Book Title: Munisuvratasvamicarita
Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad
View full book text ________________
सिरिमुनिसुध्वयजिणिदचरियं
२९१ जय जय मुणिवरवसभा! भयवं ! बुज्झाहि लोगतियनाहा । हियसुहनिस्सेसकरं धम्म तित्थं पवत्तेहि ॥९३६३।। जयजयसई इच्चेवमाइभत्तीए ते पउंजेउं । वंदति नमसंति य जहागयं जंति भुज्जो वि ।।९३६४॥ इय लोयंतियदेवेहि बोहिओ भुवणबंधवो भयवं । मुणिसुव्वओ महप्पा सुव्वयनामं नियं पुत्तं ।।९३६५।। महयाविच्छड्डेणं अहिसिंचइ नियसमिद्धरज्जम्मि। अह सो राया जाओ नमिओ सामंतमंतीहिं ।।९३६६।। आपुच्छिओ भगवया निक्खमणत्थं तओ नियमणुस्से । सद्दाविऊण आइसइ एरिसं गुरुपयत्तेण ।।९३६७।। जह भो देवाणुपिया ! खिप्पामेव य सुवन्नकलसाण। अट्ठोत्तरं सहस्सं जाव य भोमेज्जकलसाणं ॥९३६८।। अन्नं च महत्थं महरिहं च जं किचि सव्वमेव तयं । तिहुयणपहुणो समवट्ठवेह अहिसेयपाउग्गं ।।९३६९।। अह ते सुव्वयरायाएसाणंतरमसेसमवि एयं । खिप्पं उवट्ठवित्ता तस्स निवेएंति गंतूण ॥९३७०।। एत्थन्तरम्मि सीहासणस्स कंपेण दिन्नउवओगो। सोहम्मकप्पनाहो जाणइ मुणिसुव्वयजिणस्स ।।९३७१।। निक्खमणाभिप्पायं तो जह जम्माहिसेससमयम्मि । तव चेवुत्तरवेउव्वियजाणविमाणमारुढो ॥९३७२।। सव्वग्गमहिसिपरिसासामाणियआयरक्खदेवेहिं । सत्तहिं उ अणीएहिं सत्तहि य अणीयनाहिं ॥९३७३।। अन्नेहिं वि बहुएहि सोहम्मगदेवदेविनिवहेहि । परियरिओ वज्जहरो समागओ सामिपासम्मि ।।९३७४।। तेणेव य दिव्वेणं जाणविमाणेण संजुओ सक्को। आयाहिणीकरेउं भयवंतं तिन्नि वाराओ ९३७५।। उत्तरपुत्थिमाए दिसाए चउरंगुलेण धरणियले । ठविऊणमसंपत्तं जाणविमाणं तयं दिव्वं ९३७६।। तो दिव्वाओ तत्तो जाणविमाणाओ तियसगणसहिओ। पुवुत्तरजम्मेहिं दारेहि ओरुहेऊण ॥९३७७।। सुरनियरप्फालियतूरनिवहनिग्घोसपूरियदियंतो। तिक्खुत्तो आयाहिणपयाहिणीकुणइ जिणनाहं ।।९३७८॥ वंदइ नमसइ तओ अदूरनियडम्मि पज्जुवासेइ । सोहम्मवई एवं नेया सेसा वि कप्पिदा ॥९३७९।। भवणवइवाणमंतरजोइसिया वि हु ससामिणो सव्वे । तह चेव समागंत्तुं भगवंतं पज्जुवासंति ॥९३८०।। अह अच्चुयदेविंदो सद्दावित्ताभिओगिए देवे । एवं वयइ जहा भो देवाणुपिया ! दुयं चेव ॥९३८१।। मुणिसुव्वयस्स तुब्भे तिलोयनाहस्स महरिहमहत्थं । निक्खमणहिसेयमुट्ठवेह विउलं महिढ्डीयं ।।९३८२॥ अह ते तस्साएसं तह त्ति पडिवज्जिऊण हट्ठमणा । अहिसेयं झ त्ति उवट्ठवेंति जम्माहिसेयसमं । ।९३८३॥ अह ते दिव्वा कलसा सव्वे वि य तेसु चेव कलसेसु । नरनाहसंतिएसुं सुरसत्तीए अणुपविट्ठा ॥९३८४।। अह सो सुव्वयराया सामि सीहासणम्मि रयणमए। पुव्वाभिमुहं संठाविऊण न्हावेइ भूईए ॥९३८५।। कणयकलहोयमणिमाइयाण कलसाण जाव भोमाण । पत्तेयं पत्तेयं अट्ठोत्तरएण सहसेण ॥९३८६।। सव्वोदएहिं सव्वोसहीहिं सव्वाहि मट्टियाहि च । समकालपवाइयसयलतूरनिग्घोसनिवहेण ।।९३८७।। अहिसिंचइ अह तम्मि उ अहिसेयमहिम्मि वट्टमाणम्मि । मुणिसुव्वयस्स पहुणो के वि सुरिन्दा गहियछत्ता ।८८। केवि करकलियससहरकरनिम्मलचारुचामरुप्पीला। विमलजलपुन्नमंगलकलसकरा के वि देविदा ।।९३८९॥ धुवकडच्छयहत्था के वि हु वरपुप्फगंधमल्लकरा। चिट्ठति पंजलिउडा पुरओ केइ वि पहिट्ठमणा ।।९३९०।। अन्ने वि देवदेवी निवहा बहवे वि हत्थगयकलसा। भिंगारथालपाईआयंसगवायकरगकरा ।।९३९१।। सुपइट्ठविचित्तकरंडपुप्फचंगेरिपुप्फपडलकरा । सीहासणे तेल्लसमुग्गछत्तसियचामरकरग्गा ।।९३९२।। धूवकडच्छयहत्था पुरओ चिट्ठति पंजलिउडा य । अप्पेगइया देवा कुसग्गनयरं समग्गं पि ॥९३९३।। कुव्वंति महपहाइसु सित्तं सम्मज्जिओवलित्तं च । विजयसुरस्स व मज्जणमहम्मि धावंति वग्गंति ॥९३९४॥
Jain Education International
For Private & Personal Use Only
www.jainelibrary.org
Loading... Page Navigation 1 ... 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 