Book Title: Chandappahasami Chariyam
Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad
View full book text ________________
पउमनाहनिवो
११७
हा पुत्तय ! पावाए किं विलसियमेरिसं ति इय भणिरी । जा पविसइ सा मज्झे, ता पेच्छइ सुत्तयं बालं ॥ ३०२९ ।। खंडाई बहूयाई, विहियं सप्पं च पासिउं तत्थ । पच्छायावपरद्धा, चिंतइ हा ! सुंदरं न कयं ॥ ३०३० ॥ पढम चिय रोसवसे, जा बुद्धी होइ सा न कायव्वा । अह कीरइ कह व तओ, न सुंदरो तीए परिणामो ।। ३०३१ ।। इय जं भणंति विउसा तं सच्चं चिय न एत्थ संदेहो। अवियारियकयकोवाइ जं मए घाइया नउली ।। ३०३२ ।। ता जह साडोड्डणिया, पच्छायावस्स भायणं जाया। अवियारियकयकज्जो अन्नो वि तह च्चिय हवेज्ज ॥ ३०३३ ।। तम्हा एत्थ य कज्जे नरिंद ! ता मह मई फुरइ एवं । जं पभणइ जुवराओ, तं कीरउ किंतु सविलंबं ॥ ३०३४ ।। जं परिमुणियारिबला पोढमई छग्गुणे पउंजेह । रिउसव्वस्सं सव्वं, चरेहिं अवगाहह समंता ।। ३०३५ ॥ सपरविभागावगमे, सयं पि तुब्भे वि उज्जया होह । तुरियमुभयाणुजाई भिच्चा य वसीकरिज्जंतु ।। ३०३६ ।। अरिसामवाइया वि हु, तह भेइज्जंतु निउणबुद्धीए । अलिओवनिबंधपरेहि, सासणेहिं असारेहिं ।। ३०३७ ।। अन्नं च तुम्ह मित्तं भीमरहो अत्थि तस्स सच्चमिणं ! जाणाविज्जउ कज्ज, आणाविज्जउ य सो एत्थ । ३०३८ ॥ जम्हा सो खलु तुम्हच्चएण लेहेण तुरियमागमिही । समसुहदुक्खो जं तारीसो हु अन्नो न अस्थि सुही ॥ ३०३९ ।। जओ - सो राया जो पालइ पयाओ नीईए नियपयाउ व्व । सो सुकई जस्स रसग्गलाई वयणाई सव्वत्थ ।। ३०४० ॥ सो पुत्तो जो नियवंसउन्नई कुणइ गुरुयणे भत्तो । तं मित्तं सुपवित्तं, जं खलु वसणाणुयत्तेइ ॥ ३०४१ ।। तं असमतेयकलियं, पावेऊणं सहायमइबलियं । घणविगमं व रवी तुममच्चग्गलतेयवं होही ॥ ३०४२ ॥ जो वि इमो रिवुदूओ, सो वि पहिज्जउ इमं भणेऊण । मासावहीए करिणं, समरं वा तुज्झ दाहामि ॥ ३०४३ ।। इय हियमियवयणमिमस्स सुणिय अणलसमई महीवालो । सयलाभिमयं मंतिस्स सव्वमणुमन्नइ पहिट्ठो।। ३०४४ ।। उट्ठइय मंतणाओ, काऊणावस्साई कज्जाई । मंतिस्स कुणइ वयणं, गुरू न लंघति जयकामा ॥ ३०४५ ॥ अह अन्नदिणे गणएण दंसिए, दोसवज्जिए सगुणे । मिलिएसु भीमरहमाइएसु सयलेसु राईसु ।। ३०४६ ॥ अणुकलसउणपवणुच्छलंतअहिययरचित्तउच्छाहो । पडिवक्खजिगीसाए, नयराओ विणिग्गओ राया ।। ३०४७ ।। पसमियतममाहप्पो, जणनयणाणंदणो सुतेइल्लो । संकिन्नगुणत्तेणं, जो भाइ ससि व तरणि व्व ।। ३०४८ ॥ अवि य - जस्सुवरिधरियधवलायवत्तमाभाइ नियजससरिच्छं । आणंदियसयलजणं निरुद्धतेयस्सिमाहप्पं ॥ ३०४९ ।। जलहरमग्गविसाले उरत्थले जस्स तह य हारो वि । तारयगणो व्व सुहससिसेवाए समागओ सहइ ॥ ३०५० ॥ वरकुंडलग्गसंलग्गपोमरायज्जुईए विच्छुरिया । जस्स भुया गेरुयरेणुरुइरकरिसुंडसारिच्छा ॥ ३०५१ ॥ जो वित्थारइ गयणे मेघाभावे वि इंदधणुलच्छि । पंचविहमउडमणिविप्फुरंतघणकिरणजालेण ।। ३०५२ ।। परिभविही मंडलिए रिउविजयविणिग्गओ इमो त्ति भया । ससिरविणो रयणंगयछलेण सेवंति जस्स भए ।। ३०५३ वरहारतरलमरगयमणिकिरणचएण पूरियं जस्स । जमुणा दहस्स लच्छि, विलुंटए नाहिकुहरं च ।। ३०५४ ॥
Jain Education International
For Private & Personal Use Only
www.jainelibrary.org
Loading... Page Navigation 1 ... 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 