Book Title: Munisuvratasvamicarita
Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad
View full book text ________________
सिरिमुनिसुव्वयजिणिदचरियं
२६३ नाऊण ताव तेसि बहुदुक्खुप्पायणं तओ काउं । दुग्गइगमणोवायं चितेऊणं नियमणम्मि ।।८४७३।। अइदीहरं पि देहं उवसंहरिऊण देवसत्तीए । काऊण भरहमणुयाणुसारओ धणुसयपमाणं ।।८४७४।। सह कप्पपायवेहिं सो देवो ताइं दोन्नि वि इमम्मि। आणेइ भरहवासे देसे अंगाभिहाणम्मि ।।८४७५।। चंपाए नयरीए तत्थ य इक्खागुवंससंभूओ । नामेण चंदकित्ती राया पंचत्तमणुपत्तो ।।८४७६।। सो य अउत्तो तत्तो ते सव्वे सामिवज्जिया जाया । सामंतमंतिसहिया नायरया सामियं अन्नं ।।८४७७।। निवलक्खणगुणजुत्तं अन्नेसंता भमंति नयरीए । अह सो उवसोहंतो देवो दिव्वाए रिद्धीए ।।८४७८।। तेसिं पुरओ ठविउं तं मिहुणं कप्पपायवेहि समं । पभणइ भो भो तुब्भे अमच्चपउरा ! ससामंता ! ।।८४७९।। मज्झ निसामेह गिरं तुम्हाण नरीसरो विहिवसेण । एस अउत्तो पत्तो पंचत्तं संपयं तत्तो ।।८४८०।। तुब्भे गवेसयंता चिट्ठह अन्नं नराहिवं कं पि । तेण मए तुम्ह कए हरिवासाओ समाणीओ ।।८४८१।। एसो असेसनरव इलक्खणसमलंकिओ गुणनिवासो। हरिनामो एसो उण हरिणीनामा इमस्स पिया ।।८४८२।। नीसेसगुणगणजुया आणीया एत्य चंपनयरीए । ता वज्जपउमसत्थियचक्कंकुसभूसिओ एसो ।।८४८३।। सिरिवच्छंकियवच्छत्थलो य तुम्हाण सामिओ होउ । नयविक्कमसंपन्नो पुहईए पालणसमत्थो ।।८४८४।। सव्वोउया व एए कप्पमहापायवा फलसमिद्धा । मिहुणस्स इमस्स मए अहारत्थं इहाणीया ।।८४८५।। एसिं च पायवाणं फलाई गहिऊण मंसरसएणं । सावयविहगादीणं संजोएऊण तुम्हेहिं ।।८४८६।। एएसि दोण्हं पि हु आहारो पइदिणं पि दायव्वो। भक्खेहि य पाणेहिं य अउव्वऽउव्वेहिं पउरेहिं ।।८४८७।। उवयरियव्वाइं इमाइं तयणु सुयलावयाइमंसेहिं । मंसरसाईहि य केवलेहि भुंजावियव्वाइ ।।८४८८।। एसेव य आहारो एएसि देहबलकरो होही। इंदियपल्हायणओ वीरियसंवद्धणो तह य ।।८४८९।। देवस्स इमं वयणं तह त्ति पडिवज्जिऊण परमेण । विणएण सीसविणिहियकरंजली कयपणामा य ।।८४९०।। ते सव्वे वि हु सामंतमंतिनरनाहनायरप्पमुहा । आरोहेऊणं रहवरम्मि हरिसेण तं मिहुणं ।।८४९१।। धारिज्जतेणं उवरि धवलछत्तेण छणससिसमेण । नीहारहारनिम्मलढलंतवरचामरेहिं च ॥८४९२।। पुरओ अप्फालियबहुपयारतूरोहगहीरघोसेहिं । पडिसद्दियसयलदियन्तरालमुहलीकयनहेहिं ।।८४९३।। उद्दामसद्दबंदियणवंदउग्घुट्ठजयजयरवेण । पेच्छणयगीयवाइयनदे॒हिं य कीरमाणेहिं ।।८४९४।। नयरीए पवेसेउं नेऊण नरिंदमंदिरे तत्थ । हरिणो विच्छड्डेणं कुणंति रज्जम्मि अहिसेयं ।।८४९५।। तित्थम्मि वट्टमाणे सीयलनाहस्स चंपनयरीए । ठविउं हरि नरिंदं सुरलोए सो सुरो पत्तो ॥८४९६।। देवोवइट्टमंसाहाराइपओगओ पइदिणं पि। तं उवयरंति पुवुत्तमंतिसामंतमाईया ।।८४९७।। अह सो हरी नरिंदो परमपरक्कमनएहिं महिवलयं । तिजलहिमेहलमेरं पसाहए पणयसामंतं ॥८४९८।। रयणाई जाइं काइं वि वेरिनरिंदाण आसि रज्जेसु । कन्नाहिं समं गहियाइं ताइं एएण सव्वाइं ।।८४९९।। मसाइपवित्तीए सुरसत्तीए य तस्स मिहुणस्स । अपवत्तिऊण आउस्स तो ठिती पलहुया जाया ॥८५००।। पंचपयारे भोए एसो बहुयाई वासलक्खाई । भुंजतो हरिणीए जणयइ पुत्तं पवरकित्ति ॥८५०१।। पुहईवइ ति नामं जाओ एसो कमेण गहियकलो। सूरो सरलो चाई दक्खिन्नपरो खमावंतो ॥८४०२।। हरिनरवई वि सह पिययमाए हरिणीए विहियबहुपावो । मरिऊण गओ नरयं तिव्वमहावेयणं घोरं ।।८५०३।। हरिवासाओ हरिओ हरिनामो नरवई इमो जेण। एयस्स तेण वंसो हरिवंसो नाम संजाओ ।।८५०४।।
Jain Education International
For Private & Personal Use Only
www.jainelibrary.org
Loading... Page Navigation 1 ... 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 