Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 191

१६०
सिरिचंदप्पहजिणचरियं
कह कह वि मोइऊणं हढेण वच्चंति अन्नमग्गेण । अइवेगसमुप्पाइयसुरंगणा चित्तसंखोहा ।। ५०८२ ।। कस्स व सुरस्स सीहो कंठे कयरणझणंतमणिमालो । गयणयलमक्कमंतो विसालफालेहिं दठूण ।। ५०८३ ।। गयसेन्नमन्नदेवस्स गहिरगुंजारवेण तासेइ । दीसंतं खेयरसुंदरीहिं भयतरलदिट्ठीहिं ।। ५०८४ ॥ दतॄण झ त्ति फलिहच्छभित्तिसंकंतमच्छभल्लस्स । पडिबिंबमवरसुरवाहणस्स सुरसुंदरी का वि ।। ५०८५ ।। दिव्वविमाणठिया वि हु नियपियमालिंगिऊण भयभीया। न मुणइ भणइ य वारसु पिययम ! इंतं मह विमाणे ॥ ५०८६ आयासिंतो नियहरिणमंबरे पवणवच्चमातुरियं । एसोऽहमेत्थ अग्गी समागओ तुज्झ वरमित्तं ॥ ५०८७ ।। जम ! खमसु तुम वि महिसम्मि तुज्झ रइओ रएण जो इमिणा । वसहेण मज्झ दारुणविसाणघडिओ त्ति भणइ हरो॥ ५०८८ जावेस तुज्झ मयरो नियसुंडाए सदेहसंतावं । अवहरइ अवकिरंतो सलिलतुसारे नवघणो व्व ॥ ५०८९ ।। ता होसु मह समीवे वरुण ! तुम जासि कीस दूरयरं । उत्तरदिसाए सामी वेसमणो तुह समीवगओ ।। ५०९० ।। किं न मुणसि वइरो देवि तुह पासमागयं नेहा । चक्केसरि ! जमुवेक्खसि संगामं नागगरुडाणं ॥ ५०९१ ॥ अच्चुत्ते खलसु रयं तुरयस्स नियस्स संकडनहम्मि । वेगो विसालमग्गे परिक्खियव्वो किमेत्थं ति ।। ५०९२ ।। जालामालिणिदेवी अहिट्ठिओ जेण वच्चए पुरओ । एसो महाबलो पुरगयाण मलणो महामहिसो । ५०९३ ।। विउलऽवयासे वि नहो सुरासुराणं अपरिमियबलेहिं । कयसंकडम्मि जाया अन्नोन्नं एव माला वा ।। ५०९४ ।। तहा - बहुविहवाइत्तसमूहसंभवो गहिरगाढनिग्घोसो । अंबरमापूरितो समुट्ठिओ कह वि तह बाढं ।। ५०९५ ।। नीसेस दिग्गयाण वि आहोडतो व्व वसणविवराई । जह जणइ अयंडे च्चिय संखोहं तिहुयणस्सावि ।। ५०९६ ।। (जुयल) एक्कं पि अणंतगुणं जं जायं घणपयत्थभेएण । तं गयणंगणमवगहिऊण पत्ता सुरा नयरिं ।। ५०९७ ।। सुरअसुरखयरनरवरमणे सुकयगरुयपहरिसुक्करिसे । किंनरकलगेयरवो उच्छलिओ तत्थ रमणिज्जो ।। ५०९८ ।। अवि य - अच्चब्भुयभुवणत्तयसंपाइयगरुयविम्हउक्करिसा । पयडप्पभावनिम्मलसंभावियसयलसिद्धितरा ।। ५०९९ ।। ते धम्मचक्कवट्टी जयंतु जाणं गुणोहरज्जूहिं । आयड्ढिया सुरिंदा वि किंकरत्तं करतेवं ।। ५१०० ॥ एवं पभणंतेहिं नयरीलोएहिं वरविमाणाई । देवाण दिवाउ पलोइयाइं अह ओवरंताई ॥ ५१०१ ।। (विसेसयं) सा चंदउरी एत्थंतरम्मि देवासुराइसंचलिया । तिहुयणसंवासधरा संजाया माणुसपुरी वि ।। ५१०२ ॥ अहवा केत्तियमेत्तं एवं जं जिणवराणुभावाओ । अब्भहियसिरीओ संभवंति सयलस्स वि जयस्स ।। ५१०३ ।। एयम्मि अंतरम्मी पाउसमेहो व्व कासयजणेहिं । पडिबोहकरो अहवा संपुन्नससि व्व कुसुमेहिं ।। ५१०४ ।। रयणाई संपुन्नो निहाणकलसो व्व अधणपुरिसेहिं । सीयलसुसाउसलिलो दहो व्व मरुतिसियपहिएहिं ।। ५१०५ ।। कप्पियफलओ कप्पडुमो व्व अच्चंतदुत्थियनरेहिं । इच्छिय पसायदाया सामि व्व सुसेवयजणेहिं ।। ५१०६ ॥ दिट्ठो तिहुयणसामी सक्केहिं सुरासुरोह कलिएहिं । तिजयब्भुक्खणकलसो व्व संति जणणम्मि चंदाभो ।। ५१०७ (कलापक)