Book Title: Munisuvratasvamicarita
Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad
View full book text ________________
सिरिमुनिसुव्वयजिणिदचरियं
२६१ अयसो च्चिय तेण परं गहिओ मूढेण तं हरंतेण । मह विरहम्मि तुमं पुण जीवसि न खणं पि पइवइए! ।।८४०९।। तुह विरहे जं दुक्खं मज्झ अहं तं सहेमि मह विरहे । जं तुज्झ दुहं तं पुण दइए! सहिउं न सक्कमि ।।८४१०।। हा वणमाले! हा कमललोयणे! हा छणिदुसमवयणे । हा पीणघणत्थणि! कत्थ तं पुणो दीससे सुयणु! ।।८४११।। तं तुह हसियं तं तुज्झ जंपियं तं पलोइयं तुज्झ । तं तुह रमियं च पिए! कत्थगओ हं लहिस्सामि ।।८४१२।। इय तं दठूण जणो घरघरदारम्मि जपिरं दीणं । सो नत्थि नयरिमज्झे न परुन्नं जेण धाहाहिं ।।८४१३।। एवं च सो वराओ पेम्मपिसाएण विनडिओ संतो । तत्थ अणेयं कालं पडिपडिओ दुक्खसंतत्तो ॥८४१४।। अन्नम्मि दिणे डिभगसहस्सपरिवारिओ कलयलेण । कीरंतेणं पत्तो उवंगणं रायभवणस्स ॥८४१५।। मिलिओ नरिंदलोओ सयलो कोऊहलेण तत्थ तओ। तेण कयतालसद्दो मोहेण पणच्चिओ तत्तो ॥८४१६।। सोऊण गरुयकलयलसदं तं सुमुहनरवरिंदो वि । वणमालाए सह पिययमाए किं किं किमयं? ति ।।८४१७।। जंपतो संपत्तो तत्थ पएसम्मि जाव पेक्खेइ । तं वीरयं कुविदं अतिबीभच्छं पणच्चंतं ।।८४१८।। मयणमणमोहियमणं जरडंडीखंडनिवसणं दीणं । फुडिउद्धरुक्खकेसं सुक्कं कीलं व दवदड्ढं ॥८४१९।। उरकयसरावमालं मुत्तासुइपंकगोव्वरविलित्तं । वणमाले! वणमाले! त्ति जंपिरं दुक्खपरिकलियं ।।८४२०।। पुणपुणनियनामग्गहणसवणओ जायगरुयसंकाए । संगोवंग पि तयं निउणं अवलोयमाणीए ॥८४२१॥ वणमालाए उवलक्खिऊण सो दंसिओ नरिंदस्स। जह एसो सो नरवर ! मह भत्ता वीरयकुविन्दो ।।८४२२।। मज्झ विओए जाओ एरिसओ एस पेम्मगहगहिओ। उम्मत्तओ वराओ अह तं सोऊण सुमुहनियो ।।८४२३।। वणमाला समं चिय दोन्नि वि गहियाइं गरुयसोएण । तक्खणमेव परोप्परमेवं च पयंपमाणाई ।।८४२४।। एसेस सो वराओ वीरयनामो कुविंदकुलजाओ । अम्हाण चेट्टिएणं एयमवत्थंतरं पत्तो ॥८३२५।। हा निग्घिणं कयमिणं कम्म अम्हेहि नियमणेहिं । धि द्धी एयं अम्हाण चेट्टियं विगयसीलाण ॥८४२६।। किं एत्तो विय पावं महामहंतं हवेज्ज तिजए वि । विसयपसत्तेहिं कयं जं एयं कह वि अम्हेहिं ।।८४२७।। इहपरलोयविरुद्धं धम्मसुईनिंदियं महापावं । हा हा मोहवसा कयमेयं अम्हेहिं अहमेहि ॥८४२८।। ते धन्ना सप्पुरिसा विसयपसंग समग्गमुझेउं । इहपरलोए य हियं कुणंति जे धम्ममणवरयं ।८४२९।। कत्तो अम्हाण पुणो धम्मस्स लवो वि गलियसीलाण । पावपसत्ताणं केवलं पि पावं कुणंताण ॥८४३०।। पुव्वपुरिसाण मग्गो अम्हेहि कलंकिओ विसुद्धो वि । एयं महामहंत पावट्ठाणं कुणंतेहिं ।।८४३१।। ता एत्थ वंदणिज्जा ते च्चिय पुरिसा जयम्मि सयलम्मि । जे मुक्कविसयसंगा कुणंति उग्गं तवच्चरणं ।।८४३२।। इय एवमाइगाढं अणुतप्पंताई ताई यियम्मि । विज्जूए गयणाओ पडिऊणं दो वि दड्ढाइं ।।८४३३।। अन्नोन्नं नेहेण य परिणामेण य सुहेण दोण्हं पि । मरिऊणं उप्पत्ती जाया हरिवासखेत्तम्मि ।।८४३४।। मेरुस्स दाहिणेणं निसढो नामेण अत्थि कुलसेलो। तह य महाहिमवंतो तेसिं दोन्हं पि मज्झम्मि ॥८४३५।। तं हरिवासं खेत्तं वसइविसालं वसुंधरा जस्स । मणिकुट्टिमं व विमला विचित्तउज्जाणरमणिज्जा ।।८४३६।। रयपंककंटयातीहिं विरहिया सव्वओ समा रम्मा। तह दंसमसगमंकुणजूयाइविवज्जिया निच्चं ।।८४३७।। न य चंदसूरियाणं उवराओ तत्थ जायइ कया वि। न य तिव्वायववाया सीयनिवाया व जायंति ।।८४३८।। जायंति तत्थ मणुया जुगवं नरनारिजुयलधम्मेण । सयलपुरिसिथिलक्खणकलिया पइभज्जभावेण ।।८४३९।। कोलंति जहिच्छाए अहमिदा अमरमिहुणसारिच्छा । रोयजरापरिमुक्का अकालमच्चूपरिच्चत्ता ।।८४४०।।
Jain Education International
For Private & Personal Use Only
www.jainelibrary.org
Loading... Page Navigation 1 ... 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 