Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 170

१३९
चंदप्पहजिणजम्मवण्णणं जलनिहिपलोयणाओ, गंभीरो णंतनाणनिलओ य । एही विमाणवासाओ एत्थ स विमाणदंसणओ ।। ३६०९ ।। रयणुच्चयदंसणओ, निम्भलगुणरयणरासिआवासो । वासवपुज्जो दहिही, सिहिणा उण सयलकम्मवणं ।। ३६१० ।। एए चोद्दस सुमिणे, जइ वि हु किर चक्कवट्टिजणणी वि । पासइ तहा वि होही, तुह पुत्तो धम्मवरचक्की ॥ ३६११ ।। पुव्वं पि तए सिढें, मह पुरओ जेण मह सयासम्मि । देवीओ इंति बहुहा, दंसंति य किंकरित्तं च ।। ३६१२ ।। जच्चो य रयणरासीहिं पूरियं सव्वओ वि नियगेहं । पासामि अहं सुंदरि ! छम्मासा आरओ चेव ॥ ३६१३ ।। अच्चंतपुन्नपयरिसमाहप्पं एरिसं न अन्नस्स । संभवइ सुमुहि ! मोत्तुं तित्थयरं तिजगविक्खायं ।। ३६१४ ।। मा काहिसि संदेह, ता तुममेत्थं मयच्छि ! मह वयणे । अन्नं च मए निसुयं, पुव्वं पि हु केवलिसयासे ।। ३६१५ ।। जह लक्खणाए देवीए तुज्झ पुत्तो जिणेसरो होही । नीसेसतिहुयणस्स वि नमणिज्जो अट्ठमो भरहे ।। ३६१६ ॥ ता चलइ मेरुचूला वि कह वि न उणो ममं इमं वयणं । सुमिणावलीए विवरणमेयं ता अवितहं मुणसु ।। ३६१७ ॥ तं सव्वमंगलनिही नवरं जाया इमेहिं सुमिणेहिं । कल्लाणि ! जे सयं चिय तुमए दिट्ठा सुहसरूवा ।। ३६१७(अ) । अन्नो वि जो सुणिस्सइ पढिस्सए वा इमं सुमिणमालं। हियइच्छियाई लहिहि सो वि हु उवहणियविग्घभरो।।३६१८।। (जुयल) फलममलमिमं सुमिणावलीए सुणिऊण पियसमीवम्मि । हरिसभरनिब्भरंगी अह भणइ पुणो वि पइमेवं ।। ३६१९ ।। इच्छियपडिच्छियं मे, तुह वयणं सव्वमेव नाह ! इमं । एवं चिय संजायउ अइरा तुम्ह प्पसाएण ॥ ३६२० ।। इय भणिरी रहसुग्गयरोमंचं कंचुयं व देहम्मि । धरमाणा परमपमोयभायणं कह वि तह जाया ॥ ३६२१ ॥ ' जह गोयरं न पत्ता वाणीण महाकईण वि तया सा । अहव अहिलसियलाभासाइ वि भण कस्स न पमाओ।।३६२२ ।। (जुयल) बहुमन्नियपइवयणा एवं खणमच्छिऊण तप्पासे । काऊणं च पणामं वच्चइ सा निययमावासं ।। ३६२३ ॥ एत्थंतरम्मि आउक्खयम्मि चविऊण वेजयंताओ । चेत्तस्सबहुलपंचमिनिसाए अणुराहनक्खत्ते ।। ३६२४ ॥ देवीए लक्खणाए कुच्छीए सयललक्खणोवेओ। सिरिपउमनाहदेवो अवयरिओ सुहमुहुत्तम्मि ।। ३६२५ ॥ अवयरिए गब्भम्मि य तम्मि महापुन्नजोगओ तस्स । तह कह वि तिहयणम्मि वि संजाओ झ त्ति संखोहो ॥३६२६ ॥ जह सयलसुरवरिंदा सममसुरिंदेहिं नरवइगिहम्मि । आगंतूणं विरयंति चवणकल्लाणमहमहिमं ।। ३६२७ ।। तहा हि - पहयपडुपडहमद्दलरवसमतालं पणच्चमाणेहिं । मणहारि वेणुवीणासरं च तह गायमाणेहिं ॥ ३६२८ ।। खणमेत्तं पेक्खणयं काऊणं जणमणोहरं तत्थ । जिणजणणीए गुणसंथुई य पच्छा कया एवं ॥ ३६२९ ।। भुवणत्तयस्स तिलयं निलयं नीसेसनिम्मलगुणाणं । कुच्छीए धरतीए नमो नमो देवि तुह होउ ॥ ३६३० ।। तुह चेव सलहणिज्जो, इत्थीभावो जयम्मि सयलम्मि । मणुयत्तं पि सुलद्धं मन्नामो देवि ! तुह चेव ॥ ३६३१ ।। जीसे तुह कुच्छीए , सिप्पीए मेहवारिबिंदु व्व । अवयरिओ किर भयवं विसिट्ठमुत्तामयसरीरो ।। ३६३२ ।। ता तुज्झ चेव छज्जइ, असेसमहिलाण मज्झयारम्मि । महसेणनरिंदकओ, पट्टमहादेविसद्दो त्ति ।। ३६३३ ॥ एवं थुणिऊण तओ मुयंति पणवन्नकुसुमवरवुदिछ । सहिरन्नरयणवुट्ठीए संजुयं जायमणतोसा ।। ३६३४ ।।