Munisuvratasvamicarita

Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad

Page 329

२९६
सिरिमुनिसुब्बयजिनवण्णण सम्मज्जिओवलित्तं जहाहिसेए तहेव कुव्वंति । निवयंति उप्पयंति य जाव पहावेंति वग्गंति ।।९५२६।। सिंघाडगतिगचच्चरचउक्कचउमुहमहापहपहेसु । अत्थत्थिया य कामत्थिया य लाभत्थिया चेव ।।९५२७।। इय' अन्ने विय बहवे नरनारिदेवदेविसंघाया । इट्ठाहि वग्गूहि अभित्थुणंता इय वयासी ॥९५२८॥ जय जय नंदा जय जय भद्दा जयविजय नंद भदं ते। जय खत्तियवरवसभा ! भगवं बुज्झाहि लोगपह ।।९५२९।। सव्वजगज्जीवाणं हियसुहनिस्सेसकारयं पवरं । निक्कारणकरुणापर ! पवत्तहा धम्मतित्थं ति ॥९५३०॥ जय जय नंद तवेणं जय जय जिण ! नंद संजमेणं च । दंसणनाणचरित्तेहि उत्तमेहि अभग्गेहि ।।९५३१।। अजियाइं इंदियाइं जिणाहि पालह जियं समणधम्म । सियविग्यो सयकालं वसा हि तं सिद्धिमज्झम्मि ।९५३२।। निहणाहि विजियतिजए रागद्दोसे महाबले मल्ले । धिइधणियबद्धकच्छो तवेण महाहि कम्मरिउं ।।९५३३॥ झाणेण उत्तमेणं सुक्केण पयायसत्तुपरिचत्तो। तेलोक्करंगमज्झे हराहि आराहणपड़ागं ॥९५३४॥ वितिमिरमणुत्तरं खिप्पमेव पाउणह केवलं नाणं । गच्छह य पयं परमं जिणदिठेणुज्जुमग्गेण ।।९५३५।। सेन्नं परीसहाणं निहणित्ता अभिभवित्तु उवसग्गे । हवउ अविग्धं धम्मे तुह त्ति अभिणंदिय थुणंति ।।९५३६।। पिंडीहवंत तेलोक्कलच्छिनीसेससमुदओ एवं । भयवं अभिथुव्वंतो उ वयणमालासहस्सेहिं ।।९५३७।। पेच्छिज्जतो फुल्लतनयणमालाण सयसहस्सेहिं । नंदिज्जतो उल्लसियहिययमालासहस्सेहिं ।।९५३८।। छिप्पंतो य मणोरहमालाण अणेगसयसहस्सेहिं । पत्थिज्जतो वररूवकंतिगुणनिवहसहसेहिं ।।९५३९।। हत्थेण दाहिणेणं बहूण नरनारिदेवदेवीण । सययं पडिच्छमाणो अंजलिमालासहस्साई ॥९५४०।। समइच्छंतो उत्तुंगभवणपंतीण बहुसहस्साई। उप्पायंतो परमं पमोयमवलोयमाणाण ॥९५४.१ ।। गेयज्झुणिम्मि महुरे तंतीतलतालतुडियरवबहले। जयजयसद्द ग्घोसेण मंजुणा मासलिज्जते ॥९५४२।। हयहेसियसद्देहि हत्थीणं गुलुगुलाइयरवेहिं । रहघणघणाइएहि जणस्स गुरुकलकलरवेहिं ।।९५४३।। सव्वत्तो पसरते निक्खमणमहसवं जिणवरस्स । कहिउं व सव्वभुवणोयरम्मि अच्छरियसंजणयं ॥९५४४।। गिरिकंदरदरिविवरेसु भवणपासायदेवनिलएसु । सिंघाडगतिगचच्चरचउक्कचउमुहमहपहेसु ॥९५४५।। आरामुज्जाणसभाकाणणपमुहेसु सुबहुठाणेसु । उट्ठियपडिसद्दसहस्ससंकुले नहयले होते ॥९५४६।। कविलम्मि जायमाणे गयणयले सुरहिगंधचन्नेहि। डझंतवरागुरुकंदुरुक्कधूवस्स धूमेहिं ।।९५४७।। वासिज्जते सयलम्मि जीवलोए निरंतरालम्मि। धावते पउरजणे इओ तओ बोलबहलम्मि ।।९५४८॥ जाव कुसग्गं नयरं जाव सुराणं विमाणभवणाई। ताव सुरदेविनियरे निरंतरं संचरंतम्मि ।।९५४९।। मझमज्झेणं चिय कुसग्गनामस्स तस्स नयरस्स। जेणेव य नीलगुहा जेणेव असोयवरसाही ।।९५५०।। तेणेव उवागच्छइ आगच्छित्ता असोयतरुहेट्ठा । सीयं धारेइ तओ पच्चोरुहिऊण सीयाए ।।९५५१।। सयमेव अलंकारे सव्वे ओमयड आणपुव्वीए। तस्स य कुलमहयरिया ओरुहिउं तयणु सोयाए ।।९५५२॥ . वरहंसलक्खणेणं मिउणा पडसाडएण तं सव्वं । मल्लाभरणालंकारमाइयं सा पडिच्छेइ ।।९५५३।। छिन्नगुणहारविगलंतविमलमुत्ताहलप्पगासाइं । अंसूणि विणिमुयंती कदंती तह य विलवंती ।।९५५४।। भगवंतं मुणिसुव्वयसामि एवं पभासए पयया। तइलोयसुप्पसिद्ध हरिवंसकुले विसालम्मि ।।९५५५।। जाओ सि तुमं जाया! गोयसगोत्तो तुमं सि खलु जाया! । उइओइयकुलनरवइसुमित्तपुत्तो सि तं जाया! ॥९५५६।। सुविसुद्धजच्चखत्तियगोत्तसमब्भूयखत्तियाणीए। पउमावइदेवीए देहुप्पन्नो सि तं जाया! ।।९५५७।।