________________ જૈન ઇતિહાસની ઝલક 15 દીધા. તે દેવાત્મા થયા. તરત જ ઉપયોગ મૂકીને પોતે ક્યાંથી આવીને દેવ થયા છે ? તે જાણી લીધું. તત્કાળ આ ધરતી ઉપર આવ્યા. બધા મુનિઓને વંદન કર્યું, પણ પિતા-મુનિને વંદન ન કર્યું. બીજા મુનિઓએ દેવાત્માને તેનું કારણ પૂછ્યું ત્યારે તેણે જણાવ્યું કે, “તે મારા પિતા-મુનિ છે. તેમણે મને નદીનું કાચું પાણી પી લેવાની મોહગર્ભિત સલાહ આપી હતી. જો મેં તેમ કર્યું હોત તો મારું સાધુ જીવન કેવું પાયમાલ થઈ જાત ? સારું થયું કે મેં તેમ ન કર્યું. આથી જ હું મરીને દેવ થયો છું. આવી સલાહ આપનાર વ્યક્તિ સાંસારિકપણે પિતા છે એટલા માત્રથી વંદનીય શી રીતે બની શકે ? આ સાંભળીને પિતા-મુનિને પોતાની ભૂલ ઉપર ભારે પશ્ચાત્તાપ થયો. [33] અભયદેવસૂરિજીનું ગુર્વાજ્ઞાનપાલન એ હતો ધારાનગરીનો શ્રેષ્ઠીપુત્ર અભય. ભરયૌવનમાં વિરક્ત થઈને જિનેશ્વરસૂરિજી મહારાજા પાસે દીક્ષા લીધી. અભયમુનિ બધા પ્રકારના પુણ્યના સ્વામી હતાં. વિદ્વત્તા, વ્યાખ્યાનશક્તિ, રૂપ વગેરે બધું જ અહીં એકત્રિત થયું હતું. એક વાર તો એમના મધુરકંઠને કારણે રાજકુમારી મોહી પડી હતી. વળી એકવાર વ્યાખ્યાનમાં યુદ્ધનું વર્ણન કરતાં શ્રોતાજનોમાં રાજપૂતોએ મ્યાનમાંથી તલવાર ખેંચી કાઢી હતી. મારો... મારો.. કરતાં તેઓ ઊભા થઈ ગયા હતા. આ બે પ્રસંગોને ધ્યાનમાં લઈને ગુરુદેવે અભયમુનિના પતનની શક્યતાને ખતમ કરી નાંખવા માટે છ વિગઈના આજીવન ત્યાગની અને તેની સાથે માત્ર જુવારનું જ દ્રવ્ય વાપરવાની પ્રતિજ્ઞા આપી હતી. અભયમુનિને અભયદેવસૂરિ બનાવીને ગુરુદેવ દેવલોક થયા. કાલાન્તરે નીરસ અને વાયડા ખોરાકના સેવનને લીધે અભયદેવસૂરિજીને કોઢ થયો; અત્યન્ત ચેપી અને ભારે પીડાકારક. રોગ એટલી હદે વકર્યો કે સમાધિ ટકવાનું પણ મુશ્કેલ બની ગયું એથી જ એમણે ખંભાત પાસે આવેલી શેઢી નદીના કિનારે આજીવન અનશન કરવાની પૂરી તૈયારીઓ કરી લીધી પરન્તુ તે જ વખતે પદ્માવતીજીએ પ્રગટ થઈને તેમને અનશન કરતાં વાર્યા; એટલું જ નહિ, પરન્તુ તેમની રોગપીડાને શાંત કરી અને તેમને શેષ જીવન આગમગ્રંથોની ટીકા રચવામાં લગાવી દેવાની નમ્ર વિનંતી કરી. ત્યાર પછી અભયદેવસૂરિજીએ નવ અંગોની ટીકા તૈયાર કરીને જૈનશાસનની બેનમૂન સેવા કરી.
