Book Title: Chandappahasami Chariyam
Author(s): Jasadevsuri, Rupendrakumar Pagariya, Jitendra B Shah
Publisher: L D Indology Ahmedabad
View full book text ________________
६०
सिरिचंदप्पहजिणचरियं
नीइनिउणेण जेणं, धरणी हयदुन्नया हरियदोसा । अन्नविरत्ता भुत्ता, सइत्तपत्त व्व सगुणेहिं ।। १५५७ ।। वड्ढियललि उवयारं, जो उन्नयपिहुपओहरसुगोत्तं । तरुणिं व धरं भुंजइ, थिरत्तगुणलद्धसक्कारं ॥ १५५८ ।। चक्किसिरिमणुहवंतस्स तस्स अह अन्नया समणुपत्तो । महुसमओ समयपिगाण जत्थ वित्थरइ महुररवो ।। १५५९ हयपउमं गयपत्तं कुवायबलनिच्चकंपियजणं च । निज्जिणिउं सिसिररिउं, महुराया महुरमुल्लसिओ ।। १५६० ।। नवपल्लवकरचरणो, ईसिसमुल्लसियमउलवरदसणो । मंजरिचूडाकलिओ, कीलइ बालो व्व जो भवणे ॥ १५६१ किं च - जणयंतो जणहरिसं, दावितो विरहिणीण बहुदुक्खं । सिक्खाविंतो कलकलयलं च कलयंठकंठीयो ॥ १५६२ ॥ उल्लासिंतो मलयानिलेण सहयारमंजरीजालं । फुल्लाविंतो नवमालियाओ सह मल्लियाहिं तहा ॥ १५६३ ॥ जो वहइ दक्खिणदिसाकामिणिमणिकुंडलं तरणिबिंबं । मलयानिलपेल्लियमिव, उत्तरनहपंगणे पडियं ॥ १५६४ (विसेसय) जो य गुरुपरिमलुप्पीलपयडपसरंतदाणकयसोहो । सहयारमंजरीजालदंतमुसलेहिं रमणीओ ॥ १५६५ ॥ गयवइवित्थारियविरहपावओ वारणो ब्व अइपोढो । अक्खलियो भुवणवणम्मि भमइ भसलालिकयहरिसो ॥ १५६६ ॥ (जुयलं) अवरं च - सुहपुव्वकालमूलो, कुणइ सुहं मणु जणस्स सरओ वि । एमेव य पुण एसो, पेच्छह महुणो गुणसमिद्धिं ।। १५६७ विरहिणिहरिणीकयगरुयविद्दवो लसियकेसरकलावो । किंसुयनहग्गरुइरो, महुमासो सहइ सीहो व्व ॥ १५६८ ।। हिययहरपत्तवल्लीपसाहणं पवरमेस धारिंतो । तरुणिथणाणं रइहरथंभाण य लहइ उवमाणं ।। १५६९ ।। जो न वि मुंचइ माणं, भंजइ तह सुरहिबंधुणो आणं । तस्स वहत्थं व महू, संधइ तरुधणुसुकुसुमपाणगयं ।। १५७० (गीतिका) मंजरिनियरपसाहियसहयारगिहेसु भमइ महुलच्छी । अरुणप्पवालचरणा, महुयररवतुलियनेउरा रावा ।। १५७१ (गीतिका) अन्नं च - कलियविमलंबरं ता, ससहरजोण्हाए एत्थ बहलाए । रयणीसु गयणलच्छी, चंदणचच्चं व अणुहवइ ॥ १५७२ ।। माणिणिमणभवणेसुं, माणरए मलयमारुएण वहरिए । महुनिहियपल्लवकरो, महुयररवमंगलेहिं पविसइ मयणो ॥ १५७३ (खंधो) पेच्छह वसंतसत्तिं, जो कुसुमपरायचुन्नमेत्तेण । मोहंतो भुवणमिमं, करइ कामस्स वसवत्तिं ॥ १५७४ ।। कलकलयलेण कोइलकुलाई जणयंति विरहिसंतावं । परपुट्ठमलिणरूवाण अहव भण केत्तियं एयं ॥ १५७५ ।। हिंडइ चूयवणेसुं, लुटतो पहियहिययसाराई । कलयंठकुलमिसेणं, चरडगणो मयणभिल्लस्स ।। १५७६ ॥ वल्लहसरीरफासो, मयराइरसो सुगंधिणो पवणा । लडहकडक्खा कामिणिजणस्स तह पंचमस्स झुणी ।। १५७७ ।। पंच वि इमे पयत्था, महुसमए पयरिसं परं पत्ता । सयलिंदियसुहहेऊ, होति विलासीण पुण्णेहिं ॥ १५७८ ।। एवंविहे वसंते, पावासुयलोयसोसियवसंते । मुहमुइयमहुयरीबहलरावमुहरीकयदियंते ।। १५७९ ॥ फुल्लियअसोयचंपयकुरवइतिलयाइरुक्खरमणीए । माणिणिमाणुम्महणे, मयरद्धयनिद्धबंधुम्मि ।। १५८० ॥ सो अजियसेणचक्की, चक्कंकुसकमलसंखमाइहिं । वरलक्खणेहिं लक्खियदेहो पविसित्तु वासहरं ॥ १५८१ ।।
Jain Education International
For Private & Personal Use Only
www.jainelibrary.org
Loading... Page Navigation 1 ... 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 