Book Title: Chandappahasami Chariyam
Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad
View full book text ________________
११०
सिरिचंदप्पहजिणचरियं
तेत्तीससागराई उक्कोसेणं सहति गुरुदुक्खं । उड्ढमहो तिरिय चिय भिज्जंता कंटएहिं सया ॥ २८४६ ।। इय केत्तियं व भन्नउ नरगगईवन्नणं महाराय ! | पत्थुयवत्थु सुणिज्जउ जं जायं धरणिकेउस्स ।। २८४७ ।। तइयाओ पुढवीओ उव्वट्टो निययआउयखएण । सो धरणिकेउराया समागओ तिरियजाईए ॥ २८४८ ॥ रम्मम्मि वणे एगम्मि विविहवणराइसहसरमणीए । पउरजलासयकलिए उप्पन्नो हत्थिभावेण ॥ २८४९ ।। कालक्कमेण जोव्वणपत्तो जाओ महंत जूहवई । करिणीजूहेण समं अभिरमइ विचित्तकीलाहिं ।। २८५० ।। तं दठूण सहरिसं वणयरनिवहा कुणंति से नामं । वणकेलि त्ति जहत्थं वणलीलावल्लहत्तेण ।। २८५१ ।। एवं च ताव एवं इओ य जो सो वसुंधरो नाम । पुट्विं महंतओ से पच्छा वि महंतओ होउं ।। २८५२ ॥ सिरिधरणरायसेवापसायओ धरणिकेउरायस्स । तम्मारणेण तट्ठाणठाविए समरकेउम्मि ।। २८५३ ।। सव्वाहिगारियत्तं केत्तियकालं पि पालिऊणं से । मरणावसाणयाए संसारियजीववग्गस्स ।। २८५४ ।। अह अन्नया कयाई मरिऊण इमो वि कइ वि भवगहणे । संसारे परियडिउं उप्पन्नो हत्थिरूवेण ।। २८५५ ॥ सत्थोवइट्ठसुपसत्थलक्खणो मयजलोल्लगंडयलो । नीसेसकरिवराणं सिरोमणी नियगुणोहेण ।। २८५६ ।। भवियव्वयानिओएण तस्स वणकेलिकरिवरस्सेव । रन्नवणासन्नम्मी वणंतराओ समायाओ ।। २८५७ ।। भमडंतो नियइच्छाए तत्थ कत्थ वि य पव्वहत्थिस्स । अग्घाडऊण गंधं पहाविओ झ त्ति त भंजतो गरुययरे रुक्खे तम्मयजलेण आलीढे । जोयणतिगप्पमाणं पत्तो भूमिं सवेगेण ।। २८५९ ॥ दिट्ठो य नाइदूरे वणकेली विविहकेलिदुल्ललिओ। नियजूहेण समाणं आसन्नजलासयं जंतो ।। २८६० ।। तम्मयजलस्स गंधं नियडे अग्घाइऊण अहिययरं । रुट्ठो पिट्ठीए पहाविऊण तं हणइ सुंडाए । २८६१ ।। दप्पुटुरेण तेण वि वलिऊण इमो वि वियडकुंभयडे । पहओ तो अन्नोन्नं लग्गा ते संगरे दोन्नि ।। २८६२ ।। आलविऊण परोप्परसुंडाओ दंडमुसलपहरेहिं । तह पहरिउं पयट्टा अह भग्गो झ त्ति वणकेली ।। २८६३ ॥ तस्समएऽणुप्पिच्छो समागओ तुह पुरं इमं राय ! । अहवा भयभीयाणं देसच्चाओ किमच्छरियं ।। २८६४ ।। इय निसुणिऊण राया तच्चरियं भणइ भवविरत्तमणो । अहह महामोहवसेण पाणिणो हुंति जह दुक्खी ॥ २८६५ ॥ तहा हि - उवहयविवेयनयणप्पसरा मोहंधयारतिमिरेण । विज्जुलयाचवलेसु धणजोवणरज्जमाईसु ।। २८६६ ॥ विवरीयजणियबोहो थिरत्तणासाए विणडिया दूरं । तं किं पि कुणंति जिया जयम्मि जत्तो दुही होति ।। २८६७ ॥ जीवे हणंति पभणंति अलियमविदिन्नयं च गेण्हति । सेवंति परकलत्ते आरंभपरिग्गहासत्ता ।। २८६८ ॥ अन्नं पि किं पि तं तं कुणंति जं होइ नरयगइमूलं । तिरियत्तहेउभूयं कुदेवकुनरत्तजणगं च ।। २८६९ ।। (चक्कलयं) तो भणइ मुणिवरिंदो राय ! अओ चेव एयमन्नाणं । कोहाइकसायाण वि दारुणतरयं विणिदिळें ॥ २८७० ।। भणियं च - अज्ञानं खलु कष्टं क्रोधादिभ्योऽपि सर्वपापेभ्यः । अर्थं हितमहितं वा न वेत्ति येनावृतो लोकः ॥ २८७१ ॥
Jain Education International
For Private & Personal Use Only
www.jainelibrary.org
Loading... Page Navigation 1 ... 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 