Book Title: Chandappahasami Chariyam
Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad
View full book text ________________
सिरिचंदप्पहजिणचरियं
वरमप्पत्तभवो च्चिय गब्भविलीणो व सो लहु मओ वा। परिभूयजीविओ जो सहिज्ज अवमाणणं पुरिसो॥ ३००४ ।। रहिओ नियतेएणं केण न वाहिज्जए पसु व्व बला । एत्तो च्चिय सप्पुरिसाण वल्लहा एत्थ हरिवित्ती ॥ ३००५ ।। चुयनीइवयणमेयं एगंतेणं ति मा य अवगणह । कालबलाविक्खाए भणामि जं सव्वमहमीसं ॥ ३००६ ।। सयमेव जाणइ पहू खीणबलो सो रणम्मि बलरन्नो । मित्तव्वसणी य तहा महाबले कुलजविग्गहिए ॥ ३००७ ।। जुज्जइ अभिगंतुमओ वुड्ढिमओ तुज्झ सो खयाभिमुहो। पुन्नग्गलओ ठाणट्ठिओ व्व पभवेज्ज सत्तूसु ।। ३००८ ।। जुवरायगिरं करणिज्जपेसलं भाविऊण तो भणइ । भवभूई नियपहुणा पलोइओ निद्धदिट्ठीए ।। ३००९ ।। नयसारे सयलम्मि वि जुवराएणं विवेइए कज्जे । अवरो जं इह जंपइ सो नूणं कीरपडिसद्दो ॥ ३०१० ।। विमलसमुज्झियन्नयममुक्कपोरुसमहीणनयवायं । गिरमेरिसमेसो च्चिय, पभणइ अहवा सुराण गुरू ।। ३०११ ।। तह वि अणुयत्तणं अहमिमस्स काउं न उच्छहे सहसा । विहिणो वि दुरव सज्झे कज्जे सुज्झेज्ज कह न जणो ।। ३०१२ जओसुवियारिऊण कज्जं मइमं तो कुणइ अहव न करेइ । एमेव कज्जकरणं पसूणधम्मो न पुरिसाण ।। ३०१३ ।। अह एवमेव दोन्ह वि चेट्ठा अविवेयपुव्विया चेव । माणुसपसूण ता भण किमंतरमसिंगिसिंगिकयं ॥ ३०१४ ।। भणियं च - सगुणमपगुणं वा कुर्वता कार्यजातं, परिणतिरवधार्या यत्नतः पण्डितेन । अतिरभसताना, कर्मणामाविपत्तेर्भवति हृदयदाही शल्यतल्यो विपाकः ॥ ३०१५ ॥ अन्नं च एत्थ अत्थे, सुव्वउ लोयप्पसिद्धमक्खाणं ! एगम्मि सन्निवेसे आसि पुरा मरुइणी एगा ।। ३०१६ ॥ तीसे गेहपुरोहडवाडीए, वसइ एगिया नउली । सा एइ खंडणं पीसणं च तीए कुणंतीए ।। ३०१७ ।। तत्थाणनिवडिएणं कणे चुणितं पलोइडं एसा । तीए अणुकंपाए, अहिए वि कणे तहिं खिवइ ।। ३०१८ ।। सा वि तओ लोभेणं लहुं लहुं एइ तयणु दोन्हं पि । अन्नोन्नं पडिबंधो, जाओ अणवरयदंसणओ ॥ ३०१९ ॥ अन्नम्मि दिणे जायाई, नउलरूवाइं तीए नउलीए । इयरीए उण पुत्तो, समकालं दिव्वजोएण । ३०२० ॥ सा पेल्लिरेहिं सहिया, आगच्छइ बंभणीए पासम्मि । सा ते खेल्लावेई पायइ दुद्धं च तुट्ठमणा ॥ ३०२१ ।। चिंतइ य मज्झ पुत्तस्स कीलणाई इमाई होहिंति । एवं च अन्नदियहे, गेहस्स दुवारपंगणए ।। ३०२२ ।। खंडतीए तीसे, सा नउली आगया पविट्ठा य । गेहस्स मज्झ देसे पेच्छइ तं सुत्तयं बालं ।। ३०२३ ॥ अन्नं च सप्पमेगं, चडतयं तस्स चेव बालस्स । लहुमंचियाइ तत्तो, चिंतइ एसा इमं हियए ।। ३०२४ ।। एस मह सामिणीए चडिओ मंचीइ खाइही पुत्तं । ता विणिवाएमि इमं, इय चिंतिय तीए सो गहिओ ।। ३०२५ ॥ खंडाखंडिं काउं, सरुहिरखरंटिएण वयणेण । संपत्ता तीए पुरो, पयडंती चाटुए नियए ।। ३०२६ ।। एत्थंतरम्मि दटुं रुहिरेण खरंटियं मुहं तीसे । आ पावे ! मह पुत्तं, खइउं पत्ता सि एत्थ तुमं ।। ३०२७ ।। इय भणिऊणं मुसलेण ताडिया तह मुहम्मि सा वरई । दसविहपाणेहितो, जह झ त्ति पुढो इमा जाया ।। ३०२८ ।।
Jain Education International
For Private & Personal Use Only
www.jainelibrary.org
Loading... Page Navigation 1 ... 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 