Munisuvratasvamicarita

Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad

Page 359

३२६
विण्हुकुमारमुनिकहा तस्स महापउमस्स य सीहबलो नाम दुटुसामंतो । दुग्गबलेणं देसं उवद्दवंतो न विरमेइ ।।१०५०३।। पुट्ठो य महापउमेण अन्नया एरिसं नमुइमती। जह तं जाणसि कं चि वि उवायमिह सीहबलगहणे ॥१०५०४।। सो जंपइ सुट्ठ अहं जाणामि तओ महापउमकुमरो । तं तस्सुवरि निरूवइ पभूयसेन्नेण संजुत्तं ॥१०५०५।। नमुई वि अखंडेहिं गंतूण पयाणएहिं तद्देसे । निउणेहि उवाएहिं तं दुग्गं संगहेऊण॥१०५०६।। संभग्गदप्पपसरं सीहबलं गिण्हिऊण हत्थेण । एइ महापउमसमीवमेस स तुट्ठो पयंपेइ ।।१०५०७।। मग्गेहि वरं किंचि वि सो बेइ कुमार अप्पणो पासे । धरिऊण ताव एवं मज्झ वरं संपयं मुयह ।।१०५०८।। कज्जम्मि समुप्पन्ने पत्थेमि जया तया पयच्छेज्जा। कुमरो वि महापउमो एवं होउ त्ति पडिवन्नो ।।१०५०९।। अह अन्नया जिणरहो जालाए कारिओ दुइज्जो य । बंभरहो लच्छीए कराविओ ताहिं दोहिं पि ।।१०५१०।। विहिया इमा पइन्ना जइ मज्झ रहो न नीहरइ पढमं तो । भत्तपरिच्चायं करेमि जा जीवमवियप्पं।।१०५११।। पउमुत्तरेण रन्ना एवं नाऊण दोन्ह वि जणीण । तम्मि समयम्मि नयरे पडिसिद्धं रहपरिब्भमणं ।।१०५१२।। एयं च महापउमो नाऊणं वइयरं सजणणीए । उहावण त्ति काउं अकहंतो चेव जणयस्स ।।१०५१३।। एगागी नयराओ नीहरिऊणं महाडवि पत्तो। तत्थ ठिओतावसआसमम्मि दियहाई काइं पि ।।१०५१४।। तत्थ य जणमेजयनरवइस्स धूया समागया अत्थि । तोसे पढमिल्लुयदसणे वि जायाणुरायाए ।।१०५१५।। उवरिम्मि तस्स जाओ अणुराओ माणसम्मि अइगरुओ। सा पिउणो कालनरेसरेण सह जाय जुज्झम्मि।।१०५१६। अंतेउराइलोए पलायमाणे दिसो दिसि वि वसे । भीया पलाइऊणं समागया आसमे तम्मि ।।१०५१७।। अह कुमरमहापउमो विसज्जिओ तावसाण अहिवइणा । तत्तो विणिग्गओ सिधुनंदणे पुरवरे पत्तो॥१०५१८।। तत्थ तया उज्जाणियविणिग्गयं नयरसुंदरी वग्गं । कीलंत मुइयमणं मत्तेण महामइंदेण ।।१०५१९।। गहिउं पारद्धं पासिऊण मोयावए गइंदाओ । तं च गइंदं नेउं नियमइ आलाणखंभम्मि ॥१०५२०।। तत्तो तन्नयरनिवेण वइयरं जाणिऊण तं सव्वं । परिणाविओ नियं कन्नगा सयं सो पहिछेण ॥१०५२१॥ ताहि सह महापउमो विसयसुहं चिट्ठए अणुहवंतो। तह वि न हिट्ठो मयणावलि मणे एस सुमरंतो ॥१०५२२।। अह अन्नया निसाए सुत्तो सयणम्मि खेयरवहुए । वेगवई नामाए अवहरिओ नहयले जतो ॥१०५२३।। पडिबुद्धो तस्स तओ कहियं अवहारकारणं तीए । नेउं वेयड्ढनगे नयरे सूरुदयनामम्मि ॥१०५२४।। विज्जाहराहिवइणो समप्पिओ इंदधणुभिहाणस्स । जयकंत नियधूयं तेण वि परिणाविओ एसो॥१०५२५।। तीए सह विसयसुहं अणुहवमाणो वितं न पम्हुसइ। मयणावलि खणं पि हु तग्गयचित्तो गमइ दियो।।१०५२६॥ चिट्ठतेण कमेणं तेण तओ तत्थ साहिउं सव्वे । खयरिंदे सेढीदुगआहेवच्चं सयं गहियं ॥१०५२७॥ मयणावली विरहिओ तहावि न रइं खणं पि सो लहइ । तो तावसासमे तम्मि एस पत्तो सयं चेव ।।१०५२८।। कइवयविज्जाहरवग्गपरिगओ तावसेहिं तो तत्थ । फलपुप्फाइहि कयं अइगरुयं तस्स सम्माणं ।।१०५२९।। सयधणुसुएण जणमेजएण तत्थेव आगएण सयं । सा मयणावलि कन्ना दिन्ना पउमुत्तरसुयस्स ।।१०५३०।। एसा य इत्थिरयणं तं परिणेउं महापउमकुमरो। गुरुसामग्गीसहिओ नयरे हत्थिणउरे पत्तो ॥१०५३१।। तत्थ जहोचियपडिवत्तिकरणओ जणइ जणणिजणयाण । विम्हु (ण्हु) कुमारस्स य जेट्ठभाउणो गरुय संतोसं अह सो सुव्वयसूरीकमेण पुहईयलम्मि विहरतो । मुणिजणसहिओ पत्तो हत्थिणउरबाहिरुज्जाणे ।।१०५३३।। उज्जाणपालएणं निवेइए सूरिणो समागमणे । पउमुत्तरो नरिंदो विण्हुमहापउमसुयसहिओ ॥१०५३४।।