________________ 22 મિથ્યાત્વ એટલે મિથ્યાત્વ = હલાહલ વિષ છે...ધર્મપ્રવૃત્તિ કરવા છતાં અધર્મની રૂચિને જીવંત રાખનાર છે...ઉસૂત્ર પ્રવૃત્તિ-પ્રરૂપણાનો આગ્રહ રખાવનાર છે... ગુણસેવન કરવા છતાં પણ અનુબંધમાં દોષ આપનાર છે. કુનયની દુર્વાસના પેદા કરનાર છે. અનેકાંતને (સ્યાદ્વાદને) બદલે એકાંતમાં રૂચિ રખાવનાર છે...મૈત્રી આદિ ભાવનાઓને વિકસિત ન થવા દેનાર છે...ભવાભિનંદીપણાને ખીલવનાર છે...અપરીક્ષિત વસ્તુને ગ્રહણ કરવાની પ્રેરણા આપનાર છે...શાસ્ત્રમતિના બદલે સ્વમતિ-બહુમતિમાં રૂચિ કરાવનાર છે...દુઃખદાયી પૌદ્ગલિક પદાર્થોમાં (દુન્યવી સામગ્રીમાં) સુખબુદ્ધિ કરાવનાર છે...શાસ્ત્રવચનને બદલે ખોટા અભિનિવેશોને પુરસ્કૃત કરનાર છે...અનંત સંસારનો સર્જક છે...અને એટલે જ મિથ્યાત્વ હલાહલ વિષ છે. વિષ તો એક ભવ બગાડે છે. જ્યારે મિથ્યાત્વ તો અનંતા ભવો બગાડે છે. હવે આગળના પ્રકરણમાં મિથ્યાત્વ-મિથ્યાત્વી અને તેની સાથે સંબંધિત વિષયો અંગે ગ્રંથકારોનો અભિપ્રાય રજૂ કરવામાં આવશે. = x = x =
