Munisuvratasvamicarita

Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad

Page 366

सिरिमुनिसुव्वयजिणिदचरियं
परिवालिया विसेसेण पूईया तं पुणो न पूएसि । जइ साहुणो तयट्ठ न किपि अम्हे तुमं वेमो ॥१०७१९॥ जं पुण पभणसि एए घाएयव्व त्ति तं न निव-चरियं । दस्सूणं पि न दीसइ एयं तम्हा अइक्कंते ।।१०७२०।। वासासमए एए अन्नेसु पत्थिवाण देसेसुं । विहरिस्संति तओ सो नमुई विन्डं भणइ एवं ॥१०७२१।। जं भणसि तुम एयं न रायचरियं ति पुव्वपुरिसाओ । आसि मुणीणं परिपूयगत्ति तं जो निवइ पुत्तो ।।१०७२२॥ जणय पिया-मह पपिया-महक्कमेणागयं नरिंदसिरिं । अणुहवइ तस्स एसा मुणिवर धम्मिट्ठया होइ ।।१०७२३।। पढमो चेव अहं नियवंसे राया तओ किमन्नस्स । चरिएण मम न कज्जं समणेहि सत्तरत्तुवरि ॥१०७२४।। पासामि जं भमतं समणं इह तस्स जीवियं नत्थि । अइगच्छह तो तुब्भे अहं न भे किंचिवि भणामि ।।१०७२५।। तो चिंतइ विन्हुमुणी अहो दुरप्पा इमो धुवं नमुई। साहू वहेउमिच्छइ तो मे न उवेक्खिउं जुत्तं ॥१०७२६।। साहूणं पीडा संभवम्मि तो पभणए इमो नमुई । जइ वि तुमं सिववसिओ काउमिमं तह वि मम एक्कं ।।१०७२७॥ वयणं करेसु एयं विवित्तदेसम्मि विक्कमे तिन्नि । मज्झ पयच्छसु जह तत्थ संठिया साहुणो एए ॥१०७२८।। कुव्वंति पाणचायं इमम्मि काले न कप्पए जम्हा । एएसि विहरेउं भूमिपएसे इय पमाणे ॥१०७२९।। दिन्नम्मि तए वयणं मज्झकयं होइ तुह पइन्ना य । परिओसवियसियच्छो तो नमुई भणई जइ सच्च।।११७३०।। एयं भणिय पएसाओ कोवि बाहिं न नीहरइ तेसि । तो देमि विक्कमतियं सामरिसेणं तओ तेण ॥१०७३१।। विन्हु कुमारेण तह त्ति तस्स पडिवन्नमेरिसं वयणं । निग्गच्छइ नयरबहिं नमुई एवं च जंपेइ ।।१०७३२।। विक्कमतियं विइन्नं मए मिणेसु त्ति भणइ तो विन्हू । गहियं तिमिणओ कामो कोवेण विवड्ढिउं लग्गो ।१०७३३। वेउव्वियदेहेणं तो नमुई भयपकंपिरसरीरो । तस्स चरणे विलग्गो भयवं मे खमह अवराहं ।।१०७३४।। असई पि इय भणंतो मुणिणा कंपावियम्मि नियपाए । पडिओ सो धरणियले तो विन्हु मुणीखणेणेव।।१०७३५।। निम्मविय दिव्वरूवो संजाओ लक्खजोयणपमाणो । मणिमउडकुंडलंगयकंकणकेऊरहारेहिं । ।१०७३६।। दिप्पंतसयलदेहो अदिट्ठपुव्वं तओ महाबोंदि । तं पासंता किं नर किं पुरिसमहोरगाईया ॥१०७३७।। वेवंतसव्वगत्ता गलियाभरणच्छरागणसहाया। भीया उत्तत्थमणा विलोलनयणामिहो बेंति ॥१०७३८।। कोणु इमो कि काउं उवढिओ कत्थ पत्थिओ वावि । संचारिमोच्चमंदरगिरिराओ एस पडिहाइ ॥१०७३९।। नरलोयसग्गलोयाण अंतरालस्स केत्तियं माणं । एवं नाउं वइमो को वि महप्पा विवड्ढेइ ॥१०७४०।। एसा वसुंधरा तेण पायदद्दरयमायरंतेण । कंपाविया ससेला सकाणणा सनयरग्गामा ॥१०७४१।। वसुहा कंपेणं जलहिणो य उच्छालिया गुरुतरंगा। सव्वाओ वि नईओ पडिपहगमणाओ जायाहो ॥१०७४२।। जोइसचक्क भयविवसमाण संविहडियं समग्गं पि । भवणवइवाणमंतरदेवगणा दूरमुत्तत्था ॥१०७४३।। एत्यंतरम्मि चलियासणम्मि सक्को पउंजए ओहि । पासइ य तहारूवं तं विन्हुकुमारमणगारं ॥१०७४४।। गंधव्वाणीयस्स य नट्टाणीयस्स तयणु अहिवइणो। सद्दाविऊण एवं सुरेसरो ते समाइसइ ।।१०७४५।। भो भो निसुणह तुब्भे एसो भयवं महामुणी विन्हु । कयघोरतवच्चरणो नमुइअणायारपरिकुविओ।। १०७४६।। तेलोक्कं पि समत्थो ढालेउं ता तयंतिए गंतुं । साणुणयगीयनट्टो वहारओ सिग्घमुवसमह ॥१०७४७।। इय सक्के णाणत्ता तिलोत्तमा उव्वसी य रंभा य । सामा य चक्खु विसए पणच्चिया तस्स वरमुणिणो।।१०७४८।। आउज्जाणिय अप्फालियाणि कन्नाण तह य आसन्नं । तुंबुरुनारयहाहा हूहू विस्सा वसूहिं च ॥१०७४९।। सुइसुहजणयं गीयं थुणमाणेहिं पगब्भवयणेहिं । खंतिगुणवन्नणाहिं य जिणनामग्गहणपुव्वं च ॥१०७५०॥