Munisuvratasvamicarita

Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad

Page 308

सिरिमुनिसुव्वयजिणिदचरियं
२७५ अणुगच्छइ तित्थयराभिमुहं सत्तट्ट चेव य पयाइं । अंचइ वामं जाणूं दाहिणयं निवेसइ धरणीए ॥८८५६।। तिक्खुत्तो मुद्धाणं तो संघट्टइ वसुंधरावीढे । अह ईसि उन्नामेउं कयंजली भणइ सक्कथयं ।।८८५७।। पडिपुग्नं पि नमोत्थुणमिच्चाइपयाउ पभिइ जाव पयं । संपत्ताणं ति तओ नमोत्थुमुणिसुव्वयजिणस्स ।।८८५८।। अरहंतस्स भगवओ आइगरस्सेवमाइ ता भणइ । जाव पयं संपाविउकामस्सेयं भवइ अंते ।।८८५९।। तत्तो जंपइ एवं वंदामि अहं इहट्ठिओ चेव । भगवंतं तित्थयरं तत्थ ठियं सो वि भुवणपहू ।।८८६०।। तत्थेव ठिओ पासउ मं एत्थ ठियं ति भासिउं भुज्जो। वंदइ नमसइ जिणं पुव्वाभिमुहो तओ होउं ।।८८६१।। सीहासणे निसीयइ संपेहइ एवमप्पणो चित्ते । उप्पन्नो खलु भगवं तित्थयरो जंबुदीवम्मि ।।८८६२।। ता एयं सक्काणं तीयपडुपन्नणागयाणं पि । जीयं जं किर कीरइ जम्मणमहिमा जिणिदस्स ।।८८६३।। गच्छामि अहं पि तओ जम्मणमहिमं करेमि जगगुरुणो। एवं संपेहित्ता सद्दावइ तक्खणे तत्तो ।।८८६४।। हरिणेगमेसिनामं पाइत्ताणीयअहिवइं देवं । इय आणवेइ जह भो देवाणुपिया! तुमं खिप्पं ।।८८६५।। सोहम्मसहं गंतुं मेघोघरसियगभीरयरसइं। घंटे सुघोसनामं जोयणपरिमंडलं सुसरं ॥८८६६।। तिक्खुत्तो उल्लालेमाणो एवं वयाहि गुरुसइं। भो आणवेइ सक्को देविंदो देवगणराया ।।८८६७।। गच्छइ भो भो सक्को देविदो जंबुदीवभरहम्मि । तित्थयरस्स भगवओ जम्मणमहिमाए करणत्थं ।।८८६८।। ता तुम्भे वि य णं भो देवाणुपिया ! समग्गइड्ढीए। सव्वबलेणं सव्वायरेण सव्वजुईए य ॥८८६९।। सव्वाए विभूईए सव्वेणं समुदयप्पगरिसेण। सव्वेहि नाडएहि ओरोहेहिं च सव्वेहि ।।८८७०।। सुइपुप्फगंधमल्लालंकारविहूसणाहिं सव्वाहि । सव्ववरतुडियतंतीमुइंगतलतालसद्देण ॥८८७१।। नियपरिवारसमेया नियजाणविमाणवाहणारूढा। पाउब्भवह समीवे सक्कस्स अकालपरिहीणं ।।८८७२।। हरिणेगमेसिदेवो अह सो सक्केण देवराएण। इय पणिओ समाणो आणंदसमुल्लसंतमणो ॥८८७३।। सक्कस्स अंतियाओ पडिनिक्खमिऊण गच्छए तत्तो। सोहम्माए सहाए तत्थ सुघोसं महाघंटं ।।८८७४।। तिक्खुत्तो उल्लालइ अह तीए मेहगहिरसहाए। उल्लालेमाणीए सोहम्मे तम्मि कप्पम्मि ॥८८७५।। एगणे सव्वेसु वि बत्तीसविमाणसयसहस्सेसु। तक्खणमेगूणाई घंटालक्खाई बत्तीसं ।।८८७६।। जुगवं पि पयट्टाई काउं कणकणरवं समग्गाइं । तो सोहम्मो कप्पो पासायविमाणमालासु ॥८८७७।। निक्कुडनिवडियघंटासद्दसमुटुंतपडिनिनायाणं । लखेहि अणेगेहिं निरंतरं संकुलो जाओ ।।८८७८।। तत्तो तेसि सोहम्मकप्पवत्थव्वयाण बहुयाण। वैमाणियदेवाणं देवीण पमत्तचित्ताण ।।८८७९।। विसयसुहमुच्छियाणं एगतेणेव रइपसत्ताण । पसरियघंटाघोसायन्नणपडिबुद्धिचित्ताण ॥८८८०॥ उग्घोसणकोऊहलविइन्नकन्नाण अवहियमणाण । सो पायत्ताणीयाहिवइ हरिणेगमेसिसुरो ।।८८८१।। घंटारवम्मि संते तहिं तहिं तत्थ तत्थ देसम्मि। महया महया सद्देण एवमुग्घोसणं कुणइ ॥८८८२।। हंद सुगंतु भवंतो सब्वे सोहम्मकप्पवासिसुरा । सोहम्मकप्पवइणो इणमो वयणं हियसहत्थं ।।८८८३।। भो आणवेइ सक्को इच्चाइ ताव जाव पज्जते। पाउब्भवह समीवे सक्कस्स अकालपरिहीणं ।।८८८४।। तत्तो ते वेमाणियदेवा देवीगणा य इममढें । सोऊण हट्टतुट्ठा जाव विसप्पंतहियया य ।।८८८५।। अप्पेगइया वंदणपूयणसक्कारवत्तियं अन्ने। सणकोऊहल्लेण केइ सक्काणुवित्तीए ॥८८८६।। अन्नोन्नं अणुवित्ति कुणमाणा केइ केइ जीयं ति । एमाइ कटु सव्वे नियनियइड्ढीए सव्वाए ।।८८८७।। पाउब्भवंति सक्कस्स अंतिए देवदेविसंघाया। कालपरिहाणिवज्ज अह ते दळूण देविंदो ॥८८८८।।