Munisuvratasvamicarita

Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad

Page 373

३४०
गंथपसत्थि
तद्दिणपभिइपयारो जाओ पाएण तीए सव्वत्थ । जे तेण सयं रइया गंथा ते संपइ कहेमि ॥१०९४२।। सुत्तमवएसमालाभवभावणपगरणाण काऊण । गंथसहस्सा चउदस तेरस वित्ती कया जेण ।।१०९४३।। अणुओगद्दाराणं जीवसमासस्स तह य सयगस्स । जेणं छ सत्तचउरो गंथसहस्सा कया वित्ती ।।१०९४४।। मूलावस्सयवित्तीए उवरि रइयं च टिप्पणं जेण । पंचसहस्सपमाणं विसमट्ठाणावबोहयरं ।।१०९४५।। जेण विसेसावस्सयसुत्तस्सुवरि सवित्थरा वित्ती । रइया परिफुडत्था अडवीस सहस्स परिमाणा ॥१०९४६।। वक्खाणगुणपसिद्धि सोऊणं जस्स गुज्जरनरिंदो। जयसिंह देवनामो कयगुणिजणमणचमक्कारो ।।१०९३७।। आगंतूणं जिणमंदिरम्मि सयमेव सुणइ धम्मकहं । जस्स उवउत्तचित्तो सुइरं परिवारसंजुत्तो ।।१०९४८।। कइया वि जस्स दंसणउक्कंठियमाणसो सयं चेव । आगच्छइ वसहीए चिरकालं कुणइ संलावं ।।१०९४९।। अन्नम्मि दिणे अब्भत्थिऊण नेउं नियम्मि धवलहरे। सम्महमठेऊणं जयसिंहनिवेण जस्स सयं ॥१०९५०।। उड्ढट्ठियस्स उल्लसियबहलपुलएण कंचणमएण। विउलेण भायणेणं दुव्वाफलकुसुमजलमइओ ॥१०९५१।। अग्यो भमाडिऊणं चिरेण आरत्तियं च वारतियं । पक्खित्तो पयपुरओ कओ पणामो य पंचंगो ॥१०९५२।। थालपरिवेसियाओ आहाराओ तओ सहत्थेण । दिन्नो नियइच्छाए चउव्विहो तेण आहारो ॥१०९५३।। भणियं च जोडिऊणं करजुयमज्जेव खलु कयत्थो हं । जाओ अज्जेव तहा कल्लाणपरंपरा ठाणं ।।१०९५४।। जस्स मह अज्जभवणं तुब्भेहिं फरिसियं सचरणेहिं । तो अज्ज वीरनाहो अज्जसयं आगओ व्व गिहे ।।१०९५५। जेण जयसिंहरायं भणिऊणं तस्स मंडले सयले । जिणमंदिरेसु कलसा चडाविया रुइरकणयमया ।।१०९५६।। धंधुक्कयसच्चउरप्पभिइसु ठाणेसु अन्नतित्थीहिं। जिणसासणस्स पीडा कीरंती रक्खिया जेण ॥१०९५७।। कारावियं च तह तेसु चेव ठाणेसु रहपरिब्भमणं । निविग्धं जयसिंह भणाविऊणं पुहइ-नाहं ॥१०९५८।। कुनिओइएहि तह जिणहरेसु भज्जतदेवदायाणं । काराविया निवारा जयसिंहनरिदपासाओ ।।१०९५९।। भंडारपविठं पि हु केसु वि ठाणेसु देवदायस्स । दव्वं जिणभवणेसुं पुणो वि अप्पावियं जेण ।।१०९६०।। किं बहुणा भणिएणं जिणसासणपरिभवम्मि जायते । सव्वप्पणावि तुलियं जेण उवायंतरसएहि ।।१०९६१।। जिणसासणकज्जाइं ताइं वि संसाहियाइं इह जेण। अन्नस्स मणम्मि वि विप्फुरंति न हु जाई कइया वि।।१०९६२।। लिंगावसेसमित्ते वि जइ जिणे परिभविज्जमाणम्मि । नियसत्तीए तत्ती जेण कया सव्वकालं पि ॥१०९६३॥ अणहिलवाडयनयराओ तित्थजत्ताए चलियसंघेण। अब्भत्थिऊण नीओ सहप्पणा जो महामहिमो॥१०९६४।। सेज्जावालयलंगडिपमहाणं जत्थ सगडरूवाणं । एक्कारस उ सयाइं संचलियाई समढियाई ॥१०९६५॥ हयकरहवसहवाहणपायचराणं तु नज्जइ न संखा। वामणथलि नयरीए दिन्ना वासम्मि संघेण ॥१०९६६॥ वाडीविमाणएहिं गुड्डरचउखंडएहिं गुलिणीहिं । वियडे विरायमाणे निवखंधावारसारिच्छे ॥१०९६७।। कयकुंकुमंगरायं नियत्थपट्टसुयाइवरवत्थं । कंचणरयणाहरणेहिं भूसियं अंगुवंगेसु ॥१०९६८॥ दठूण सावयजणं जिणहरपरिहावणं पकुव्वंतं । खंगारस्स सुरट्टापहुणो जायं मणं दुढें ॥१०९६९।। अन्नेहि वि सो भणिओ सयमणहिलवाडयस्स नयरस्स । चिट्ठइ लच्छी सव्वा इहागया तुज्झ पुन्नेहि ।।१०९७०।। ता गिन्ह तुमं एवं भंडारो होइ तुह जहा पोढो । संभाविज्जइ ठाणं एक्काए दव्वकोडीए ।।१०९७१।। लोभेण सो वि सब्बं तं गहिउं वंछए पुणो वि परं । सवयणमज्जायालोवअयसभीओ नियत्तेइ ।।१०९७२।। इय अकयनिच्छओ सो गहणे मोक्खे य संसइयचित्तो । किंचूणं दिणमासं संघं धारेइ तत्थेव ।।१०९७३।।