Munisuvratasvamicarita

Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad

Page 313

२८०
सिरिमुनिसुव्वयजिनजम्मवण्णणं अवसेसा सव्वे वि हु देवा देवी य दाहिणिल्लेण । पच्चवरोहति तिसोवाणगपडिरूवगेणेव ॥९०२१।। अह सक्को देविदो सामणियसुरसहस्सचुलसीए। सेसेण य सव्वेणं सुरपरिवारेण परियरिओ ॥९०२२।। सव्विढ्डीए जाव य दुंदुहिनिग्घोसनाइयरवेण । जेणेव य तित्थयरो भयवं तित्थयरजणणी य ॥९०२३।। तेणेव उवागंतु आलोए चेव झत्ति पणमेइ । पणमित्ता आयाहिणपयाहिणं कुणइ तिक्खुत्तो।।९०२४।। करयलपरिग्गिहीयं तत्तो काऊण अंजलि सीसे। एवं वयइ जहा ते नमोत्थु कुच्छीधरियरयणे ! ॥९०२५। इच्चाइ दिसिकुमारीगमेण संथणइ ताव जिणजणणीं । पज्जते हवइ इमं जाव पयं तं सि सुकयत्था ।।९०२६।। तो पयडइ अप्पाणं देवाणुपिए ! तिलोयनमणिज्जे ! । सक्को नामेण अहं देविदो देवगणराया ।।९०२७।। तित्थयरस्स भगवओ जम्मणमहिमं पसाहइस्सामि । तत्तो महाणभावे तुब्भाहिं न भाइयव्वं ति ॥९०२८॥ भणिउं जिणजणणीए दाउं अवसोयणि विउव्वेउं । तित्थयरप्पडिरूवं तीसे पासम्मि ठावेउं ।।९०२९।। पंच विउव्वइ सक्के एक्को सक्को तओ उ आयंतो । चोक्खो परमपवित्तो होऊण विलित्तकरजुयलो ।।९०३० गोसीसचंदणेणं सरसेण सुगंधिणा कयपणामो। अणुजाणइ मे भयवं! ति कटु भगवंतमरिहंतं ।।९०३१।। करयलउडेहिं गिण्हइ ससंभमो सहरिसो तयणु एक्को । सक्को अणुमग्गगओ छणिंदुमंडलसमसिरीयं ।।९०३२ धरइ धवलायवत्तं उवरि जिणिदस्स दोन्नि सक्का उ । पासेसु चामरे उक्खिवंति ससिकुंददलधवले ।।९०३३।। एक्को सक्को पुरओ करयलकलिएण कुलिसडंडेण । अणुकढ्डइ इय एवं सक्को अन्नेहि वि बहूहिं ।।९०३४।। भवणवइवाणमंतरजोइसवेमाणिएहिं देवेहिं । देवीहि य परियरिओ जाव महादुंदुहिरवेण ।।९०३५।। ताए उक्किट्ठाए देवगतीए य चंडचवलाए। जेणेव मंदरगिरी पंडगवणमंडियसिरग्गो ॥९०३६।। जेणेवाहिसेयसिलाए अत्थि सीहासणं रयणरुइरं । तेणेव उवागंतुं पुव्वाभिमुहो निसीएइ ॥९०३७।। अह ईसाणे कप्पे सूलहरो वसहवाहणो इंदो। उत्तरलोगढ्डपहू अरयंबरवत्थधारी य ॥९०३८।। इच्चाइ जहा सक्को तह इंदा सेसया वि भणियव्वा। जावऽच्चुयकप्पिदो नेयमिणं नवर नाणत्तं ।।९०३९।। बत्तीसट्टावीसा बारस तह अट्ट चउसयसहस्सा। पन्ना चत्त छ सहसा सय चउ ति कमा विमाणाणं ।।९०४०।। चुलसी असीइ बावत्तरि सत्तरि सट्टिय पन्न चत्ताला । तीसा वीस दसेण य कमेण सामाणियसहस्सा ।।९०४१।। पालय पुप्फय (ति) सोमाणसा य सिरिवच्छनंदियावत्ता । कामगमे पीइगमे मणोरमे विमलनामे य ।।९०४२।। तह होइ सव्वओ भहनामओ सक्कमाइयाण इमे। कप्पिदाण दसन्ह वि विमाणनिम्मावगा नेया ।।९०४३।। आइमतईयपंचमसत्तमनवमाण कप्पइंदाण । हरिणेगमेसिनामा पायत्ताणीयअहिवइणो ॥९०४४।। घंटा सुघोसनामा निज्जाणयहो हवेज्ज उत्तरओ। दाहिणपुरथिमिल्लो रइकरगो पव्वओ होइ ।।९०४५।। दोच्चचउत्थच्छट्ठट्ठमदसमाणं तु कप्पइंदाण । पायत्ताणीयवई नामेणं लहु परक्कमओ ॥९०४६।। घंटा य महाघोसा निज्जाणपहो हवेज्ज दक्खिणओ । उत्तरपुरथिमिल्लो रइकरगो पव्वओ नेओ॥९०४७।। ईसाणिदाईणं अच्चुयकप्पाहिवावसाणाणं । आसणकंपाईयं सक्कस्स व सव्वमिह नेयं ॥९०४८।। सव्विढ्डीए गंतूण मंदरे जाव पज्जुवासंति । नवरं जिणिदजम्मणघरगमणाई न भणियव्वं ।।९०४९।। अह चमरो असुरिंदो सरायहाणीए चमरचंचाए । सोहम्माए सहाए चमरे सीहासणम्मि ठिओ ।।९०५०।। चउसट्ठीए सामाणियाण सहसेहिं तायतीसेहिं । तेत्तीसाए देवेहिं चउहि तह लोगपालेहिं ।।९०५१।। अग्गमहिसीहिं पंचहि परिवारजुयाहिं तिहिं उ परिसाहिं । सत्तहिं उ अणीएहि अणीयहिवईहिं सत्तहिं उ ।५२। अन्नेहि य परियरिओ जहेव सक्को इमं तु नाणत्तं । पायत्ताणीयवती दुमो य घंटा य ओघसरा ।।९०५३।।