Chandappahasami Chariyam

Book Title: Chandappahasami Chariyam
Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

View full book textPrevious | Next

Page 52
________________

अजियसेन निवो
नियमायरं च सुपवित्तदंसणं पुत्त ! परिहरित्तु तुमं । मुच्छावियलं कत्थ व गओ सि गुरूवच्छलसुवच्छ ! ॥ ५१४ तुज्झावहारएण व सोएण कयत्थियं इमं जाय ! ता नेहि कयत्थत्तं, नियदंसणदाणओ सिग्धं ॥ ५१५ ॥ पयईए अहियधीरत्तधीजुओ वि हु नरीसरो एवं । सुयनेहेणं तव्विरहदूमिओ जाइ पुण मुच्छं ॥ ५१६ ॥ पुण लद्धचेयणो कह वि होइ मुच्छाए वियलिओ पुण वि । पडणुट्ठणे करितो, बीहावइ सयलसहलोयं ॥ ५१७ एत्थंतरम्मि पुण्णोदएण आगरिसिउ व्व तस्सेव । नरवइणो आयासेण आगओ चारणमुणिंदो ॥ ५१८ ॥ अह गयणयलाओ तमुत्तरंतमवलोयए नरवरिंदो । पजलंतं पिव उज्जलपसरियनियदेहतेएण ।। ५१९ ।। नरवइणो मोहतमं व हरिउकामो किमेस गयणाओ । पजलंतो नियतेएण अंसुमाली समोअरइ ।। ५२० ॥ कुमारावहारपिसुणियपुन्नविणासाण किंच अम्हाणं । संहरणत्थमकम्हा, नहाउ सोयामणी पडइ ॥ ५२१ ॥ विप्फुरिय विप्फुलिंगं, सक्केण उयाहु पेसियं कुलिसं । तक्खणभवजगजगडणसोयदइच्चं विणासेउं ॥ ५२२ ॥ किं वा हु कोइ देवो, अइतेयस्सी भवंतरसिणेहा । सुयविरहविहुरपडियं, नरवइमासासिउमुवेइ ॥ ५२३ ॥ एवं जणेहिं स मुणी, ऊहिज्जंतो नरिंदपासम्मि । आगंतूणुवविट्ठो, महासणे नरवइविइण्णे ।। ५२४ ॥ मणयं पणट्ठसोएण राइणा पणमिओ य भत्तीए । मुणिणा वि धम्मलाभो, से दिण्णो उब्भियकरेण ॥ ५२५ ।। तत्तो वत्थेण पमज्जिऊण सुद्धे महीयले राया । उवविसिऊण सविणयं, एवं भणिऊं समाढत्तो ॥ ५२६ ॥ जलवरिसणं व संतावियाण, दिव्वोसहं व रोगीण । मह निहिलहणं व महादरिद्ददुक्खडेयनराण ॥ ५२७ ।। तुह आगमणं मुणिवर ! अम्हाण सुपुत्तविरहतत्ताण । संजायं जम्मंतरसमुवज्जियपुन्नजोएण ।। ५२८ ।। अहवा विणा तवेणं, स एस नासो असेसकम्माणं । जाओ रिउक्खओ वा, विणा वि गरुयं रणारंभं ॥ ५२९ ॥ किसिकम्ममंतरेण वि, समग्गधन्नाण अहव निप्फत्ती । जं तुम्ह दंसणमिणं पहु ! जायमदिट्ठकारणयं ॥ ५३० ।। सक्काओ वि गरुययरं, मए पयं पत्तमज्ज मुणिनाह ! | पुन्नेहिं समहिओ तह जाओ भुयणत्तयाओ अहं || ५३१ जं मह अणुग्गहेच्छाए आगओ परुवयारबद्धरई । तं पुहु अहन्नयाणं, मणोरहाणं पि नो विसओ ॥ ५३२ ।। तं एवं भणमाणं, आह मुणी नरवरस्स अंगाओ । अमयमयवयणरयणाइ उद्धरंतो व्व सो य विसं ॥ ५३३ ॥ भो भो नरिंद ! सुयविरहदुक्खियं पासिऊण तं एत्थ । ओहिन्नाणेण समागओम्हि तवभूसणो नामं ॥ ५३४ ॥ जेणिह निसग्गओ च्चिय, जिणसासणभाविओ जणो होइ । पायं गुणाणुरागी, परदुक्खे दुक्खिओ तह य ॥ ५३५ संसारसरूवविउस्स चरिमदेहस्स निम्मलसुयस्स । नीसेसपयत्थजहट्ठियावबोहस्स तुह राय ! ॥ ५३६ ।। अणुसट्ठी दिज्जंता, पडिहासइ मज्झ दीवएणेव । सपरप्पयाससंजणयतरणिबिंबस्स पायडणा ॥ ५३७ ॥ इह अप्पियपियसंगमवियोगजं सरिसमेव जीवाण । भवसायरम्मि दुक्खं महंबुरासिम्मि सलिलं व ॥ ५३८ ॥ तत्थ य अणोरपारे, उब्बुड्डनिबुड्डणं कुणंताण । अच्छीनिमेसउम्मेसमेत्तयं जइ सुहं किंपि || ५३९ ।। जइ य च्चिय तेण सुएण संगमो कम्मजोगओ तुज्झ । संजाओ तइय च्चिय, विओगहेऊ तओ जाओ ॥ ५४० एत्थं च दूरगमणेण किमिव कज्जं जओ सदेहे वि । संजोगविओगा खलु, खणे खणे अणुहविज्जंति ॥ ५४१
Jain Education International
For Private & Personal Use Only
www.jainelibrary.org


Page Navigation
1 ... 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246