Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 156

१२५
पउमनाहनिवो राया वि पउमनाहो, चराओ अह जाणिउं तयागमणं । नियकडयरक्खणकए, निमुंजए सुहडसंदोहं ।। ३२३९ ॥ काऊण कंचि वेलं, समं च मंतीहिं मंतणावसरं । बिउणियउच्छाहरसो, तो सुहसेज्जं समारुहइ ।। ३२४० ।। खणमेत्तं तत्थ सकामरमणिआलिंगणाइजणियसुहो । देवगुरुसरणपुव्वं, सेवइ निद्दासुहं सत्थो ।। ३२४१ ।। एत्थंतरम्मि संभविसंगामासंकिओ व्व रयणिवई । ल्हसियंसुओ भएणं चलिओ दीवंतरं सहसा ।। ३२४२ ॥ तव्विरहदूमिया इव, मउलियतणुतारलोयणा सिग्घं । जाइ तिजामा वि खयं जुत्तं व्व पइव्वयाण इमं ।। ३२४३ ।। दोण्ह वि बलाण मज्झे, कस्स व अहियं बलं ति दळु च । उदयगिरिसिहरमुच्चं चडिओ अह दियहनाहो वि ॥ ३२४४ तयणंतरं च दोण्ह वि थावरजंगममहीहराण तहिं । कडयक्खोभी सन्नाह पडहसद्दो समुच्छलिओ ॥ ३२४५ ॥ बहिरियनीसेसदियंतरेण जलवाहगज्जिगहिरेण । तेण य सयलावि धरा, पयंपिया किमुय रिउसेणा ।। ३२४६ ।। अवि य दिसकुंजरेहिं वि दप्पो दप्पुद्धरेहिं दूरयरं । मुक्को विमुक्कसत्तेहि का कहा सत्तुकीडाण ।। ३२४७ ।। सुहडाण भाविसंगामहुंतउच्छाहबिउणसोहाण । रुद्धाइं सरीराई, पुलएण मणाई हरिसेण ॥ ३२४८ ॥ रणरहसुद्धसियंगत्तणाण सज्जो फुडंतपुव्ववणा । धीरा धीररसेण व विद्धा सन्नद्धमह लग्गा ॥ ३२४९ ।। देहंतद्धिनिमित्तं कोइ भडो कंकडं अमायंतं । उद्धसियंगो परिहरइ नेह न य परिहइ सरीरे ॥ ३२५० ।। सामिय तुह सन्नाहो, लहु व्व परिहसि कहं ति भणिरीए । अवरो रहसुद्धसिओ, करेण दइयाइ परिमुसिओ ॥ ३२५१ ।। अन्नो पियाइ करकमलफंससंजायबहलरोमंचो । भन्नइ तं चेव जए, सन्नाहो किमवरं कुणसि ॥ ३२५२ ।। सिंगारबिउणिएहिं, पुलएहिं अमंतयम्मि सन्नाहे । कस्स वि वीरस्स पिया, उचियन्नू चयइ दिट्ठिपहं ।। ३२५३ ।। जयलच्छिसमालिंगणपरस्स किं मह इमेण विग्घेण । इय चिंतिय जुवराओ, कवए मंदायरो जाओ ।। ३२५४ ॥ सुत्तं पिव नियतेयं, धारिंतो वइरिएहिं दुब्भेयं । कवयं वियसियवयणा भीमरहो सहइ अहिययरं ॥ ३२५५ ।। एमाइसयलकडयम्मि सन्नहंतम्मि पउमनाहो वि । उचियं सामंताणं, सम्माणं काउमाढत्तो ॥ ३२५६ ।। अविय - जयलच्छिवरणऊसुयमणाण रणदिक्खमहिलसंताणं । सामीसामंताणं, पसायमग्घं व वियरेइ ।। ३२५७ ।। तहा हि - भीमं भासुरवत्थेहिं कंकणेहिं सुभीमनरनाहं । मउडेण महासेणं, मोत्तियहारेण सेणनिवं ॥ ३२५८ ।। चूडामणिणा चित्तंगयं च कंठं च रयणकंठीए । कुंडलनिवं च वरकुंडलेहिं कडएहिं कडयवई ।। ३२५९ ॥ हारेण तारमणिणा भीमरहं महिरहं महग्घेण । हीरयमंडियदाडिमयतिसरएणं पलावेणं ।। ३२६० ।। एमाइ विविहवत्थूहिं पूइऊणं असेससामंते । अन्नस्स वि जस्स जमुचियमप्पए तस्स तं सव्वं ।। ३२६१ ।। कस्स वि तुरयं कस्स वि य वारणं रहवरं च कस्स वि य । कस्स वि सन्नाहं पहरणाई कस्स वि य विविहाई ।। ३२६२ ।। दीणाणाहाईण वि देंतो दाणं जहिच्छियं पच्छा । संपूइय देवगुरू, आणावइ तयणु वणकेलिं ।। ३२६३ ।। तो आएसाणंतरमाणिज्जइ सज्जिऊण वणकेली । मिंठेहिं पुरोहियविहियरक्खआरोवियच्छभरो ॥ ३२६४ ।।