Chandappahasami Chariyam

Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

Page 151

१२०
सिरिचंदप्पहजिणचरियं अन्नं च तस्स रन्नो, वीयकवोलेसु मोत्तियायारे । समबिंदू पासंतस्स रविकरोहो खरो वि सुहो ॥ ३१०७ ।। तो पेच्छइ वणिएहिं अग्गगएहिं कयाओ हट्टाण । पंतीओ पडमयाओ, कइगजणाउलियदाराओ ।। ३१०८ ॥ तत्तो पुरओ उत्तुंगतोरणं नियनिवासविणिवेसं । दठूण विविहभूमियमिमस्स आरुहइ उवरि खणं ।। ३१०९ ।। दठूणं सेणाए विणिवेसं सव्वओ वि अइरम्मं । कयआवस्सयकिच्चो, गच्छइ सेलं समारुहिउं ।। ३११० ।। पेच्छइ य तत्थ कत्थ वि तमालहिंतालतालतरुनियरं । कत्थ वि सज्जज्जुणसरलसल्लईसालसंघट्ट ।। ३१११ ।। कत्थ वि अंबंबाडयअंबलियामलियदाडिमीनियरं । कत्थ वि बिज्जउरियबोरिवीययासोयसाहिगणं ।। ३११२ ।। कत्थ वि चंपयकुरुबयकेसरनारंगनागसंघायं । कत्थ वि खज्जूरीनालिएरिफोफलिणिकेलिवणं ॥ ३११३ ।। कत्थ वि सयवत्तियजाइजूहियापारियायमंदारे । कत्थ वि सुसाउसीयलजलाओ निज्झरणमालाओ ।। ३११४ ॥ अन्नत्थ य कणयसिलानिबद्धदेवउलदिव्वपंतीओ । नाणाविहरयणविरायमाणपडिमोववेयाओ ।। ३११५ ॥ कत्थ वि नीलमहानीलपउमरायाइमणिविहाणे य । कत्थ वि महतरुप्पयसुवन्नफलिहामलसिलाओ ॥ ३११६ ।। दह्णेमाइपयत्थवित्थरं तयणु खित्तमणनयणो । जा वयइ उवरिहुत्तं, ता गरुयं नियइ जिणभवणं ॥ ३११७ ।। पवणमहल्लिरधयअंगुलीहिं तज्जेइ जं समग्गं च । रणझणिरकिंकिणीरवमिसेण आभासइ व्व जणं ।। ३११८ ।। दंसइ जणस्स हत्थयकवोयवालीनिलीणपक्खिउलं । जणरावेणुड्ढमुहं, उड्डीणं सग्गमग्गं व ।। ३११९ ॥ रमणीयमंजरीरयमाणग्गुवयरियसउणसंघायं । महुसहयारवणं पिव, विहाइ जं जणमणाणदं ।। ३१२० ।। वरसिप्पिकरोडयथालपट्टसंघट्टपत्तपरभायं । भोयणठाणं पिव जं, समिद्धसजिगीससामिस्स ।। ३१२१ ।। ओलंबियसुस्सरसारगरुयघंटाहिं जणियवरसोहं । मत्तकरिरायरूवं व जं च बहुलक्खणोवेयं ।। ३१२२ ।। तं दठूण पहट्ठो पविसइ पंचविहअभिगमेण निवो । जय जय जय त्ते भणिरो पासित्तु जिणिंदपडिमाओ ॥ ३१२३ सामंतमंतिमाईपहाणपरियणसमन्निओ तत्थ । अंतेउरेण सह गहियपवरपूओवगरणेण ।। ३१२४ ।। पंचंग पणिवायं, काऊणं पूइऊण य जिणिंदे । तिपयाहिणिऊण तओ, विहिणा चिइवंदणं कुणइ ।। ३१२५ ॥ पच्छा तो पुरुभूई पुच्छइ केणेयमेरिसं रुइरं । कारिवियं जिणभवणं भवियाणं मोक्खमग्गं व ॥ ३१२६ ।। तो पुरुभूई मंती, पयंपई देव ! सुव्वइ कहेसा । आसि पुरा अस्सेव य, नगस्स नियडे पुरं रम्मं ।। ३१२७ ।। नामेण लच्छिनिलयं, तत्थासी सीहसेणनामेण । नरनाहो विक्खाओ, दइया गंधारदेवी से ।। ३१२८ ।। तीए समं विसयसुहं, अणुहवमाणस्स को वि से कालो । वोलीणो अन्नदिणे, नीहरिओ नियपुराहिंतो ।। ३१२९ ।। महया आसबलेणं, पत्तो एयस्स चेव सेलस्स । रम्मेसु पुरसरेसुं, पारद्धीरमणकज्जेण ।। ३१३० ।। भवियव्वयानिओएण तम्मि ठाणम्मि तस्सहम्मि दिणे । एक्को वि हरिणगाई, पडिओ सरगोयरे न जिओ ॥ ३१३१ ।। ताहे चिंतइ किं कारणं तु मह अज्ज सपरिवारस्स । एक्को वि जिओ सत्थस्स गोयरं नागओ एत्थ ।। ३१३२ ।। इय चिंतंतेण तहिं खेत्ता सेलस्स सम्मुहा दिट्ठी । दिट्ठो य तन्नियंबे, महामुणी काउसग्गठिओ ।। ३१३३ ॥ पासट्ठियसूयरहरिणरोज्झससयाइजीवसत्थेण । उवसंतमणेणं मुणिमुहम्मि निक्खित्तनयणेणं ।। ३१३४ ।।