Munisuvratasvamicarita

Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad

Page 356

सिरिमुनिसुव्वयजिणिंदचरियं
३२३
तेण समं तत्थ गओ सुव्वयसूरीण सन्निहाणम्मि । दिट्ठा य सूरणो तेण पढमसंपत्तलोयाण ॥१०४०८।। धम्मं वागरमाणा अह सो निमिऊण एगदेसम्मि । उवविट्ठो सिरिधम्मो नरेसरो नमुइणा सहिओ ।।१०४०९।। तो झत्ति नमुइमंती सुव्वयसूरि पभासए एवं । भो भो समणग! सम्मं जा परिभावेमि ता तुब्भे ।।१०४१०।। अवियाणियपरमत्था असमिक्खियमेव कुव्वह समग्गं । जम्हा सक्खं अणुहूयमाणआणंदसंदोहं ॥१०४११।। विसयसुहं चइऊणं असेसपासंडिदूसिओ एसो । जिणधम्मो पडिवन्नो विसिट्ठलोएण परिचत्तो ॥१०४१२।। नियविहवमुज्झिऊणं भिक्खा पडिगाहिया तहा एयं । केत्तियमेत्तं अज्ज वि तुम्हं मलमलिणदेहाणं ॥१०४१३।। असुइत्तेण पिसायागिईण मुंडियसतुंडमुंडाणं । जत्थ न तिपुरिसपूया न य हुणणं हव्ववाहस्स ।।१०४१४।। न य दियवराण दाणं तत्थ विमूढा कहं हवइ धम्मो? । इय तव्वयणं सोउं सूरी चिन्तेइ सो एवं ॥१०४१५।। जह एसो मूढप्पा असमिक्खियभासओ सढो बाढं । तो इमिणा सह मोणं मोत्तुं वोत्तुं न जुत्तं मे ॥१०४१६।। उत्तं च बुहो उज्जू अभिगम्मो बुहसढे य अपमाओ । अणुकंपो अबुहुज्जू अबुहसढो सव्वहा हेओ ॥१०४१७।। इय चितिऊण सूरी मोणेण ठिओ तओ नमुइमंती। चिंतेइ एस मुंडो संजाओ पडिहयप्पडिभो ॥१०४१८।। सक्केइ कि पि दाउं न उत्तरं इय मणे विचितेउं । तस्सुत्तेयण हेउं पुणो पुणो भणइ तं चेव ॥१०४१९।। चितेइ तओ सूरी एसो अवहीरिऊण मुक्को वि । नोवसमइ खलपगई जाव न भग्गो इमस्स मओ ।।१०४२०।। सिंभो व्व दुज्जणजणो महुरेहिं पकुप्पए अइसएण । तिखेहि य कडुएहिं य उवेइ सो उवसमं झत्ति ।।१०४२१।। इय चितिऊण सूरीहिं पभणिओ सो इमं नमुइमंती। किं भो पुणो पुणो वि य तं चिय पलवसि असंबद्धं ।।१०४२२।। जइ अत्थि वयणसत्ती तुह का वि तओ समीहियं पक्खं। कि पि गहिऊण हेउं तत्थ सदिद्रुतमुल्लवह।।१९४२३।। एत्थंतरम्मि सूरी केण वि नमिऊण नियविणेएण । सविणयमिय विन्नत्तो भयवं! मा कुणह संरंभं ॥१०४२४।। एत्तियमेत्तं एयस्स उवरि तुब्भे सयं जओ एसो। मूढो जडो दुरप्पा अदिट्ठसद्धम्मपरमत्थो ।।१०४२५।। मत्तकरिकरडपाडणखरनहरसिहो कहि पि कि सीहो । सज्जेइ नियकम नियडमागए जंबुयसिसुम्मि।।१०४२६।। ता एत्थ मज्झ दिज्जउ आएसो झ त्ति जेण एयस्स । नासेमि दप्पसप्पं दुरप्पणो दलियसत्तिस्स ।।१०४२७।। तो गुरुणाणुन्नाओ आढत्तो नमुइमंतिणं भणिउं । सो एवं जह तुमए विसयासेवा सुहसरूवा ॥१०४२८।। जं भणिया तं वयणं तुज्झ असंबद्धमेव सव्वं पि । जम्हा केसि पि समुल्लसंतउत्तमविवेयाण ।।१०४२९।। विसयसुहं विसकंदलिसरिसं पडिहासए नियमणम्मि । रोगुब्भवत्तणेणं जेण इमं दारुणविवागं ।।१०४३०।। एक्कक्केण वि विसया सेविज्जंता हणंति पाणिगणं । तस्स कह होइ कुसलं जो पंच वि सेवए जुगवं ।।१०४३१।। उक्तं च केनापि-- एकैकशोऽपि निघ्नन्ति विषया विषसन्निभाः । क्षेमी तु स कथं नु स्याद् यः समं पञ्च सेवते ॥१०४३२॥ जो विहु रागंधाणं विसएसु हवेज्ज सोक्खआभासो। सो वि तडिइंडविलाससालिसो न चिरकालठिई।।१०४३३॥ उक्तं च-- विषयसुखं खलमैत्री सन्ध्यारागः सुरेन्द्रकोदण्डं । कलिकालयौवनं जीवितं च सर्वाण्यनित्यानि ॥१०४३४।। होऊण जं पणस्सइ सुहस्सरूवं सुहं न तं विबुहा । मन्नंति किंतु बहुदुहहेउत्तणओ दुहं चेव ॥१०४३५।। उक्तं च--सुखास्वादलवो योऽपि संसारे सत्समागमात् । स वियोगावसानत्वादापदां धुरि बध्यते ॥१०४३६।। सुहमेव तं न भन्नइ सुहं विवेईहिं जमवसाणम्मि । उप्पायइ पउरदुहं ति मीणवडिसामिससुहं व ॥१०४३७॥