Munisuvratasvamicarita

Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad

Page 319

सिरिमुनिसुव्वयजिनजम्मवण्णणं चारगनिरुद्धमणुयाण मोयणं माणवड्ढणं तह य खिप्पामेव करावेह नयरमेयं च नीसेसं ॥९१९९।। सब्भितरबाहिरयं आसियसम्मज्जिओवलित्तं च । संघाडगतिगचच्चरचउक्कचउमुहपहपहेसु ॥९२००।। मंचाइमंचकलियं ऊसवियचलंतधयवडाडोवं । गोसीसरत्तचंदणविइन्नपंचंगुलितलं च ॥९२०१।। उवचियचंदणकलसं चंदणघडसुकयतोरणदुवारं । वग्घारियसुविउलवट्टमल्लमालाकलावं च ॥९२०२।। नवसरससुगंधिदसद्धवण्णकुसुमोवयारकयसोहं । कालागुरुपवरतुरुक्कधूवगंधुद्धयभिरामं ॥९२०३।। मुट्ठिगनडनट्टगजल्लमल्लवलंबगाइरमणिज्जं । आइक्खगलासगकहगपवगमंखेहि संकिन्नं ॥९२०४।। तह लंखतुंबवीणियअणेगतालायराणुगयमग्गं । ऊसवियजूवसहसं करेह कारेह य लहुँ पि ॥९२०५।। इय सो सुमित्तरन्ना आइट्ठो नयररक्खगो पुरिसो। परितुद्रुहट्ठहियओ तन्वयणं परमविणएण ।।९२०६।। विनसिऊणं पंकयमुगुलायारं करंजलि सीसे । झ त्ति पडिस्सुणिऊणं तयंतियाओ विणीहरइ ।।९२०७।। एत्यंतरम्मि अरुणोदएण कुंकुमकयंगराय व्व । जाया पुन्वदिसिवहू जिणजम्मविवड्ढियाणंदा ।।९२०८।। सेसाओ वि दिसाओ जायाओ वियासनिम्मलमुहीओ। आरूढो उदयाचलसिहरग्गं सहसकिरणो वि ।।९२०९।। दसणकुऊहलेण व कुसग्गनयरम्मि कीरमाणस्स । जिणपुंगवजम्ममहूसवस्स अच्छरियभूयस्स ॥९२१०।। तत्तो नियपुरिसपरंपराहिं उग्घोसपुव्वयं एवं । कारेउं सयलपुरे नयरारक्खो कहइ रन्नो ॥९२११।। राया वि मज्जणविहिं काऊणं पुव्ववन्नियविहीए। विरइयवरसिंगारो महाविभूईए आगंतुं ।।९२१२।। अत्थाणमंडवे मणिमयम्मि सीहासणे निसीएइ । सव्विड्ढीए सव्वज्जुईए सव्वेण वि बलेण ।।९२१३।। सव्वसिरीए सव्वायरेण सव्वेण समुदएणं च। सव्वेण संभमेणं तह सव्वाए विभूसाए ॥९२१४।। ओरोहेणं सव्वेण सव्वपगईहिं सव्वनदे॒हिं । समकालपवाइयविविहतूरसंघायघोसेण ॥९२१५।। अमिलायमल्लदामं पमुइयपक्कीलियं अडंडं च। अभडपर्वसं करसुंकमुक्कमधरिममदेज्जं ।।९२१६।। पारद्धकोउयसयं गणियावरनाडइज्जपरिकलियं । सपुरजणं जाणवयं दहदियहाई करावेइ ।।९२१७।। इयरम्मि जणे जाए देसे नयरे गिहे व गामे वा । उप्पज्जइ संतोसो जिणिदजम्मे उ तिजए वि ।।९२१८।। पज्जलियम्मि पईवे भवणे एगम्मि चेव उज्जोओ। संजायइ सहसकरम्मि उग्गए सयलभुवणे वि ।।९२१९।। पच्चंतियरायाणो सामंता मंतिणो य मंडलिया। पोरजणा जाणवया सव्वे वि हु हरिसपडहत्था ।।९२२०।। नियविहवस्सणुरूवं गहिऊणं मंगलीयमइविउलं। एंति निरंतरमन्नोन्नमग्गपडिरुद्धसंचारा ।।९२२१।। सइए साहस्सियए सयसाहसिए य गिन्हई दाए । देइ य तहेव तुट्ठो राया अह तस्स तणयस्स ।।९२२२।। पढमम्मि वासरम्मी अम्मापियरो करेंति ठिइवडियं । कारेंति तइयदियहे दंसणियं चंदसूराणं ।।९२२३।। छद्रुम्मि वासरे कारवेंति सव्वं निसि पि जागरियं । एक्कारसमे दियहे निव्वत्तियजायकम्मम्मि ।।९२२४।। पत्ते बारसमदिणे उवक्खडावेंति विउलमाहारं । चउविहमसणाईयं तओ निमंतंति सव्वं पि ।।९२२५।। मित्तनियनाइसंबंधिपरियणं सयणवग्गमवि सव्वं । हरिवंसखत्तिए तह कारेउ मज्जणाईयं ॥९२२६।। भोयणवेलाए मंडवम्मि सह तेहिं भोयणं किच्चा। भुत्तुत्तरम्मि चोक्खे आयंते परमसुइभूए ।।९२२७।। ते वत्थगंधमल्लालंकारेणं जहोचियं सव्वे । सक्कारिऊण सम्माणिऊण तेसि पुरो एवं ।।९२२८।। वयइ सुमित्तो राया गब्भऽवइन्नम्मि दारए एत्थ । मुणिवंदणदाणरया सुव्वयकरणुज्जमपरा य ।।९२२९।। संजाया पउमावइदेवी तह गब्भपढमदियहम्मि। मुणिणा वि चारणेणं सुमिणफलं साहमाणेण ।।९२३०।। एयं चिय वागरियं तम्हा एयस्स होउ इममेव । मुणिसुव्वओ त्ति नाम इय भणिए तेहिं अणुनाओ ।।९२३१।।