदप्पहजिणचरियं
ठिइपडियं पढमदिणे, तइयम्मि य चंदसूरदसणयं । छट्ठम्मी जागरियं, एमाइ तहा करावेइ ।। ३९१५ ॥ पत्ते य बारसाहे, जं चिय निव्वत्तियम्मि जम्ममहे । चंदप्पहो त्ति नामं पइट्ठियं देवराएण ॥ ३९१६ ॥ तं चिय महाविभूईए निययसुहिसयणबंधुपच्चक्खं । अम्मापिऊहिं दिन्नं से नाम पभणिउं एवं ॥ ३९१७ ।। चंदपियणम्मि जणणीए दोहलो जं च चंदसमदित्ती । ता होउ अम्ह पुत्तो, एसो चंदप्पहो नाम ॥ ३९१८ ॥ (विसेसयं) हरिखित्ते पवरपिऊसपोग्गलं निययहत्थअंगुठें । आसायंतो भयवं, अहिलसइ न माउथणपाणं ।। ३९१९ ।। वज्जरिसभनाराए वर्सेतो पढमसारसंघयणे । संठाणे समचउरंसनामए असमबलविरिओ ॥ ३९२० ।। निम्मलफलिहुज्जलकंतिमावहतो समग्गदेहस्स । चंदो व्व सोमलेसो, देइ दिट्ठि लोयनयणाण ।। ३९२१ ।। अवि य - अस्सेयमरयगरुयं सुगंधिगंधं सहावओ चेव । देहं पलोयमाणा, जस्स न तित्तिं लहंति जणा ॥ ३९२२ ।। गोखीरहारसरिसं, रुहिरं मंसं च जस्स निव्विस्सं । आहारा नीहारा दीसंति न मंसचक्खुहिं ।। ३९२३ ।। वियसियसोगंधियगंधपसरवि जई य जस्स नीसासो । अट्ठहियसहसलक्खणधरस्स किं वन्निमो तस्स ॥ ३९२४ ।। (विसेसयं) सो धवलपक्खपडिवयससि व्व अणुवासरं पवड्ढंतो । वित्थारइ जणनयणाण ऊसवं अहियमहिययरं ॥ ३९२५ ।। रामिति सुरकुमारा समेच्च तं सुंदराहिं कीलाहिं । वारजणहिययपल्हायणीहिं वरकंडुयाईण ॥ ३९२६ ।। पयइ च्चिय इह जइ गहगणस्स गयणंगणम्मि संचरणं । तह बालस्स वि कीलाकरणम्मि सणेह चवलत्तं ॥ ३९२७ ॥ तिन्नाणोवगओ वि हु, अन्नह पागयजणो व्व कह भयवं । तम्मज्झठिओ कीलइ, बालविणोएहिं तक्कालं || ३९२८ ॥ (विसेसयं) वियरंतो सो कुट्टिममहीसु परियणकरंगुलिविलग्गो। रुइररुई मंदगमो सरसीसुं सहइ हंसो व्व ।। ३९२९ ॥ बंधण कराओ करं कतिल्लो सहइ संचरतो य। अवियाणियमोल्लो वाणियाण रयणायरमणि व्व ॥ ३९३० ॥ सक्कगिराए धणओ, से परिहइ सव्वमाभरणगाई । मणिमुद्दाकडगाई, बालत्तणसमुचियं जमिहं ॥ ३९३१ ॥ पुत्तसमीवं देवे, इंते जंते तहा पणिवयंते । दटुं महसेणनिवो, अह चिंतइ विम्हयाउलिओ ॥ ३९३२ ।। धन्नो हं जस्स महं. महंतदिप्पंतकिरणवित्थारो । पन्निमससि व्व जाओ जाओ भूवणत्तयाणंदो ॥ ३९३३ ॥ जाए इमम्मि मज्झ वि देविंदा बंदिणो व्व संजाया । देवा य किंकरा इव देवीओ चेडियाओ व्व ॥ ३९३४ ॥ ता अच्चब्भुयमेवं एत्थ जए निययकालपरिणामो । तं किं पि वत्थु जायइ मणवायागोयरो जं न ॥ ३९३५ ॥ जओ के अम्हे ताव इहं, को वा अम्हाण जोग्गया जीए । एरिस पुत्तुप्पत्ती, मरुकप्पलओवमा जाया ।। ३९३६ ॥ अहवा किमेत्थ चित्तं, किं कद्दमओ न होइ उप्पत्ती । तामरसस्स पवित्तुत्तमंगसंगे समुचियस्स ॥ ३९३७ ।। किं वा वि असुइमलमुत्तमाइजंबालकइयदेहाओ । लोयालोयपयासं, पावइ नो केवलं जीवो ।। ३९३८ ।। तिसिओ व ता सरवरं रंको ञ्च अणिड्ढियं निहिं लद्धं । चंदप्पहपुत्तमिमं सुहेक्कठाणं अहं जाओ ॥ ३९३९ ॥ एमाइ पहरिसुक्कलियसंकुलो पाविउं निवो पुत्तं । पुन्निदं पिव जलही न माइ नियए वि अंगम्मि ॥ ३९४० ।।