Chandappahasami Chariyam

Book Title: Chandappahasami Chariyam
Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

View full book textPrevious | Next

Page 62
________________

जयधम्मनिवो
कुमरो वि अजियसेणो, अलंकिओ जयसिरीए दिव्वाए । देवं विसज्जिऊणं, हिरन्ननामं सठाणम्मि ॥ ७८६ ॥ आसासिऊण खयरे, अवसेसे गाहिऊण नियसेवं । खयरिंदविमाणगओ, दीसंतो पुरजणेण तओ ॥ ७८७ ॥ जयधम्मनरिंदेण य, पहरिसपूरिज्जमाणहियएण । अभिनंदिज्जतो गुरुसिणेहसाराए दिट्ठीए ॥ ७८८ ॥ उदयं लहिउं हरिऊण रिउतमं दुगुणदूसहपयावो । विउलपुरस्स नहस्स व, सो सूरो मज्झमवयरइ ॥ ७८९ ।। अह अन्नदिणेसु पसत्थलग्गवेलाए सुहमुहुत्तम्मि । नीसेसमिलियपरियणकारवियासेसकायब्लो ।। ७९० ॥ जयधम्मो गरुयमहूसवेण कारवइ निययधूयाए । पाणिग्गहणं सिरिअजियसेणकुमरेण हट्टेण ॥ ७९१ ॥ तत्तो य अजियसेणो ससिप्पहाए ससि व्व जोण्हाए । रेहइ कुंदुज्जलकित्तिकिरणभरभरियभुवणयलो ।। ७९२ ।। तीए समं तत्थ पसत्थभोगसंभोगजोगदुल्ललिओ । कइवयदिणाणि गमिउं, अन्नदिणे भणइ नियससुरं ॥ ७९३ ॥ तुम्हाणुमईए अहं, गंतुं इच्छामि नियपिउसमीवं । चिरकालविओगुब्भवदुहग्गिविज्झावणकएण ॥ ७९४ ।। जम्हा जयावहरिओ, अहयं नियपिउसहाइ मज्झाओ । नामेण चंडरुइणा, असुरेणं पुव्ववेरेण ।। ७९५ ।। तप्पभिई चिय जाया, कावि अवत्था पिऊण मह विरहे । जाणामि तं न नरनाह ! जेण भमिओ हमेक्कल्लो ॥ ७९६ कत्थ वि सुहेण कत्थ वि दुहेण कत्थ वि य पोरुसवसेण । ता जाव तुज्झ पासे, संपत्तो रायलच्छि पि ।। ७९७ ता देसु ममाएसं, गंतूणं जेण नियपिउजणस्स । दंसणसुहेण सुहयामि निययमुम्माहियं हिययं ।। ७९८ ॥ इय भणिए भाविविओगदुक्खदूमियमणो महाराओ । पडिभणइ किमित्थत्थे, काहामि तुहुत्तरं अहयं ॥ ७९९ ।। जओ - जाहि त्ति फरुसवयणं, तुरियमुवेहि त्ति आणदाणं च । एत्थेव चिट्ठ पिउकुसलवत्तमाणिस्समहमेव ॥ ८०० ।। एयम्मि पत्थुयस्स तुह विरहहेउ त्ति ता इमं चेव । जुत्तं तुमए सद्धिं, जमागमिस्सामि अहयं पि ।। ८०१ ॥ एवं च कीरमाणे, सेवावित्ती न लंघिया होइ । न य होइ विरहसहणं, अओ इमं चेव कायव्वं ।। ८०२ ।। इय भणिए नरनाहेण तयणु पडिभणइ अजियसेणो वि । हा ताय ! तुहाएसं, पडिच्छमाणे वि मइ निच्च ।। ८०३ किं भणसि सेवगो हं, जं पुण भणियं विओगसहणं नो । संजोगविओगाणं, तत्थ न निययं अवत्थाणं ॥ ८०४ ता पालसु तं रज्जं, एत्थेव ठिओ अहं तु गंतूण । तुज्झाएसेण पिऊण दंसणं देव ! काहामि ॥ ८०५ ।। तो मुक्को नरवइणा, समयं सामंत-मंतिमाईहिं । चउरंगबलसमेओ, विभूसिओ गुरुविभूईए ॥ ८०६ ॥ सह निययपियाए ससिप्पहाए पिउदिन्नगरुयविहवाए । सुपसत्थम्मि मुहुत्ते, चलिओ अह अन्नदियहम्मि ॥ ८०७ धरणिद्धयखयरवहे, वसीकया जे य खेयरा केइ । ताणं दिव्वविमाणे, आरूढो तेहिं सहिओ य ।। ८०८ ॥ अइतुरियं वच्चन्तो, पत्तो सुंदरपुरस्स सो बाहिं । उउकुलभावण नाम, उज्जाणं, मणयतरुरम्मं ।। ८०९ ।। तत्थ य हिंतालतमालतालसज्जज्जुणाइतरुनियरं । ओइण्णो दट्टुं कोउएण सह खयरविंदेण ।। ८१० ।। अवलोयन्तो नाणाविहाण उज्जाणतरुवराण सिरिं । सत्तच्छयछायाए, अह पेच्छइ मुणिवरं एगं ॥ ८११ ॥ झाणम्मि निच्चलमणं, सुपसन्नं चत्तसयलवावारं । तं दठूण कुमारो, समागओ वंदणकएण ।। ८१२ ।।
Jain Education International
For Private & Personal Use Only
www.jainelibrary.org


Page Navigation
1 ... 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246