________________ 100 મિથ્યાત્વ એટલે મિથ્યાત્વ = હલાહલ વિષ લાગે જ છે ને? અરે ! તિથિ બાબતમાં બધું જ જ્ઞાન ધરાવનારા પણ કેટલા? મોટા ભાગના એક તિથિ પક્ષવાળાઓ એક તિથિપક્ષવાળા પાસે સાંભળી સાંભળીને એક તિથિને સાચી માનતા થયા છે ને? શું તેઓએ બે તિથિપક્ષવાળા પાસે જઈને, એમના વિદ્વાનો પાસે બે તિથિપક્ષની વાતો સાંભળી છે ખરી ? સમજયા છે ખરા? એમ મોટા ભાગના બે તિથિપક્ષવાળાઓ બે તિથિપક્ષવાળા પાસે જ સાંભળી સાંભળીને બે તિથિને સાચી માનતા થયા છે ને ? શું તેઓએ એકતિથિપક્ષવાળા પાસે જઈને, એમના વિદ્વાનો પાસે એકતિથિપક્ષની વાતો સાંભળી છે ખરી? સમજ્યા છે ખરા? શાસ્ત્રમાં સ્પષ્ટ લખ્યું છે કે “કોઈ સાધુ આધાકર્મી ગોચરીને પણ ભૂલમાં નિર્દોષ સમજીને વાપરે, તો એને આધાકર્મીનો દોષ નથી લાગતો.” એમ સંયમી ખોટી તિથિને પણ ભૂલમાં સાચી તિથિ સમજીને એને આરાધે, તો એને દોષ નથી લાગતો. આ વિષયમાં મારી સમજ પ્રમાણે મેં લખેલું છે. હજી આમાં ઘણાને ઘણા પ્રશ્નો થઈ શકે એમ છે...છતાં મને લાગે છે કે જો કોઈ જિજ્ઞાસાથી મને કે કોઈપણ સંવિગ્નગીતાર્થ મહાત્માને પૂછશે, તો ચોક્કસ એનું સમાધાન એને મળશે જ. ભાવના મારી તો માત્ર એટલી જ છે કે વધુમાં વધુ જીવો મોક્ષમાર્ગે વધુ ને વધુ આગળ વધે. પ્રભુ મારી ભાવનાને સફળ બનાવે. પ્રભુ મારી ભાવનામાં જો ભૂલથી પણ મેલાશ હોય, તો એને દૂર કરી પવિત્ર બનાવે. પ્રભુ મારા સંઘની રક્ષા કરે. (અહીં લેખકશ્રીની વાત પૂર્ણ થાય છે.)
