Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 178

चंदप्पहजिणजम्मवण्णणं
१४७
सीया सीओयाणं, नरनारीकंतगंगसिंधूण । रत्तारत्तोयाणं, रोहिय तह रोहियंसाणं ॥ ३८३१ ।। हरियाहरिकंताणं, सरियाणं कणयरुप्पकूलाणं । पउमाईण दहाणं, अन्नेसिं वा वि सरियाणं ।। ३८३२ ।। सव्वोसहीहि वरचंदणेण गंधेहिं सुरहिवासेहिं । मीसीकएणमइमहुरमघमघायंतगंधेणं ॥ ३८३३ ।। महुरेण मणहरणेणं, सच्छेण सुनिम्मलेण धवलेण । नासापेएण व निम्मलेण सलिलेण भरिएहिं ।। ३८३४ ।। पढममइएहिं मइसुंदरेहिं पउमपिहाणेहिं कणयकलसेहिं । मालइमालुम्मालियसयलपएसेहिं सव्वेहिं ।। ३८३५ ।। पच्छा रुप्पमएहि, मणिमयकलसेहिं रुप्पकणगेहिं । कणगमणिनिम्मिएहिं, मणिरुप्पमएहिं रइएहिं ।। ३८३६ ।। मणिरुप्पसुवन्नेहिं, पुढविविणिम्मवियदिव्वकलसेहिं । तत्तो भिंगाराणं अट्ठसहस्सेण पवरेण ॥ ३८३७ ।। न्हवइ सुरिंदुच्छंगे, नरिंदचंदिंदनमियपयकमलं । (...................
..........) । ३८३८ ॥ एत्थंतरम्मि देवावुजं वायंति चउपयारं पि । गायंति चउविहं पि य नच्चंति चउप्पयारं पि ।। ३८३९ ।। बत्तीसइ बद्धाई समयं दंसंति नाडयाई पि । अन्नं पि एवमाई, मणोहरं कोउगाईयं ।। ३८४० ॥ एगे सुवन्नवास, हिरन्नवासं च रयणवासं च । अन्ने उ वइरवासं अन्ने आभरणवासं च ॥ ३८४१ ।। केइ वि पुप्फप्पयरं, पत्तप्पयरं च फलनिवायं च । अवरे उ बीयवासं, अवरे गंधाणि वासं च ॥ ३८४२ ।। वग्गति तत्थ एगे, अवरे हयहेसियाई कुव्वंति । अवरे हु सीहनाय, अवरे तिवई पि छिंदति ॥ ३८४३ ।। अप्फोडंति य एगे, अवरे वासंति के वि गज्जंति । अवरे उ पायदद्दरमवरे रहघणघणाइययं ।। ३८४४ ।। हक्कारं पोक्कारं, भूमिचवेडं च के वि दलयंति । देवि कहक्कहमन्ने. हेवक्कलियाइमन्ने उ ॥ ३८४५ ॥ एवं सुंदररूवे रूवक्खित्तामरिंदसंदोहे । देहदुहामयमुक्के मुक्काहारे वि समणुन्ने ॥ ३८४६ ।। वट्टते पवरमहूसवम्मि तित्थाहिवस्स जम्मम्मि । नयणमणाणंदयरं, कुणंति सव्वं पि देवगणा ।। ३८४७ ॥ ण्हवियम्मि जिणवरिंदे, मिउणा वत्थेण लूहियसरीरे । गोसीसचंदणेणं, विलित्तगत्तं पि सव्वत्तो ।। ३८४८ ॥ पउममहापउमाणं, तेगिच्छीकेसरीण हरयाणं । सीयासीओया, दह पुंडरिमहपुंडरीयाणं ।। ३८४९ ।। सव्वेसिं विजयाणं, कुलगिरिवासहरपव्वयाणं च । नंदीसरवावीणं, वेयड्ढाणं पि सव्वेसिं ॥ ३८५० ।। पाडलमल्लियचंपयअसोगपुन्नागनागबउलेहिं । सयवत्तकुंदमालइवेइलनेवालियाईहिं ।। ३८५१ ॥ कुसुमेहिं य पउमेहि य सयवत्तेहिं सहस्सवत्तेहिं । विरएइ पवरपूयं, विचित्तकुसुमेहिं देविंदो ।। ३८५२ ।। धूवकडच्छयहत्थो, धूवं दाऊण मघमघायंतं । आयाहिणाओ तत्तो पदक्खिणीकरिय तिक्खुत्तो ॥ ३८५३ ।। दप्पणभद्दासणवद्धमाणवरकलसमच्छसिरिवच्छे । सत्थियनंदावत्ते काऊणं अट्ठ मंगलए ॥ ३८५४ ॥ भत्तिभरनिब्भरंगो धरणियलनिहित्तजाणुकरसीसो । अभिवंदिऊण पाए, चक्कंकुसलक्खणे थुणइ ।। ३८५५ ।। जय सयलमंगलालयमालइमाल व्व विमलवरसील! | जय पुन्नविडविनिम्मियसउणगणाणंगतावहर ! ॥ ३८५६ ।। हरिसियभवियविलोइय, लोइयलोउत्तरेस जयनाह ! । जय सिवकारण कारणकारुणिय जिणिंद इंदनय ! ।। ३८५७ ।। जय संचारमहोयहिनिमज्जमाणंगितारणसमत्थ । अत्थत्थिजणमणोहरमणोरहापूरणेक्करस ! ।। ३८५८ ॥
१२