________________
૬ : બ્રહ્મચર્યના સંકલ્પનો અદ્ભુત પ્રભાવ
એ ભાઈનું નામ છે હસમુખભાઈ. તેઓ અમદાવાદનાં રહેવાસી છે. એમના એક દીકરાના જન્મ પછી એમની પત્નીની તબિયત બગડી. એવો વિચિત્ર રોગ થયો કે અમદાવાદના લગભગ તમામ ડોક્ટરોને બતાવ્યું અને ઘણી જાતની દવાઓ કરી છતાં ફરક ન પડ્યો. આખરે એ ભાઈ હતાશ થઈ ગયા. પત્નીનું શરીર દિવસે દિવસે વધુને વધુ ક્ષીણ થતું જતું હતું. આમને આમ જો ચાલે તો પત્ની વધારે દિવસો કાઢે એ વાતમાં કાંઈ માલ ન હતો. એ ભાઈને પત્નીના વિયોગમાં પોતે વિધુર થાય એ કરતાં પણ પોતાના બાળકને ઉછેરશે કોણ ? એના જીવનને ધર્મના સંસ્કારથી સુવાસિત બનાવશે કોણ ? એ ચિંતા સતત કોરી ખાતી હતી..
આખરે એમણે સંકલ્પ કર્યો. જો પત્ની સાજી થઈ જાય તો જિંદગી સુધી બ્રહ્મચર્યનું પાલન કરીશ. આવો ઘોર સંકલ્પ થતાં જ જાણે ચમત્કાર થયો. અચાનક ઘરના ફોનની ઘંટડી રણકી. ભાઈએ ફોન ઉપાડ્યો. સામેથી એક લેડી ડોક્ટર બોલી રહ્યા હતા. ‘તમારા પત્નીને કેમ છે ?” એમ હસમુખભાઈને પૂછતાં એમણે કહ્યું મને હવે અમદાવાદના કોઈ ડોક્ટરમાં રસ રહ્યો નથી. અમદાવાદના બધા જ ડોક્ટરોને મેં બતાવ્યું. તેઓ રોગને દૂર તો નથી કરી શક્યા પરંતુ રોગનું નિદાન પણ નથી કરી શકતા' લેડી ડોક્ટરે કહ્યું કે-“તમે મારી પાસે તો હજી સુધી તમારા પત્નીને લાવ્યા જ નથી. ત્યાં સુધી તમે એમ કેમ કહી શકો કે મેં અમદાવાદના બધા જ ડોક્ટરોને બતાવી દીધું? તરત જ આ ભાઈ પોતાના પત્નીને લઈને પેલા લેડી ડોક્ટર પાસે ગયા. દર્દીને તપાસીને જ આ લેડી ડૉક્ટરે કહી દીધું કે બેનને રોગ જુદો છે અને આજ સુધી દવા જુદી અપાઈ છે. એમને છે સુવારોગ (સુવાવડનો રોગ) અનેે આજ સુધી ટાઈફોડની દવા અપાઈ છે. થોડા દિવસમાં લેડી ડોક્ટરની દવાથી એ બેન તો સાજા થઈ ગયા પણ તેમના પતિદેવ તો આજે પણ એક જ વાત કરે છે કે દવા અને ડોક્ટર તો નિમિત્ત માત્ર છે. બાકી મારા બ્રહ્મચર્યના પવિત્ર સંકલ્પના પ્રભાવે જ તે બચી ગઈ છે !!!...
બહુરત્ના વસુંધરા-ભાગ બીજો = ૫૫
E
