________________
૧૪૫ : ૧૦ વર્ષથી દર પર્યુષણમાં અઠ્ઠાઈ તપ કરતા સુરેશભાઈ અંબાલાલ પારેખ (નાપિત)
પેટલાદ તાલુકામાં આવેલ નાર ગામમાં સં. ૨૦૪૨માં વૈરાગ્યદેશનાદક્ષ પ. પૂ. આ. ભ. શ્રી વિ. હેમચંદ્રસૂરીશ્વરજી મ. સા. ના શિષ્ય પૂ. મુનિરાજ શ્રી નિપુર્ણચંદ્રવિજયજી મ. સા. (હાલ પંન્યાસ)નું ચાતુર્માસ થયું. તેઓશ્રીની જન્મભૂમિ પણ નાર ગામ જ હતી. પરિણામે ગામમાં નાપિતનો વ્યવસાય કરતા અંબાલાલભાઈ પારેખ તેમના સંસર્ગમાં આવ્યા. ધીરે ધીરે પ્રાયઃ દરરોજ વ્યાખ્યાનમાં આવતાં સત્સંગનો રંગ બરાબર લાગ્યો. ચાતુર્માસ બાદ મ. સા. તો વિહાર કરી ગયા. પણ અંબાલાલભાઈના માનસ પટ ઉપર જૈન ધર્મની અમીટ છાપ ઉપસાવતા ગયા !
ત્યારબાદ કર્મસંયોગે ટૂંક સમયમાં જ અંબાલાલભાઈનું અવસાન થયું. પરંતુ અંતિમ સમયે પણ કોઈ કુટુંબીજનોને યાદ ન કરતાં ઉપરોક્ત પૂ. મ. સા. નું જ નામ તેમના મનમાં અને મુખમાં હતું. પરિણામે તેઓ અંતિમ સમયે પણ ખૂબ જ સ્વસ્થતા જાળવી શક્યા.
આ પ્રસંગ ઉપરથી તેમના યુવાન પુત્ર સુરેશભાઈના (હાલ ઉ. વ. ૪૫) માનસપટ ઉપર પણ જૈન સાધુ મ. અને જૈન ધર્મ પ્રત્યે આકર્ષણ જાગ્યું. કેટલાક સમય બાદ પુનઃ ઉપરોક્ત પૂ. મુનિરાજશ્રીનું નાર ગામમાં પદાર્પણ થતાં સુરેશભાઈ પણ તેમના વિશેષ પરિચયમાં આવ્યા અને તેઓશ્રીની પ્રેરણાથી જૈન ધર્મની આરાધના કરવા લાગ્યા.
આજે તેઓ બસ ડેપોમાં સરકારી નોકરી કરે છે. છતાં રોજ જિનપૂજા અચૂક કરે છે. તથા છેલ્લા ૧૦ વર્ષથી દર પર્યુષણમાં ૮ ઉપવાસ અચૂક કરે છે. તેમના ધર્મપત્ની પણ સુશીલ અને સંસ્કારી છે. તેમને પણ જૈનધર્મ પ્રત્યે સારું બહુમાન છે. પરિણામે અવાર નવાર જૈન સાધુ-સાધ્વીજી ભગવંતોને સુપાત્રદાન કરવાનો લાભ પણ તેઓ લેતા રહે છે.
સરનામું
સુરેશભાઈ અંબાલાલ પારેખ
મુ. પો. નાર
તા. પેટલાદ (ગુજરાત)
પીન ઃ ૩૮૮૧૫૦
બહુરત્ના વસુંધરા-ભાગ બીજો = ૩૧૨
