Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 155

१२४
सिरिचंदप्पहजिणचरियं
अह चंडसेण खेत्ताहिवई दठूण निययपडिमाए । जायं तहा विणासं, कुविओ मइसायरस्सुवरि ॥ ३२११ ।। चिंतइ य मह पमत्तस्स कह णु पावेण एत्थ पडिमेसा । आणाविऊण वज्जासणीए मुहगोयरे खित्ता ।। ३२१२ ।। फेडेमि बुद्धिदप्पं इमस्स ता दंसिऊण कडुयफलं । इय चिंतिऊण मारी, विउव्विया तस्स गेहम्मि ॥ ३२१३ ।। दिवसेहिं पंचसंखेहि, कुटुंबमेयस्स सव्वमुरववियं । सो वि हु समकालं चिय, गहिओ रोगेहिं बहुएहिं ।। ३२१४ ।। चिंतासायरवडियस्स तस्स तो सुमिणयम्मि आगम्म । सो भणइ एत्तिएण वि, उव्विग्गो पाव ! किं जाओ ।। ३२१५ ।। तं तुह किं विम्हरियं खित्तो वज्जासणीए जं वयणं । अहयं तुमए नियमइकोसल्लं पयडयंतेण ।। ३२१६ ।। ता दुव्विलसियतरुणो भुंजसु संपइ फलाइ एयाई । सह पुरलोएण ससामिणा तुमं कमसमायाई ।। ३२१७ ।। इय भणिऊण गओ सो इयरो निद्दाखयम्मि पडिबुद्धो । सद्दाविऊण रायं आइक्खइ सुमिणवुत्तत्तं ॥ ३२१८ ।। भणइ य कुविओ एसो, खेत्ताहिवई पुरस्स सव्वस्स । ता जाव न सो पहवइ, ता मुंचह ठाणमेयं ति ॥ ३२१९ ॥ तो राया तप्पडिमं, काराविय देउले तहिं धरिउं । संपूइऊण खामिय, नीहरिओ ताओ नयराओ ।। ३२२० ।। सो तत्तिएण ताहे, रन्नो उवरिं पसन्नओ जाओ। मंति पओसेण पुरं, सो डहई पंचबुद्धीए ॥ ३२२१ ।। दुरे गंतृण नराहिवेण सह परजणेण नियएण। आराहिय सरमेगं. निवेसियं सिरिपरं नयरं ।। ३२२२ ।। जत्थच्छइ भीमरहो इय मुणिउं सो वि भणइ निवसमुहं । देव ! जहा पुरुभूइ भणइ तहा सव्वमेयं ति ।। ३२२३ ।। अम्ह पि पयडं एयं, सवंसचरियं जओ महमहल्ला । एवंविहं कहाणं, कहं तया आसि बालत्ते ।। ३२२४ ।। तो भणइ नरवरिंदो, पेच्छह पडिकलदेव्ववसगाण । जायइ गणो वि दोसो, बद्धिजयाणं पि परिसाणं ।। ३२२५ ।। एवंविहावयाओ अन्नह कह रक्खिऊण नियसामिं । एवंविहजुत्ताए, मरणं पत्तो महामंती ॥ ३२२६ ।। एवं भणमाणो च्चिय, जिणभवणाओ विणिग्गओ राया । अन्नन्नकोउयाई, पेक्खंतो हिंडिऊण नगे । ३२२७ ।। पत्तो निययावास, पुणो वि एवं च कइय वि दिणाई । जावच्छइ विविहविणोयवावडो तत्थ नरनाहो ॥ ३२२८ ।। तो पुहइपालरन्नो, चरणे गंतूण साहियं एवं । देव ! किर पउमनाहो, मणिकूडनगम्मि संपत्तो ।। ३२२९ ।। निस्संको सो तहियं, कयाइ जलकेलिवरविणोएण । कइया वि विविहकोउयपलोयणत्थं गिरिभमेण ।। ३२३० ।। कइया वि दिव्वपरिमलमिलंतभमरउलमंडियमुहाण । कुसुमाणुच्चिणणत्थं जणचेट्ठादसणसुहेण ।। ३२३१ ।। जिणवंदणच्चणाई, कुणमाणो दिवसगमणियं कुणइ । इय मुणिऊण जमुचियं, तं कीरउ देवपाएहिं ।। ३२३२ ।। इय चरवयणं सोच्चा, कोवेण परव्वसो भणइ राया । दावह पयाणभेरिं जाणावह सयलसामंते ।। ३२३३ ।। एत्थ ठियस्स वि मज्झं, सो वइरी आगओ समीवम्मि । ता गंतूणं दप्पं, पणासिमो तस्स इय भणिउं ।। ३२३४ ।। नियबलसहिओ चलिओ मम्गम्मि मिलंतपउरसामंतो। सिरिपउमनाहरन्नो, कडयासन्नम्मि पत्तो य ।। ३२३५ ।। एत्थंतरम्मि दोण्ह वि निवाणमवलोइउं पयावभरं । तणुतेयलज्जिरो इव, अत्थवणमुवेइ दिणनाहो !! ३२३६ ।। अह मंडलेसराणं, पयावमंताण संगमं दोण्हं । अच्छरियं ति मुणंती, दऔं व समागया रयणी ।। ३२३७ ।। सोहंतचंदवयणा, वियसंतसुतारतारनयणिल्ला । सुपसत्थहत्थकलिया, सोहइ जा दिव्वरयणि व्व ॥ ३२३८ ।।