Chandappahasami Chariyam

Book Title: Chandappahasami Chariyam
Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad

View full book textPrevious | Next

Page 81
________________

सिरिचंदप्पहजिणचरियं मणुयाणं तिरियाणं च जं तयावरणखयउवसमेण । तं गुणपगरिसपत्तस्स लद्धिरूवं वियाणाहि ।। १२९२ ॥ मिच्छत्तकलुसियमिणं, नाणत्तिययं पि होइ अन्नाणं । जह मज्जदूसियं, पंचगव्वमवि होइ अपवित्तं ॥ १२९३ ।। मणपज्जवनाणं पुण, जणमणपरिचिंतियत्थपागडणं । माणुसखेत्तनिबद्धं, गुणपच्चइयं चरित्तवओ ।। १२९४ ॥ रिजुमइविउलमईभेयभिन्नमेयं पि भन्नई दुविहं । नवरं इमम्मि संभवइ नेय मिच्छत्तपरिणामो ॥ १२९५ ।। तीयाणागयसंपइ असेसपरिणामपरिणए दव्वे । लोयालोयगए वि हु, अणंतगुणपज्जवे जत्तो ।। १२९६ ।। सा मइमुवओगेणं, मुणंति सययं पि सम्मरूवेणं । तमणंतमपडिवायं, केवलनाणं अणन्नसमं ॥ १२९७ ॥ एवं एयं नाणं, पंचवियप्पं पि बिंति दुविगप्पं । संखेवभणिइ कुसला, पच्चक्ख-परोक्खभेएहिं ॥ १२९८ ।। तत्थोहिन्नाणाई, तियगं पच्चक्खमेव परिकहियं । मइ-सुयनाणे य पुणो, परोक्खमिह जीववेक्खाए ॥ १२९९ ॥
ओहिन्नाणेण जओ, अइंदियाई पि रूविदव्वाइं । जाणंति ओहिनाणी, पच्चक्खं तेसु उवउत्ता ॥ १३०० ॥ मणपरिणामपरिणए, दव्वे मणपज्जवं पि एमेव । घाइचउक्कखउत्थं, केवलनाणं पि नियविसए ॥ १३०१ ।। केवलनाणं इह जिणवरेसु मणपज्जवं सुसाहूसु । अन्नत्थ ओहिनाणं, मई सुयं चेव छउमत्थे ॥ १३०२ ॥ सयनाणं वज्जित्ता, अण्णतरं दाणमत्थि न इमाण । सव्वाण वि नाणाणं. वन्नेमो तेण तं तस्स ।। १३०३ ।। सिद्धंत-तक्कलक्खण-साहिच्चाईपहाणगंथाण । पढणाइउज्जुयाणं, जो अप्पइ पोत्थयाईणि ।। १३०४ ।।
आलावगमाई वा, वियरइ वक्खाणमहव पभणेइ । सुयनाणदाणमणहं, पयट्टियं तेण इह होइ ।। १३०५ ॥ किंच - रागोरगविसगारुडमंतो दोसानलस्स सलिलोहो । अन्नाणतमपईवो, सन्नाणुल्लाससंजणओ ॥ १३०६ ॥ जो अत्थओ जिणिंदेहिं गणहराईहिं सुत्तओ भणिओ । अंगोवंगपइन्नयमाई सो सुद्धसिद्धंतो ॥ १३०७ ॥ तस्सावोच्छेयकए लिहावई पोत्थयाइं जो धन्नो । तेसिं च रक्खणट्ठा, वेंटणयाई पयच्छेइ ।। १३०८ ॥ तप्पडिबद्धे पयरणमाइम्मि व तह पयट्टई जो य । सिद्धते बहुमाणं, उव्वहमाणो अणन्नसमं ।। १३०९ ।। कारइ य जोगवहणं, सामायारिं च सिक्खवइ सव्वं । साहेज्जम्मि य वट्टइ, जोगुव्वहणं करितेसु ॥ १३१० ॥ आहारमाइणा तह, कुणइ उवटुंभमेत्थ निरयाण । सुयनाणदाणमणहं, तेणावि पयट्टियं होइ ॥ १३११ ॥ जो वा नाहियवाइयमाई एयस्स कुणइ उवहासं । एयप्परूवगाणं, च जिणवराईण निण्हवणं ॥ १३१२ ।। सइ सामत्थे तित्थप्पभावणाकज्जउज्जओ होउं । अब्भसियतक्कमाहप्पदलियपरवाइगुरुगव्वो ॥ १३१३ ।। धम्मम्मि थिरीकरणत्थमेव वयणम्मि तस्स मसिकुच्चं । जो देइ तेण वि इमं, पयट्टियं होइ सुयदाणं ॥ १३१४ ।। इय कित्तियं व भन्नइ, जह जह वुड्ढी इमस्स संभवइ । भवियाण मणे तह तह, पयट्टमाणो सुयं देइ ।। १३१५ एवं सुयदाणविही, एसो भणिओ समासओ किंचि । संभवइ जहा दाणं, भवेसु अणंतरमिमस्स ॥ १३१६ ।। सेसाण वि नाणाणं, परंपराए निमित्तभावेण । जणयंतो उवयारं, तद्दाणे होइ हु पयट्टो ॥ १३१७ ॥ नाणस्स दाणमेवं, परूवियं अभयदाणमेत्ताहे । वोच्छामि जहा दिज्जइ, जेहिं जेसिं च पाणीणं ॥ १३१८ ।।
Jain Education International
For Private & Personal Use Only
www.jainelibrary.org


Page Navigation
1 ... 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246