________________ જૈન ઇતિહાસની ઝલક 163 ચાચિંગ મંત્રીશ્વરની હવેલીએ પહોંચે તે પૂર્વે જ સૂરિજીએ મંત્રીશ્વરને સઘળી માહિતીથી વાકેફ કરીને ચાચિંગને શાન્ત પાડી દેવા માટે જણાવ્યું. જેવો ચાચિંગ હવેલીએ આવ્યો કે રમતો ચાંગો, “બાપુજી ! બાપુજી !' કહેતો તેમને વળગી પડ્યો. ઉદયને તેને ખૂબ સારી રીતે સત્કાર્યો. પછી પકવાનોનું ભોજન થયું. ચાંગદેવ બાપુજીના ખોળામાં બેસીને જ સાથે જમ્યો. ભોજનવિધિ પતી ગયા બાદ પહેરામણી કરવાનો રિવાજ જણાવીને કેટલીક વસ્તુઓ લાવ્યો. ચાચિંગને એક ધોતી-લોટો આપ્યો. ત્યાર બાદ ત્રણ લાખ સોનામહોર આપી અને છેલ્લે પોતાના દીકરા હાજર કરીને બે હાથ જોડીને ઉદયન મંત્રીએ ચાચિંગને કહ્યું, “અમારા ગુરુદેવ આ ચાંગાના લલાટમાં જૈનધર્મના મહાન પ્રભાવક તરીકેનું ઝળહળતું તેજ જોઈ રહ્યાં છે. તમે ચાંગો અમને સોંપો; અમે તેમની ખૂબ સારી રીતે માવજત કરીશું. એના બદલામાં હું મારા દીકરા તમને સોંપી દેવા તૈયાર છું.” જ્યારે ઉદયન આ શબ્દો બોલતા હતા ત્યારે ચાંગદેવના હૈયે હર્ષ સમાતો ન હતો. ઊભરાઈને બહાર આવેલો હર્ષ તેના પગના થનગનાટમાં છતો થતો હતો. ઉદયનના શબ્દોની ચાચિંગ ઉપર ભારે અસર થઈ. “મારો છોકરો ! મહાન ધર્મપ્રભાવક પુરુષ ! મારાં આવાં સદ્ભાગ્ય ક્યાંથી ?" એનું મન હર્ષવિભોર બનીને ગણગણતું હતું. એણે એક ધોતી-જોટો રાખીને ત્રણ લાખ સોનામહોર પરત કરીને કહ્યું, તમારા પ્રેમના પ્રતીક તરીકે આ ધોતી-જોટો રાખું છું. મારે બીજું કશું ન જોઈએ. મારી ઇચ્છા એ હતી કે તમે જ મારા પુત્રને રાખો અને મોટો કરો. પણ હવે તમારી વાત સાંભળીને હું જૈન-ધર્મગુરુને મારો વહાલો ચાંગો સોંપું છું. તમે તેની પૂરી કાળજી કરજો.” આ સાંભળીને ઉદયન મંત્રીની આંખમાં પણ હર્ષનાં આંસુ આવી ગયા. યોગ્ય સમયે ખૂબ ઠાઠથી ચાંગાની દીક્ષા થઈ. તેમનું નામ સોમચંદ્રવિજય રાખવામાં આવ્યું. ભવિષ્યમાં આ જ આપણા કલિકાલસર્વજ્ઞ હેમચંદ્રસૂરિશ્વરજી મહારાજા બન્યા.
