Book Title: Munisuvratasvamicarita
Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad
View full book text ________________
सिरिमुनिसुव्वयजिणिदचरियं
२११ सिरिवम्मवसंतसिरीजुयलं अब्भत्थिउं मम गिराए । एत्थ समाणेयव्वं पाहुणयं मज्झ कइवि दिणे ।।६७७६।। सिरिवम्मो आह तओ वासवदत्तेण भाणियं जुत्तं । अम्ह वि काउं उचियं इमं परं असमओ एसो ॥६७७७।। तत्थागमणे अम्हाण संपयं पाउसो जओ नियडो । मग्गे वच्चंताणं जइ वि न बुद्धि कुणइ मेहो ॥६७७८।। तह विहु तत्थ गयाणं निवडइ नियमेण पाणियं तत्तो। विणियत्तिउंन सक्कं जाव न जाओ सरयसमओ।।६७७९।। तो जंपइ वरदत्तो कुमार! किं दूसणं तओ होही । जइ ठाइस्सह तुब्भे कइवयमासे कह वि तत्थ ।।६७८०।। तो पभणइ सिरिवम्मो एयं चिय दूसणं हवइ गरुयं । जं नरपुंगवरन्नो आणाए विणा चिरं अम्हे ।।६७८१।। देसंतरम्मि गंतुं चिट्ठामो तो भणेइ वरदत्तो । वासवउरम्मि तुब्भे वच्चह वच्चामि अहमिन्हि ॥६७८२।। एत्तो चंदउरीए नरपुंगवपत्थिवस्स जहवत्तं । साहेउं रूसंतं तमुवरि तुम्हाणं रक्खेमि ॥६७८३॥ पुण पभणइ सिरिवम्मो एयं न हु होइ संगयं कह वि । जं मुंडिऊण सीसं पुच्छिज्जइ तयणु नक्खत्तं ॥६७८४।। चेइयहरेसु इन्हि अहं गमिस्सामि तं वसंतसिरि । गंतुं पासह पच्छा तुम पि एज्जह जिणगिहेसु ॥६७८५।। तं इय भणिऊण तओ हक्कारेऊण वणसिरि भणइ । जह मह वयणेण तुमं गंतुमिमं भण वसंतसिरि ॥६७८६।। तुह पिउणा वरदत्तो पहाणपुरिसो इहत्थि पट्ठविओ । तं आलविऊण तुमं तेण समं जिणहरे एज्ज ॥६७८७।। इय वणसिरि भणेउं तंबोलं दाविऊण वरदत्तं । पट्ठावइ तीए सह वसंतसिरिअंतिए कुमरो ॥६७८८।। अह सावयपट्टवियं पत्तं हक्कारयं जिणगिहाओ । कुमरस्स तह। कहियं केणइ पल्लाणिया करिणी ॥६७८९।। तो उट्ठिऊण कुमरो आसणओ वयइ ओवरयमज्झे । वरवत्थाहरणेहि काऊणं तत्थ सिंगारं ॥६७९०।। जा निग्गओ करेणुं आरुहिउमणो तओ वणसिरीए । सो विन्नत्तो जह पह ! सामिणिपासे खणं एह ।।६७९१।। अह वणसिरिवयणेणं गओ कुमारो वसंतसिरिपासे । उठेउं वरदत्तो तत्तो बाहिम्मि उवविट्ठो ॥६७९२।। कुमरस्स वसंतसिरी दाऊणं आसणं सहत्थेण । विन्नवइ मउलियकरा जह वरदत्तेण मह पुरओ ।।६७९३।। कहियं नियमागमणप्पओयणं तह य तस्स तुम्हेंहिं । जं दिन्नमुत्तरं तं पि साहियं तेण तो इन्हि ।।६७९४।। काउं गरुयपसायं मझुवरि कुमार ! निययविन्नत्ति । एरिसयं पट्टावह तुब्भे नरपुंगवनिवस्स ॥६७९५।। वासवदत्तनिवेणं हक्कारयमत्थि अम्ह पट्टवियं । वासवपुरगमणत्थं तत्थुचियं किच्चमाइसह ॥६७९६।। अज्ज दिणेण सह जओ सत्त दिणाई भविस्सए एत्थ । तुम्हाणमवत्थाणं तेत्तियदियहेहिं पुरिसो वि ।।६७९७।। तुम्हच्चओ गहेउं नरपुंगवनिवइणो समाएसं । एत्थागमिस्सइ तओ तस्साइटें करिज्जासि ॥६७९८॥ तीसे उवरोहेणं कुमरेणं तक्खणे विलंबेउं । विन्नत्ती पट्टविया पिउणो नरपुंगवनिवस्स ॥६७९९।। आरुहिण करेणुं तओ गओ जिणहरम्मि सिरिवम्मो । तयण वसंतसिरीए सह वरदत्तो वि तत्थ गओ।।६८००।। जह पढमदिणं अन्ने वि पंच दियहा तहेववइक्कता । सिरिवम्मस्स कुमारस्स जिणहरासत्तहिययस्स ।।६८०१।। अह सत्तमम्मि दियहे नरपुंगवनिवइणो समीवाओ । पडिलेहं गहिऊणं पेसियपुरिसो समायाओ ।।६८०२।। गोसग्गे गिहपडिमापूयं काऊण उट्ठियस्स तओ । सिरिवम्मस्स समप्पइ तं लेहं सो पणमिऊण ।।६८०३।। कूमरो वि छोडिऊणं तं वायइ जाव ताव तत्थ लहं। तस्स नरपुंगवणं वासवपुरगमणमणुनायं ।।६८०५ हक्कारिउं वणसिरिं तं अप्पावइ वसंतसिरिहत्थे । लेहं सयं तु पुच्छइ वत्तं लेहारयसमीवे ॥६८०६।। सो कहइ इओ चलिओ चंदउरीए अहं दिणे तइए। पढमे पहरे पत्तो अत्थाणगए नरवरम्मि ॥६८०७।। तं पणमिऊण तप्पायअग्गओ ठाविओ मए लेहो । सो आसन्ननिसन्नेण वियडिउं अप्पिओ हत्थे ।।६८०८।। नरपुंगवस्स रन्नो पहिट्ठचित्तेण तेण सव्वं पि । लेहत्थं अवगमिऊण विम्हिएणं अहं पुट्ठो ॥६८०९।।
Jain Education International
For Private & Personal Use Only
www.jainelibrary.org
Loading... Page Navigation 1 ... 242 243 244 245 246 247 248 249 250 251 252 253 254 255 256 257 258 259 260 261 262 263 264 265 266 267 268 269 270 271 272 273 274 275 276 277 278 279 280 281 282 283 284 285 286 287 288 289 290 291 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 