________________
ગ્રંથકારશ્રીનો ગ્રંથરચનાનો મુખ્ય ઉદ્દેશ નામ અધ્યાત્મીઓના અધ્યાત્મમતની પરીક્ષા કરવાનો છે; અને તેઓએ જે અધ્યાત્મમત માન્યો છે, તે માનવામાં શું શું બાધક છે તે બતાવવા દ્વારા તેઓનો મત ભ્રાંત છે, તેથી મધ્યસ્થ વિદ્વાનો તેમાં અટવાઇ ન જાય તે બતાવવાનો તો તેઓનો ઉદ્દેશ છે જ, પરંતુ સાથે સાથે રત્નત્રયીની સાધના કરતા સાધક આત્માઓને સંપૂર્ણ મોક્ષમાર્ગ શું છે એ બતાવવાપૂર્વક, સાધનાની દિશામાં આગળ વધવા માટે પારમાર્થિક અધ્યાત્મ શું છે, એ સમજાવવાનો પણ છે. સમસ્ત ગ્રંથના અંતે અધ્યાત્મનું ઉપનિષત્ જે વર્ણવ્યું છે તે સ્વાનુભવથી જ જાણી-માણી શકાય તેવું છે. ટૂંકમાં સાધક આત્માને સાધનામાં પ્રાણ પૂરવા માટે આ અધ્યાત્મમત પરીક્ષા ગ્રંથ સાચી દિશા બતાવે છે અને આત્મપરિણતિને નિર્મળ કરવા માટેનો અનુપમ ગ્રંથ છે.
છદ્મસ્થતાવશ આવા બૃહત્કાય ગ્રંથના વિવરણમાં કે સંકલન-સંપાદનકાર્યમાં અનેક ત્રુટિઓ રહેવાની સંભાવના છે. સર્વજ્ઞકથિત પદાર્થોનું ક્યાંય અવમૂલ્યન થઈ ન જાય તે માટે પૂરેપૂરો પ્રયત્ન કરેલ છે, છતાં જિનાજ્ઞાવિરુદ્ધ કે ગ્રંથકારશ્રીના આશયવિરુદ્ધ ક્યાંય પણ પદાર્થ નિરૂપણ થયેલ હોય તો તે માટે મિથ્યા દુષ્કત ચાહું છું.
અંતે એક જ અંતરની ભાવના વ્યક્ત કરું છું કે દેવ-ગુરુની કૃપાથી સ્વઆત્મપરિણતિની નિર્મળતા માટે કરાયેલો આ પ્રયાસ સર્વને લાભનું કારણ બને અને મને પોતાને ભાવપૂર્વકની ક્રિયાની પરિણતિ પ્રાપ્ત થાય, અને એ પરિણતિની નિર્મળતા થવા દ્વારા નિકટના ભાવોમાં મુક્તિસુખની ભાગી બની શકું, એ જ શુભ આશયથી કરેલો આ નાનકડો પ્રયાસ સફળતાને પામો એ જ અંતરેચ્છા.
વિ. સં. ૨૦૫૭, માગસર વદ - ૧૦. બુધવાર, તા. ૨૦-૧૨-૨૦૦૦. એફ - ૨, જેઠાભાઇ પાર્ક, નારાયણનગર, પાલડી, અમદાવાદ - ૭.
પરમ પૂજય પરમારાથ્યપાદ વ્યાખ્યાનવાચસ્પતિ આચાર્યદેવેશ શ્રીમદ્ વિજય રામચંદ્રસૂરીશ્વરજી મહારાજાના શિષ્યરત્ન પ.પૂ. ગચ્છાધિપતિ શ્રીમદ્ વિજય મહોદયસૂરીશ્વરજી મહારાજાના આજ્ઞાવર્તી તથા પ.પૂ. પ્રવર્તિની સાધ્વીશ્રી રોહિતાશ્રીજી મ.સા.ના શિષ્યરત્ના સાધ્વીશ્રી : ચંદનબાલાશ્રીજી.
