Munisuvratasvamicarita

Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad

Page 278

सिरिमुनिसुव्वयजिणिदचरियं
२४५
दसमदुवालसमाती तवोविहाणम्मि मम पुण जहिच्छा। बालगिलाणादीणं यावच्चं च कायव्वं ॥७८८९।। आह गुरू नियडागयपाउसकालं इमं तुमं गंतुं । चंदउरीए पुरीए काउं कइवय मुणिसहायओ ।।७८९०।। तो तत्तो आगंतुं निविग्धं नियसमीहियं कुणह । जं कित्तिवम्मपभितीहिं पत्थणा अत्थि ते विहिया ।।७८९१।। अन्नह पुण अविहियदंसणस्स तुह परभवम्मि पत्थाणं । नाऊण ताण खेओ मणम्मि भावी अइमहंतो ।।७८९२।। इय गुरुवयणं सोउं सिरिवम्ममुणी विचितए एवं । किं सयहिं मम कम्मनिज्जराहाणिजणएहि ॥७८९३।। कितु मए गुरुवयणं न लंघणिज्जं तत्थ गंतब्बं । इय चिंतिऊण गुरुणो वयणं तं तह अणुठेइ ।।७८९४।। गंतुं चंदउरीए ठाउं चउमासगं निवाईण । उप्पाइऊण परमं संतोसं ते अणुन्नविउं ॥७८९५।। दाउं मिच्छा दुक्कडमागंतूणं पुणो गुरुसमीवे। गहिऊण पुव्वभणियं अभिग्गहं पालिउं सम्मं ॥७८९६।। अरहंताई वच्छल्लयाइ ठाणाई सेविऊण तओ। तित्थयरनामगोयं बंधेउं विहियसलेहो ।।७८९७।। आलोयणं च दाउं महव्वयाइं च उच्चरावेउं । काऊण खमियखामियमणुनाओ तो नियगुरूहि ।।७८९८।। पडिवज्जिउं अणसणं सिलायले फासुए गिरितडम्मि। सिरिनिलयनयरनियडे पाओवगमेण ठाऊण ।।७८९९।। संचिट्रइ दो मासे सुहझाणपरायणो पइखणं पि । सव्वाउयम्मि खीणे समाहिणा पाणए कप्पे ॥७९००।। सिरिवम्मकुमारदेवभवो-- विमलप्पहे विमाणे जोयणलक्खाइं तं अणेगाइं । विक्खंभायामेणं चउरस्सं सव्वरयणमयं ॥७९०१॥ आगासपइट्टाणं दगरयकुंदिदुधवलमयस्स । पुढवीए बाहल्लं तेवीसं जोयणसयाइं ॥७९०२।। पायारेणं कणयामएण तं सव्वओ वि परिखित्तं । सो पायारो उच्चत्तणम्मि जोयणसया तिन्नि ।।७९०३।। पायारस्स य मूले विक्खंभो तस्स जोयणाण सयं । मज्झे पन्नासं जोयणाइं उप्पि तु पणुवीसं ॥७९०४।। कविसीसगाई तत्थ य नाणामणिमयदसद्धवन्नाइं । जोयणमायामेणं विक्खंभेणं तु तस्सद्धं ॥७९०५॥ उड्ढं उच्चत्ते पुण देसूणं जोयणं हवइ तेसि । तस्स विमाणस्स पुणो बाहाए एगमेगाए ।।७९०६।। मणिकणगनिम्मियाइं सहस्ससंखाइं होंति दाराइं । पंचसयायामाहं विक्खंभेणं तयद्धाइं ॥७९०७।। तावइयं च पवेसे ते मणिमयथूभियाणगा दारा। ईहामियउसभतुरंगमगरवालगविहंगाणं ॥७९०८।। किन्नरनररुरु-कुंजर-वणलयपउमलयसरभचमराणं । भत्तीहिं. बहुविचित्ता खंभुग्गयवइरवेईया ।।७९०९।। विज्जाहरजमलगजुयलजंतजुत्ता पभासमाणा य । रूवगसहस्सकलिया अच्चिसहस्सेहिं सोहंता ॥७९१०।। नयणमणाणंदयरा सुहफासा सस्सिरी य रूवा य । तेसि दाराणं एत्थ बन्नओं तह भणेयव्वो ॥७९११॥ जह रायपसेणइए खंभकवाडिदकीलपरिहाण । उल्लोयभित्तिगोमाणसीण तह कणगकूडाण ॥७९१२॥ मणिरयणवालरूवगलीलट्ठियसालहंजियातीण । तह नागदंतलंबियधूवघडी सिक्कयाईण ॥७९१३।। पडिदारमुभयभागे चंदणकलसाण ठावियाणं च । सोलससोलससंखाण सव्वरयणामयाणं च ।।७९१४।। सुरहिवर परिपूरियाण आवारिविद्धकंठमालाण । कमलपइट्ठाणाणं पउमुप्पलकयपिहाणाण ।।७९१५।। तह जालकडगघंटातोरणवणमालछत्तमातीण । वत्थूण वित्थरेणं अइमहया वनओ भणिओ ।।७९१६ ।। तस्स विमाणस्स चउद्दिसि पि चत्तारि संति वणसंडा । एएसि आयामो विमाणआयामओ अहिओ ॥७९१७।। विक्खंभे पुण जोयणसयाइं ते होंति पंच पंचव । पुव्वेण असोगवणं दाहिणओ सत्तिवन्नवणं ॥७९१८।। पच्चत्थिमेण चंपगवणमुत्तरओ य होति चूयवणं । ते वणसंडा सवे पागारेणं परिक्खित्ता ॥७९१९।। किण्हा किण्होभासा इच्चाई होति वन्नओ तेसिं । वणसंडाणं अंतो बहुसमरमणिज्जभूभागा ॥७९२० ।।