Book Title: Munisuvratasvamicarita
Author(s): Chandrasuri, Rupendrakumar Pagariya, Yajneshwar S Shastri, R S Betai
Publisher: L D Indology Ahmedabad
View full book text ________________
२५२
सिरिवम्मकुमारदेवस्सभवो गंठिमवेढिमपूरिमसंघाइमएहि कप्परुक्ख च । अप्पाणमलंकियभूसियं करेऊण तत्तो य ॥८११८।। दद्दरमलयसुगंधियगंधेहि भुकुंडए समग्गतणुं । दिव्वं च सुमणदामं पिणिधए तयणु सो देवो ।।८११९।। वरकेसमल्लवत्थाहरणालंकारभयभिन्नण । चउविहलंकारेणं अलंकिओ भसिओ संतो ॥८१२०।। आलंकारियभवणाओं पुव्वदारेण निक्खमेऊण । आयाहिणीकरेंतो ववसायसहं वयइ तत्तो ॥८१२१।। तत्थ पुरमिल्लदारेण विसइ सीहासणम्मि उवविसइ। तो सामाणियदेवा तस्साणेउं समति ॥८१२२।। पोत्थयरयणं सो तं गिन्हइ उग्घाडिऊण वाएइ । धम्मियमिह ववसायं अवहारेऊण चित्तम्मि ।।८१२३।। पोत्थयरयणं पडिनिक्खिवेइ सीहासणाउ उठेइ । ववसायसहाए पुरत्थिमेण दारेण नीहरइ ॥८१२४।। नंदापुक्खरिणीए पुवेणं तोरणेण पविसेउं । पुव्विल्लतिसोमाणगपडिरूवेणं समोयरइ ।।८१२५।। पक्खालइ करचरणे चोक्खो होऊण परमसुइभूओ । सेयं महंतमेगं रययमयं विमलजलपुन्नं ॥८१२६।। मत्तगयमहारहमुहसमागिइं गिन्हिऊण भिंगारं । उप्पलसयवत्तसहस्सवत्तमाईणि गिण्हेइ ।।८१२७।। नंदापुक्खरिणीओ नीहरइ तओ समग्गदेवेहिं । सामाणियपमुहेहि केहिं वि करकलियकलसेहिं ।।८१२८।। जा वरधूयकडच्छुयकरेहि केहिं वि पहिट्ठहियएहिं । पच्छा अणुगम्मतो देविड्ढीए समग्गाए ॥८१२९।। महयाहयतलतन्ती-ताल-मुइंगप्पवाइयरवेण । सिद्धाययणे वच्चइ पविसइ पुग्विल्लदारेण ॥८१३०।। गंतूण पुरो देवच्छंदठियाणं जिणिंदपडिमाणं । आलोयम्मि पणामं करेइ आणंदपडिपुन्नो ।।८१३१।। गहिऊण लोमहत्थं जिणपडिमाओ पमज्जए तत्तो । गंधोदएण न्हावेइ सुरहिणा दणरसेण ॥८१३२।। गोसीसेणं लिपइ जिणपडिमाणं समग्गगायाइं । तयणु नियंसावइ देवदूसजुयलाई अहयाइं ॥८१३३।। वरपुप्फमल्लगंधाणचुन्नवत्थाण कुणइ आरुहणं । आहरणारहणं तह करेइ पडिमासु सव्वासु ।।८१३४।। वरसुरहिकुसुममालाकलावकलियं करेइ तं ठाणं । करगहियविमुक्कदसद्धवन्नकुसुमोवयारं च ॥८१३५।। अच्छहि सन्तेहिं सयलेहिं तंदुलेहिं सेएहिं । रययामएहि अट्ठमंगले आलिहइ पुरओ ॥८१३६।। तयणंतरं च चंदप्पहरयणविसुद्धवेरुलियडंडं । कंचणमणिरयणविचित्तभत्तिकलियं विमलछायं ॥८१३७।। डझंतं पवरकालागुरुसुरहितुरुक्ककुंदुरुक्कं च । गंधुत्तमाणुविद्धं सुगंधवट्टि विणिमुयंतं ॥८१३८।। वेरुलियमयं गहिउं कडच्छयं जिणवराण पत्तेयं । दावेऊणं धूयं संथुणइ तओ जिणवरिदं ॥८१३९।। अट्ठसएणं वित्ताण अपुणरुत्ताण अत्थजुत्ताण । थुणिउं पच्चोसक्कइ सत्तट्ठपयाई तत्तो य ॥८१४०।। अंचइ वामं जाणूं भूमीए दाहिणं निवेसेइ । तिक्खुत्तो मुद्धाणं धरणियले तो निवाडेइ ॥८१४१।। ईसि पच्चुन्नमिउं करयलजुयलं सिरम्मि ठविऊण । पयओ वयइ नमोत्थुणमिच्चाई सव्वसक्कथयं ।।८१४२।। वंदइ नमसइ तओ सिद्धाययणस्स मज्झबहुभाए । गंतूण तं पमज्जइ करपगहियलोमहत्थेण ।।८१४३।। दिव्वोदगधाराए अब्भुक्खेऊण चंदणरसेण । पंचंगुलितलमालिहइ मंडलं वित्थडं तत्थ ।।८१४४।। पयरं काऊण दसद्धवन्नकुसुमेहिं दावए धूयं । सिद्धाययणस्स तओ वच्चइ दारम्मि दाहिणए ॥८१४५।। तो तत्थ दारवेड्डाए वालवे य सालहंजीओ । लोमगहत्थेण पमज्जिऊण दिव्वोदगस्स तओ ।।८१४६।। धाराए अब्भुक्खइ चच्चइ गोसीसचंदणरसेण । पुष्फारुहणं जावाभरणारुहणं समायरइ ॥८१४७।। वरसुरहिकुसुममालाकलावकलियं करेत्तु दावेइ । कालागुरुवरधूवं तो दाहिणदारभायस्स ।।८१४८।। मुहमंडवम्मि वच्चइ तस्स य बहुमज्झदेसभायम्मि । लोमगहत्थेण पमज्जिऊण अब्भुक्खइ जलेण ।।८१४९।। पंचंगुलितलमालिहइ मंडलं सुरहिचंदणरसेण । पयरइ दसद्धवन्नाई तत्थ गंधड्ढकुसुमाइं ।।८१५०।।
Jain Education International
For Private & Personal Use Only
www.jainelibrary.org
Loading... Page Navigation 1 ... 283 284 285 286 287 288 289 290 291 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 